எம்.ஐ.அப்துல் நஸார்
கடந்த ஞாயிற்றுக்கிழமை இஸ்ரேலிய வான்வழித் தாக்குதல்களில் குறைந்தது 45 பேர் கொல்லப்பட்டதோடு தெற்கு காஸா நகரமான ரபாவில் இடம்பெயர்ந்த மக்கள் தங்கியிருந்த கூடாரங்கள் மீதும் தாக்குதல் மேற்காள்ளப்பட்டுள்ளது எனவும், “ஏராளமானோர்” எரியும் கட்டட இடிபாடுகளுக்குள் சிக்கியுள்ளனர் என பலஸ்தீன சுகாதார ஊழியர்கள் தெரிவித்துள்ளனர். இறந்தவர்கள் மற்றும் காயமடைந்தவர்களுள் பெரும்பாலானவர்கள் பெண்கள் மற்றும் சிறுவர்களாவர் என காஸாவின் சுகாதார அமைச்சு தெரிவித்துள்ளது.
இந்த மாத ஆரம்பத்தில் இஸ்ரேலின் ஊடுருவலுக்கு முன்னர் காஸாவின் மக்களில் அரைவாசிக்கும் மேற்பட்டவர்கள் தஞ்சமடைந்திருந்த ரபாவில் இஸ்ரேலிய இராணுவத் தாக்குதல்களை நிறுத்துமாறு சர்வதேச நீதிமன்றம் உத்தரவிட்டு இரண்டு நாட்களுக்குப் பின்னர் இத் தாக்குதல்கள் நடத்தப்பட்டுள்ளன. பல்லாயிரக் கணக்கான மக்கள் அப்பகுதியில் உள்ளனர், பலர் வெளியேறியுள்ளனர்.
மிகப்பெரிய வான்வழித் தாக்குதல் நடந்த இடத்திலிருந்து எடுக்கப்பட்ட ஒளிப்பதிவு காட்சிகள் பாரிய அழிவைக் காட்டின. இஸ்ரேலின் இராணுவம் இந்த தாக்குதலை உறுதிப்படுத்தியதுடன், ஹமாஸ் அமைப்பின் மீது தாக்குதல் நடத்தியதாகவும், இரண்டு சிரேஷ்ட ஹமாஸ் போராளிகளை கொல்லப்பட்டுள்ளதாகவும், பொதுமக்கள் பாதிக்கப்பட்டதாக வெளியான தகவல் குறித்து விசாரணை நடத்தி வருவதாகவும் அது கூறியுள்ளது. பாதுகாப்பு அமைச்சர் Yoav Gallant ஞாயிற்றுக்கிழமை ரபாவில் இருந்தார், அங்குள்ள “நடவடிக்கைகளை விரிவுபடுத்துவது” தொடர்பில் விளக்கப்பட்டதாக அவரது அலுவலகம் தெரிவித்துள்ளது.
ஐக்கிய நாடுகளின் பலஸ்தீன அகதிகள் அமைப்பு, UNRWA, திங்கட்கிழமையன்று காஸா பகுதியின் தெற்கு முனையில் உள்ள ரபாவில் தஞ்சம் புகுந்த குடும்பங்கள் மீதான தாக்குதல்கள் பற்றிய தகவல்கள் “திகிலூட்டுவதாகத்” தெரிவித்துள்ளது.
“புகலிடம் தேடும் குடும்பங்கள் மீதான தொடர் தாக்குதல்கள் பற்றி ரபாவிலிருந்து வெளிவரும் தகவல்கள் திகிலூட்டுகின்றன” என UNRWA X தளத்தில் குறிப்பிட்டுள்ளது.
“தாக்குதல்கள் காரணமாக குழந்தைகள் மற்றும் பெண்கள் உட்பட பாரிய உயிரிழப்புகள் ஏற்பட்டுள்ளதாக தகவல்கள் தெரிவிக்கின்றன. காஸா பூமியின் நரகம். நேற்றிரவு எடுக்கப்பட்ட படங்கள் அதற்கு மற்றுமொரு சான்றாகும்.” எனவும் தெரிவித்துள்ளது.
இஸ்ரேலிய வான்வழித் தாக்குதல்களில் குறைந்தது 35 பலஸ்தீனர்கள் கொல்லப்பட்டனர் எனவும் இடம்பெயர்ந்தவர்களுக்கு தங்குவதற்காக ஒதுக்கப்பட்ட தெற்கு காஸா பகுதி நகரமான ரபாவில் ஒரு பகுதியில் டசின் கணக்கானவர்கள் காயமடைந்ததாக பலஸ்தீன சுகாதார மற்றும் சிவில் அவசர சேவை அதிகாரிகள் கடந்த ஞாயிற்றுக்கிழமை தெரிவித்தனர்.
