இஸ்லாத்தையும் முஸ்லிம்களையும் அவமதித்த குற்றச்சாட்டில் நான்கு வருட சிறைத்தண்டனை விதிக்கப்பட்டுள்ள பொது பல சேனா அமைப்பின் பொதுச் செயலாளர் கலகொட அத்தே ஞானசார தேரருக்கு மன்னிப்பு வழங்குமாறு பெளத்த அமைப்புகள் அழுத்தங்களை வழங்கி வருகின்றன. கடந்த வெசக் பண்டிகையையொட்டி தேரரை மன்னித்து விடுவிக்குமாறு அஸ்கிரிய உள்ளிட்ட நான்கு பீடங்களினதும் மகாநாயக்க தேரர்கள் ஜனாதிபதியிடம் கோரிக்கை விடுத்திருந்தனர். இதற்கப்பால் மேலும் சில பெளத்த அமைப்புகளும் தனி நபர்களும் தேரரை விடுவிப்பதற்கான கோரிக்கைகளை முன்வைத்திருந்தனர்.
இருப்பினும் ஞானசார தேரருக்கு எதிராக வழக்குத் தாக்கல் செய்தவர்களின் சம்மதம் இன்றி தன்னால் தேரரை விடுவிப்பதற்கு நடவடிக்கை எடுக்க முடியாது என ஜனாதிபதி தரப்பில் கூறியுள்ளதாக தெரிய வருகிறது. இந்நிலையில் தேரருக்கு எதிராக வழக்குத் தாக்கல் செய்த முஸ்லிம் அரசியல்வாதிகளின் சம்மதத்தினைப் பெற்றுத் தருமாறு அகில இலங்கை ஜம்இய்யதுல் உலமாவுக்கு பெளத்த அமைப்புகள் அழுத்தங்களை வழங்கத் தொடங்கியுள்ளன. இதன்பொருட்டு நேரில் சந்தித்து பேச்சுவார்த்தை நடத்த குறித்த பெளத்த அமைப்புகள் வேண்டுகோள் விடுத்துள்ளதாகவும் அதற்கு உலமா சபை நேரம் வழங்கவில்லை என்றும் அறிய முடிகின்றது.
இந் நிலையில்தான் இந்த விவகாரம் தொடர்பில் முஸ்லிம் சமூகத்தின் நிலைப்பாட்டை எடுப்பதற்கான கூட்டம் ஒன்று நேற்று முன்தினம் கொழும்பில் நடைபெற்றபோது தேரரை விடுவிப்பதற்கு தாம் சிபாரிசு செய்வதில்லை என அகில இலங்கை ஜம்இய்யதுல் உலமா தலைமையிலான முஸ்லிம் அமைப்புகள் தீர்மானித்துள்ளன.
இக் கூட்டத்தின்போது சிறைத்தண்டனை அனுபவித்து வரும் ஞானசார தேரருக்கு ஜனாதிபதி மூலம் பொது மன்னிப்புப் பெற்றுக் கொடுப்பதற்கான சிபாரிசுக் கடிதத்தை வழங்குமாறு பெளத்த அமைப்புகள் விடுத்துள்ள வேண்டுகோள் குறித்து விரிவாக ஆராயப்பட்டுள்ளது. இந்த வேண்டுகோளின் சாதக பாதகங்கள் மற்றும் இது விடயத்தில் முஸ்லிம் சமூகம் தலையிடுவதில் உள்ள அபாயங்கள் குறித்து இக் கூட்டத்தில் கலந்து கொண்டவர்கள் தமது கருத்துக்களை முன்வைத்துள்ளனர்.
இந்நிலையிலேயே இது விடயத்தில் முஸ்லிம் சமூகம் எந்தவொரு நிலைப்பாட்டையும் முன்வைப்பதில்லை என்றும் கோரப்பட்ட சிபாரிசுக் கடிதத்தை வழங்குவதில்லை என்றும் ஏகமனதாக தீர்மானிக்கப்பட்டுள்ளது.
ஞானசார தேரர் ஏற்கனவே நீதிமன்ற அவமதிப்பு குற்றச்சாட்டில் சிறைத்தண்டனை அனுபவித்த நிலையில் முன்னாள் ஜனாதிபதி மைத்திரிபால சிறிசேனவினால் பொது மன்னிப்பு வழங்கி விடுதலை செய்யப்பட்டிருந்தார். எனினும் இஸ்லாத்தையும் முஸ்லிம்களையும் அவமதித்தமை தொடர்பில் முன்னாள் மேல் மாகாண ஆளுநர் அசாத் சாலி, பாராளுமன்ற உறுப்பினர் முஜிபுர் ரஹ்மான் மற்றும் பாராளுமன்ற உறுப்பினர் ரிஷாத் பதியுதீன் ஆகியோர் பொலிஸில் செய்த முறைப்பாட்டுக்கு அமைய இடம்பெற்ற விசாரணைகளை மையப்படுத்தி, மேல் நீதிமன்றில் ஞானசார தேரருக்கு எதிராக சட்ட மா அதிபரால் குற்றப் பத்திரிகை தாக்கல் செய்யப்பட்டது. இது தொடர்பான விசாரணைகளின் முடிவிலேயே நீதிபதி ஆதித்ய பட்டபெந்திகே சிறைத்தண்டனை வழங்கி தீர்ப்பளித்தார்.
தேரருக்கு மன்னிப்பளிக்கும் விடயத்தில் முஸ்லிம் சமூகம் தலையிட வேண்டிய அவசியமில்லை என்பதே பலரதும் ஏகோபித்த நிலைப்பாடாகும். முறைப்பாடு செய்தவர்கள் முஸ்லிம் சமூகத்தைச் சேர்ந்தவர்கள் என்ற போதிலும் இந்த நாட்டில் சுயாதீனமாக இயங்கும் நீதிமன்றமே இத்தண்டனையை வழங்கியது. அந்த வகையில் தேரருக்கு மன்னிப்பளிக்க வேண்டிய அவசியம் முஸ்லிம் சமூகத்திற்கு கிடையாது. இது தொடர்பில் ஜனாதிபதியே தீர்மானிக்க முடியும். இது பற்றித் தீர்மானிப்பதற்கான அதிகாரம் தனக்கிருந்தும் முஸ்லிம் சமூகத்தின் சம்மதத்தைப் பெற்று வருமாறு ஜனாதிபதி கோரியிருப்பாராயின் அதன் பின்னணி என்னவாகவிருக்கும் என்பதை எம்மால் அனுமானிக்க முடியும். எனவேதான் இந்த அரசியல் சதி வலையில் முஸ்லிம் சமூகம் சிக்காது சமயோசிதமாக நடந்து கொள்வதே சிறந்ததாகும்.- Vidivelli