சிறுநீரக சத்திர சிகிச்சையின் போதான சிறுவன் ஹம்தியின் மரணம் : விசாரணை சி.ஐ.டி. சிறப்பு பிரிவினரிடம்
சத்திர சிகிச்சை செய்த வைத்தியர் நவீன் அவுஸ்திரேலியாவிலிருந்து வீடியோ காணொளியில் வாக்கு மூலம் வழங்க கோரிக்கை
(எப்.அய்னா)
கொழும்பு லேடி ரிஜ்வே சிறுவர் வைத்தியசாலையில் சிறுநீரக சத்திர சிகிச்சையின் போது சந்தேகத்துக்கிடமாக உயிரிழந்த 3 வயது சிறுவன் ஹம்தி பஸ்லியின் மரணம் தொடர்பிலான பூரண விசாரணைகள், சி.ஐ.டி. பிரதிப் பொலிஸ் மா அதிபரின் கீழ் செயற்படும் சிறப்புப் பிரிவிடம் கையளிக்கப்பட்டுள்ளது.
அதன்படி இதுவரை பொரளை பொலிஸார் முன்னெடுத்த விசாரணைகள், தற்போது சி.ஐ.டி. பிரதிப் பொலிஸ் மாஅதிபரின் கீழ் செயற்படும் கிருலப்பனையில் அமைந்துள்ள படுகொலை, திட்டமிடப்பட்ட குற்றங்கள் மற்றும் கொலை தொடர்பில் விசாரணை செய்யும் சிறப்புப் பிரிவின் (Homicide & Organized Crime Investigation and Murder) பணிப்பாளர் சிரேஷ்ட பொலிஸ் அத்தியட்சர் ஆர்.ஏ.டி.ஈ.எல். ரந்தெனியவின் நேரடி கட்டுப்பாட்டில் முன்னெடுக்கப்பட்டுள்ளது. அதன்படி சிறுவன் ஹம்தியின் பெற்றோரிடம் வாக்கு மூலம் பெற்றுள்ள குறித்த சிறப்பு விசாரணையாளர்கள், லேடி ரிஜ்வே வைத்தியசாலை பணிப்பாளர், ஏனைய வைத்தியர்களை விசாரணை செய்யவும், ஆவணங்களைப் பெற்றுக்கொள்ளவும் நடவடிக்கை எடுத்துள்ளனர்.
இதுவரை குறித்த சிறுவனின் சத்திர சிகிச்சையுடன் தொடர்புபட்ட அனைத்து மூல ஆவணங்களும் விசாரணையாளர்களின் கைகளுக்கு கிடைக்காத நிலையில், அவற்றைப் பெற்று மேலதிக விசாரணைகளை முன்னெடுக்க நடவடிக்கை எடுக்கப்பட்டுள்ளதாக நேற்று (15) சிறப்பு விசாரணைப் பிரிவினர் நீதிமன்றுக்கு அறிவித்துள்ளனர்.
கொட்டாஞ்சேனையை சேர்ந்த 3 வயது சிறுவன் ஹம்தி பஸ்லி சிறுநீரக சத்திரசிகிச்சையின் பின் கடந்த 2023 ஜூலை 28 ஆம் திகதி உயிரிழந்திருந்தார். சத்திரசிகிச்சையின் பின்னரான தொற்று பரவல் மரணத்துக்கு காரணம் என லேடி ரிஜ்வே வைத்தியசாலை பணிப்பாளர் அப்போது குறிப்பிட்ட நிலையில், பாரிய மருத்துவ தவறொன்று அல்லது மனித உறுப்பு வர்த்தக நடவடிக்கை ஒன்று ஹம்தியின் மரணத்தின் பின்னணியில் இருக்கலாம் என சிறுவனின் குடும்பத்தார் சார்பில் குற்றம் சுமத்தப்பட்டது. இதனையடுத்து இது தொடர்பில் பொரளை பொலிசார், கொழும்பு 2 ஆம் இலக்க நீதிவான் நீதிமன்றில் நீதிவான் ரஜீந்ரா ஜயசூரிய முன்னிலையில் அறிக்கை சமர்ப்பித்து விசாரணைகளை ஆரம்பித்தனர்.
இந்த விசாரணையே சிறப்பு பிரிவுக்கு மாற்றப்பட்டுள்ளது. இதனிடையே சத்திர சிகிச்சையை மேற்கொண்ட வைத்தியர் நவீன் விஜேகோன் அவுஸ்திரேலியாவுக்கு சென்ற நிலையில் இவ்விசாரணைகள் மேலும் மந்தமடைந்தன.
அதன்படி இது குறித்த வழக்கு நேற்றும் விசாரணைக்கு வந்தது. இதன்போது பாதிக்கப்பட்ட தரப்பான ஹம்தியின் குடும்பத்தார் சார்பில் சட்டத்தரணி வைத்தியர் யூசுப் ஆஜரானார். சிறப்பு விசாரணைப் பிரிவின் அதிகாரிகளும் மன்றில் ஆஜரான நிலையில், அவுஸ்திரேலியாவில் உள்ள வைத்தியர் நவீன் விஜேகோனுக்காக ஜனாதிபதி சட்டத்தரணி சாலிய பீரிஸ் பிரசன்னமானார்.
இதன்போது மன்றில் விஷேட விடயம் ஒன்றினை முன் வைத்த ஜனாதிபதி சட்டத்தரணி சாலிய பீரிஸ், தனது சேவை பெறுநர் உரிய முறையில் உரிய அனுமதியுடனேயே அவுஸ்திரேலியா சென்றதாகவும், விசாரணைக்கு ஒத்துழைப்பு வழங்க தனது சேவை பெறுநர் தயார் எனவும், அதனால் வீடியோ காணொளி ஊடாக சாட்சியம் அல்லது வாக்கு மூலம் வழங்க அனுமதிக்க வேண்டும் எனவும் அவர் கோரினார்.
எனினும் அதற்கு பாதிக்கப்பட்ட தரப்பு சட்டத்தரணி வைத்தியர் யூசுப் ஆட்சேபனை முன் வைத்தார். வைத்திய நிபுணர் மலிக் சமரசிங்கவின் வாக்கு மூலம் மற்றும் ஏனைய சாட்சிகள் பிரகாரம் வைத்தியர் நவீன் விஜேகோன் மீது பிரதான சந்தேகம் இவ்விவகாரத்தில் எழுகின்றது. அவ்வாறிருக்கையில் அவரை சந்தேக நபராக கருதி செயற்பட்டு அவரை நாட்டுக்கு அழைக்காது, விஷேட வரப்பிரசாதம் வழங்க சட்டத்தில் இடமுள்ளதா? என வைத்தியர் யூசுப் கேள்வி எழுப்பினார்.
இதன்போது நீதிமன்றுக்கு விசாரணைகள் தொடர்பில் அறிக்கையிட்ட சிறப்பு விசாரணைப் பிரிவு, விசாரணைகள் ஆரம்பிக்கப்பட்டுள்ள நிலையில், அனைத்து மூல ஆவணங்களையும் பரீட்சித்த பின்னர் மேலதிக சாட்சியங்களின் பின்னர் அடுத்த கட்டம் தொடர்பில் தீர்மானிக்கப்படும் என குறிப்பிட்டனர்.
இதனையடுத்து இது தொடர்பிலான வழக்கு விசாரணைகள் எதிர்வரும் ஜூலை 3 ஆம் திகதிக்கு ஒத்திவைக்கப்பட்டது. – Vidivelli