உயிரிழந்த சிறுவன் ஹம்தியின் அகற்றப்பட்ட சிறுநீரகம் வைத்தியசாலையிலிருந்து காணாமல் போயுள்ளது
இரு வைத்தியர்களும் நாட்டைவிட்டு வெளியேறியுள்ளனர்; விசாரணை அறிக்கை எங்கே என சுகாதார அமைச்சரிடம் முஜிபுர் ரஹ்மான் கேள்வி
சிறுநீரக மாற்று சத்திரசிகிச்சை செய்ததன் காரணமாக கடந்த வருடம் உயிரிழந்த மூன்று வயது சிறுவன் ஹம்தியின் அகற்றப்பட்ட சிறுநீரகம் கொழும்பு லேடி ரிஜ்வே வைத்தியசாலையிலிருந்து காணாமல் போயுள்ளதாகவும் இது மிகவும் பாரதூரமான விடயம் எனவும் பாராளுமன்ற உறுப்பினர் முஜிபுர் ரஹ்மான் நேற்றுமுன்தினம் பாராளுமன்றில் சுட்டிக்காட்டினார்.
அத்தோடு, இந்த சத்திர சிகிச்சையுடன் தொடர்புபட்ட இரு வைத்தியர்கள் நாட்டைவிட்டு வெளியேறியுள்ளதாகவும் விடயத்துடன் தொடர்புடைய விசாரணை அறிக்கை இன்னும் வெளியிடப்படவில்லை என்றும் சுகாதார அமைச்சின் மீது குற்றம் சுமத்தினார்.
நேற்று முன்தினம் பாராளுமன்றின் கேள்வி நேரத்தின்போதே அவர் இதனை தெரிவித்தார்.
மேலும் குறிப்பிடுகையில்,
டிசம்பர் 2022 இல், ஹம்தி பஸ்லீம் என்ற மூன்று வயது சிறுவனின் இடது சிறுநீரகம் கொழும்பில் உள்ள சீமாட்டி ரிட்ஜ்வே சிறுவர் வைத்தியசாலையில் அகற்றப்பட்டது. சிறுநீரகம் செயலிழந்தமையே இதற்குக் காரணம். ஆனால் அந்த ஒபரேஷன் முடிந்து, அந்த சத்திர சிகிச்சைக்கு பின், அந்த சிறுவன் சாதாரண நோயாளர் விடுதியில் சேர்த்த பின், இடது சிறுநீரகம் அகற்றப்பட்டதாக அறிக்கையில் குறிப்பிடப்பட்டிருந்தது.
ஆனால் அந்த சிறுநீரகம் அகற்றப்பட்ட ஏழு மாதங்களுக்குப் பின்னர், இரண்டு சிறுநீரகங்களும் அகற்றப்பட்டமை கண்டுபிடிக்கப்பட்டது. அந்த சிறுவன் ஜூலை 2023 இல் உயிரிழந்தார். அந்த சிறுவன் உயிரிழந்து சரியாக ஒரு வருடம் ஆகிறது.
சத்திர சிகிச்சையில் ஈடுபட்ட இரண்டு வைத்தியர்கள் ஏற்கனவே நாட்டை விட்டு வெளியேறியுள்ளனர்.
இந்த சத்திர சிகிச்சையை செய்தவரின் பெயர் டொக்டர் நளின் விஜயகோன். இந்த சத்திர சிகிச்சை முடிந்தவுடன் அவர் நாட்டை விட்டு வெளியேறினார். அடுத்ததாக அதை ஸ்கேன் செய்த டொக்டர் நுவான் ஹேரத்தும் நாட்டை விட்டு வெளியேறியுள்ளார். இதில் தொடர்புடைய இருவரும் இன்று இந்த நாட்டில் இல்லை. இப்போது அந்த சிறுநீரகங்கள் வைத்தியசாலையில் இல்லை. இது மிகப்பெரும் பிரச்சினையாகும். எப்படியிருந்தாலும், சிறுநீரகத்தை அகற்றினால், அது வைத்தியசாலையில் இருக்க வேண்டும். தற்போது அது வைத்தியசாலையில் இல்லை என தெரிவிக்கப்பட்டுள்ளது. எனவே இது மிகவும் பாரதூரமான நிலைமை என நான் கருதுகிறேன், இது கொழும்பு சிறுவர் வைத்தியசாலையில் இடம்பெற்ற சம்பவம்.
விசாரணை நடத்தி அறிக்கை சமர்ப்பிக்கப்படும் என அதிகாரிகள் தெரிவித்தனர். இன்றோடு ஒரு வருடம் ஆகிறது. இதுவரை எந்த அறிக்கையும் சமர்ப்பிக்கப்படவில்லை. அத்துடன் இந்த விடயம் தொடர்பாக ரவூப் ஹக்கீம் எம்.பி. பாராளுமன்றத்தில் கேள்வி எழுப்பியபோது அறிக்கையை முன்வைப்பதாக குறிப்பிடப்பட்டது. ஆனால் அறிக்கைகள் இன்னும் வரவில்லை.
எனவே, நான் உங்களிடம் கேட்க விரும்புகிறேன், குறிப்பாக இப்போது அந்த சிறுவன் இறந்து ஒரு வருடம் ஆகிறது. சுகாதார அமைச்சு எடுத்த நடவடிக்கைகள் மற்றும் அந்த அறிக்கைகளின் நிலை ஆகியவற்றை உங்கள் ஊடாக அறிய விரும்புகிறேன் என்றார்.
தற்போது அந்த கேள்விக்கு தம்மிடம் பதில் இல்லை என அவைத் தலைவரிடம் தெரிவித்த சுகாதார அமைச்சர் வைத்தியர் ரமேஷ் பத்திரன, ஒரு வாரத்திற்குள் பதில் அளிப்பதாக முஜிபுர் ரஹ்மான் எம்.பி.யிடம் உறுதியளித்தார்.- Vidivelli