தமது விமானப்படை ரபாவில் உள்ள ஹமாஸ் வளாகத்தை தாக்கியதாகவும், சம்பவம் பரிசீலனையில் இருப்பதாகவும் தெரிவித்தது.
நகர மையத்திலிருந்து வடமேற்கே இரண்டு கிலோமீட்டர் (1.2 மைல்) தொலைவில் உள்ள ரபாவின் தால் அல்-சுல்தான் சுற்றுப்புறத்தில் தேடுதல் மற்றும் மீட்பு பணிகள் தொடர்வதால் இறப்புக்களின் எண்ணிக்கை உயரக்கூடும் என பலஸ்தீன செம்பிறைச் சங்கத்தின் ஊடகப் பேச்சாளர் தெரிவித்தார்.
குறித்த இடம் இஸ்ரேலால் “மனிதாபிமான பகுதி” என குறிப்பிடப்பட்டதாக பலஸ்தீன செம்பிறைச் சங்கம் வலியுறுத்தியது. இந்த மாத ஆரம்பத்தில் இஸ்ரேலின் இராணுவம் வெளியேற்றத்திற்கு உத்தரவிட்ட பகுதிகளில் அயல் பகுதிகள் சேர்க்கப்படவில்லை.
ஏழு மாதங்களுக்கும் மேலாக இஸ்ரேலின் பாரிய வான், கடல் மற்றும் தரைவழித் தாக்குதலுக்குத் தாக்குப்பிடிக்கும் திறனை வெளிப்படுத்தும் விதமாக காஸாவில் இருந்து ஹமாஸ் ரொக்கெட்டுகளை சரமாரியாக ஏவியதைத் தொடர்ந்து டெல் அவிவ் வரை வான்வழித் தாக்குதல் சைரன்கள் ஒலிக்கவிடப்பட்டதோடு சில மணிநேரங்களுக்குப் பின்னர் இத் தாக்குதல் நடத்தப்பட்டுள்ளது.
ஜனவரி மாதத்திற்குப் பின்னர் காஸாவிலிருந்து நடந்த முதலாவது நீண்ட தூர ரொக்கெட் தாக்குதலில் உயிரிழப்புகள் எதுவும் ஏற்படவில்லை. இத் தாக்குதலை ஹமாஸின் இராணுவப் பிரிவு பொறுப்பேற்றுள்ளது. ரபாவிலிருந்து ஏவப்பட்ட பின்னர் எட்டு எறிகணைகள் இஸ்ரேலுக்குள் ஊடுருவிச் சென்றதாகவும், ‘குறிப்பிட்ட எண்ணிக்கையான’ ஏவுகணைகள் இடைமறித்து, அழிக்கப்பட்டதாகவும் இஸ்ரேலின் இராணுவம் தெரிவித்தது.
இந்த மாத தொடக்கத்தில் இஸ்ரேலியப் படைகள் பலஸ்தீனப் பகுதி ரபா எல்லைக் கடவையை கைப்பற்றிய பின்னர், எகிப்துடனான குறித்த எல்லைக் கடவையினைத் தவிர்ப்பதற்கான புதிய ஒப்பந்தத்தின் கீழ் கடந்த ஞாயிற்றுக்கிழமை தெற்கு இஸ்ரேலில் இருந்து டசின் கணக்கான உதவி பாரஊர்திகள் காஸாவிற்குள் நுழைந்தன. 126 உதவி பாரஊர்திகள் அருகிலுள்ள கெரெம் ஷாலோம் எல்லைக் கடவை வழியாக நுழைந்ததாக இஸ்ரேல் இராணுவம் தெரிவித்தது.
ஆனால் மனிதாபிமான குழுக்கள் சண்டையின் காரணமாக மருத்துவ பொருட்கள் உட்பட உதவிகளை கையேற்க முடியுமா என்பது உடனடியாகத் தெரியவில்லை. ரபாவில் இஸ்ரேலின் தாக்குதல்கள் காரணமாக இந்த கடவை ஊடாக போக்குவரத்தினை மேற்கொள்வது பெரும்பாலும் சாத்தியமில்லை. பொதுவாக உதவியைப் பெறுவது மிகவும் ஆபத்தானது என ஐக்கிய நாடுகள் சபையின் முகவரகங்கள் கூறுகின்றன. உலக சுகாதார அமைப்பு கடந்த வாரம் ரபாவில் விரிவாக்கப்பட்ட இஸ்ரேலிய ஊடுருவல் ‘பேரழிவு’ நிலையினை ஏற்படுத்தும் என தெரிவித்திருந்தது.
