புனித ஹஜ் யாத்திரைக்காக 2 மில்லியன் பேர் சவூதியில்
வெப்பநிலை அதிகரிப்பு ; பாதுகாப்பான யாத்திரைக்கான சகல ஏற்பாடுகளும் பூர்த்தி
இம்முறை புனித ஹஜ் யாத்திரையை மேற்கொள்வதற்காக நேற்று வரை சுமார் 2 மில்லியன் யாத்திரிகர்கள் மக்கா நகரை வந்தடைந்துள்ளனர். திங்கட்கிழமை வரை 1.5 மில்லியன் வெளிநாட்டு யாத்திரிகர்கள் சவூதியை வந்தடைந்துள்ளதாக சவூதி கடவுச்சீட்டு அலுவலகம் தெரிவித்துள்ளது.
திங்கட்கிழமை வரை 1,547,295 பேர் ஆகாயம், கடல் மற்றும் தரை மார்க்கமாக சவூதியை வந்தடைந்துள்ளனர். இதற்கப்பால் மேலும் பல இலட்சம் யாத்திரிகர்கள் சவூதி அரேபியாவின் பல்வேறு நகரங்களிலிருந்தும் யாத்திரைக்காக வருகை தந்த வண்ணமுள்ளனர்.
சென்ற வருடம் 1.8 மில்லியன் பேர் ஹஜ் கடமையை நிறைவேற்றியிருந்த நிலையில் இவ்வருடம் இந்த எண்ணிக்கை 2 மில்லியனைத் தாண்டும் என எதிர்பார்க்கப்படுகிறது.
இவ்வருட ஹஜ் யாத்திரை ஜூன் 14 ஆம் திகதி ஆரம்பமாகிறது. மக்காவை வந்தடைந்துள்ள யாத்திரிகர்கள் அனைவரும் எதிர்வரும் வெள்ளிக்கிழமை மினாவை வந்தடைவர். மறுதினம் அறபாவில் தரித்திருப்பதுடன் ஹஜ் யாத்திரையின் பிரதான அம்சங்களை நிறைவு செய்வர்.
இம்முறை ஹஜ் யாத்திரை காலத்தில் வெப்பநிலை 48 செல்சியஸாக அதிகரிக்கும் என்பதால் யாத்திரிகர்களை வெப்பத்தில் இருந்து பாதுகாப்பதற்கான முன்னேற்பாடுகளும் மேற்கொள்ளப்பட்டுள்ளன.
மேலும் யாத்திரிகர்கள் ஒன்றுகூடும் இடங்களில் பாதுகாப்பும் பலப்படுத்தப்பட்டுள்ளது. யாத்திரையின் அமைதியை சீர்குலைக்கும் வகையில் செயற்படும் எவருக்கு எதிராகவும் மிகக் கடுமையான நடவடிக்கை எடுக்கப்படும் என ஜ் பாதுகாப்புக் குழுவின் தலைவரும் பொது மக்கள் பாதுகாப்பு துறையின் பணிப்பாளருமான லெப்டினன்ட் ஜெனரல் முஹம்மத் அல் பஸ்ஸாமி தெரிவித்துள்ளார். அல்லர்வின் விருந்தினர்களான யாத்திரிகர்களினதும் புனித தலங்களினதும் பாதுகாப்பை உறுதிப்படுத்த தேவையான அனைத்து ஏற்பாடுகளும் செய்யப்பட்டுள்ளதாகவும் பாதுகாப்புக்கு அச்சுறுத்தல்களை ஏற்படுத்துவோர் கடுமையாக தண்டிக்கப்படுவர் என்றும் அவர் மேலும் தெரிவித்துள்ளார்.– Vidivelli