‘மனிதாபிமான நடவடிக்கைகள் சரிவை நெருங்கியுள்ள நிலையில், கெரெம் ஷாலோமிற்குள் நுழையும் மனிதாபிமான பொருட்களை எகிப்தில் இருந்து பாதுகாப்பாக எடுத்துச் செல்லவும், வழங்கவும் இஸ்ரேலிய அதிகாரிகள் உதவ வேண்டும்’ என ஐ.நா. தலைவர் அன்டோனியோ குட்டரெஸின் ஊடகப் பேச்சாளர் அறிக்கையொன்றில் தெரிவித்துள்ளார்.
காஸா பகுதியின் கட்டுப்பாட்டை பலஸ்தீனியர்களிடம் ஒப்படைக்கும் வரை ரபா எல்லைக் கடவையின் தனது பக்கத்தை மீண்டும் திறக்க எகிப்து மறுப்புத் தெரிவித்துள்ளது. அமெரிக்க ஜனாதிபதி ஜோ பைடனுக்கும் எகிப்திய ஜனாதிபதி அப்தெல் பத்தாஹ் எல்-சிசிக்கும் இடையிலான தொலைபேசி உரையாடலுக்குப் பின்னர், காஸாவின் முக்கிய சரக்கு முனையமான கெரெம் ஷாலோம் வழியாக போக்குவரத்தை தற்காலிகமாக திசை திருப்ப ஒப்புக்கொண்டது.
எகிப்து திங்களன்று ‘இடம்பெயர்ந்த மக்கள் மீது இஸ்ரேலிய படைகள் மேற்கொண்ட திட்டமிட்ட குண்டுவீச்சு தாக்குதல்’ என எகிப்து இஸ்ரேலிய தாக்குதலைக் கண்டித்துள்ளது. ரபாவில் கூடாரங்கள் இருந்த குறைந்தது 45 பேர் கொல்லப்பட்டதாக காஸாவின் சிவில் பாதுகாப்பு நிறுவனம் தெரிவித்துள்ளது.
‘ரபாவில் இராணுவ நடவடிக்கைகளை உடனடியாக நிறுத்துவது தொடர்பாக சர்வதேச நீதிமன்றம் (ICJ) உத்தரவிட்டுள்ள நடவடிக்கைகளை செயல்படுத்த’ எகிப்திய வெளிவிவகார அமைச்சு அறிக்கையொன்றை வெளியிட்டு இஸ்ரேலுக்கு கோரிக்கை விடுத்துள்ளது.
இஸ்ரேலுக்கும் ஹமாஸுக்கும் இடையிலான போரில் கிட்டத்தட்ட 36,000 பலஸ்தீனர்கள் கொல்லப்பட்டுள்ளனர், காஸாவின் சுகாதார அமைச்சின் கூற்றுப்படி, அதன் எண்ணிக்கையில் பொதுமக்களுக்கும் போராளிகளுக்கும் இடையில் வேறுபாடு குறித்துக் காட்டப்படவில்லை. போராளிகள் மக்கள் நிறைந்த குடியிருப்பு பகுதிகளில் செயல்படுவதால், ஹமாஸ் அமைப்பினர் மீது தாக்குதல் நடத்தும்போது பொதுமக்கள் உயிரிழப்பதாக இஸ்ரேல் தெரிவித்துள்ளது.
காஸாவின் 2.3 மில்லியன் மக்களில் 80 சதவீதம் பேர் தங்கள் வீடுகளை விட்டு வெளியேறியுள்ளனர். கடுமையான பட்டினி பரவலாக காணப்படுவதோடு பிரதேசத்தின் சில பகுதிகள் பஞ்சத்தை அனுபவித்து வருவதாக ஐ.நா அதிகாரிகள் தெரிவிக்கின்றனர்.
ஹமாஸ் கடந்த வருடம் அக்டோபர் 7 ஆம் திகதின்று இஸ்ரேல் மீது தாக்குதல் நடத்தியது. இதன்போது பலஸ்தீன போராளிகள் சுமார் 1,200 பேரைக் கொன்றனர், பெரும்பாலும் பொதுமக்கள், மேலும் 250 பேரை பணயக்கைதிகளாகப் பிடித்துச் சென்றனர். ஹமாஸ் தொடர்ந்தும் 100 பணயக்கைதிகளை வைத்திருக்கிறது மற்றும் 30 பேர் கடந்த ஆண்டு போர் நிறுத்தத்தின் போது விடுவிக்கப்பட்டனர்.
ஹமாஸின் எஞ்சியிருக்கும் படைப்பிரிவுகளை அகற்றவும், காஸாவின் ஏனைய பகுதிகளில் மீதமாகவுள்ள போராளிகள் மீது ‘முழு வெற்றியை’ அடையவும் இஸ்ரேல் ரபாவைக் கைப்பற்ற வேண்டும் என இஸ்ரேல் பிரதமர் பெஞ்சமின் நெதன்யாகு தெரிவித்திருந்தார்.
இஸ்ரேல் ஆக்கிரமித்துள்ள மேற்குக் கரையிலும் இந்தப் போர் பதற்றத்தை அதிகரித்துள்ளது. மேற்குக் கரையின் தெற்கு நகரமான சயீர் அருகே 14 வயது சிறுவனை இஸ்ரேலியப் படைகள் சுட்டுக் கொன்றதாக பலஸ்தீன அதிகாரிகள் ஞாயிற்றுக்கிழமை தெரிவித்தனர். பெய்ட் எயினுன் சந்தியில் இஸ்ரேலியப் படைகளை கத்தியால் குத்த முயன்ற பலஸ்தீன ஆண் சுட்டுக் கொல்லப்பட்டதாக இஸ்ரேல் இராணுவம் தெரிவித்துள்ளது.
தெற்கு காஸா பெரும்பாலும்
உதவியிலிருந்து துண்டிக்கப்பட்டுள்ளது
மே 6 அன்று இஸ்ரேல் ரபாவில் மட்டுப்படுத்தப்பட்ட ஊடுருவல் என்ற போர்வையில் மேற்கொண்ட தாக்குதல்கள் காரணமாக தெற்கு காஸா உதவியிலிருந்து பெரிதும் துண்டிக்கப்பட்டுள்ளது. அதன் பின்னர் 1 மில்லியனுக்கும் அதிகமான பலஸ்தீனியர்கள், ஏற்கனவே இடம்பெயர்ந்த பலர், நகரத்தை விட்டு வெளியேறியுள்ளனர்.
ஏப்ரலில் இஸ்ரேலிய தாக்குதல்கள் காரணமாக ஏழு உதவிப் பணியாளர்கள் கொல்லப்பட்டதையடுத்து, உலகளாவிய சீற்றத்தின் காரணமாக இஸ்ரேல் திறந்துவிட்ட இரண்டு தரைவழிப் பாதைகள் மூலம் வடக்கு காஸா உதவிகளைப் பெறுகிறது.
அமெரிக்காவினால் கட்டமைக்கப்பட்ட மிதக்கும் பாதை வழியாக, ஒரு சில டசின் உதவி வாகனங்கள் தினமும் காஸாவிற்குள் நுழைகின்றன, இது அதிகாரிகள் எதிர்பார்த்த ஒரு நாளுக்கான 600 வாகனங்கள் என குறிப்பிடப்பட்டிருப்பினும் மிகக் குறைவான 150 வாகனங்களே வருவதாக உதவிக் குழுக்கள் கூறுகின்றன.
கிளர்ச்சி அச்சுறுத்தல் காரணமாக இஸ்ரேலிய நபர் கைது செய்யப்பட்டார்
சிப்பாய் போல் உடையணிந்த ஒருவர் கலகத்தை ஏற்படுத்தும் விதமாக அச்சுறுத்தும் காணொளியை பரவவிட்ட சந்தேக நபரை ஒருவரை தடுத்து வைத்துள்ளதாக இஸ்ரேல் இராணுவம் தெரிவித்துள்ளது. போருக்குப் பிறகு பலஸ்தீனர்கள் காஸாவை ஆள வேண்டும் என்ற பாதுகாப்பு அமைச்சரின் ஆலோசனையினை பல்லாயிரக்கணக்கான வீரர்கள் மறுத்துரைக்க தயாராக இருப்பதாகவும், நெதன்யாகுவுக்கு மட்டும் விசுவாசமாக இருப்பதாகவும் அவர் கூறுகின்றார்.
இஸ்ரேலிய இராணுவத்தின் ஊடகப் பேச்சாளர் ரியர் அட்ம் டேனியல் ஹகாரி, அந்த நபர் பணியில் இருந்து நீக்கப்பட்டுள்ளார். இந்த வீடியோ எப்போது, எங்கு எடுக்கப்பட்டது என்பது தெளிவாகத் தெரியவில்லை. பிரதமரின் அலுவலகம் அனைத்து வகையான இராணுவ கீழ்ப்படியாமையையும் கண்டித்து ஒரு சுருக்கமான அறிக்கையை வெளியிட்டது.– Vidivelli