ஜனாஸாக்களை எரித்தமைக்காக அரசு மன்னிப்புக் கோர வேண்டும்
ஆய்வுடன் கூடிய அமைச்சரவைப் பத்திரத்தை விரைவில் சமர்ப்பிப்பேன் என்கிறார் அமைச்சர் ஜீவன்
(எம்.வை.எம்.சியாம்)
இஸ்லாமிய சமூகத்துக்கு கடந்த அரசாங்கம் இழைத்தது தவறு என்பதை ஏற்றுக் கொள்கிறேன். அதற்காக இஸ்லாமிய சமூகத்திடம் ஓர் அமைச்சர் என்ற ரீதியில் மன்னிப்பு கோருகிறேன். கட்டாயத் தகனக் கொள்கையினால் இஸ்லாமிய சமூகத்துக்கு ஏற்பட்ட பாதிப்புகள் மற்றும் காயங்களுக்கு அரசாங்கம் முறையாக மன்னிப்புக் கோர வேண்டும். இதற்காக ஆய்வின் முடிவுகளுடன் கூடிய அமைச்சரவைப் பத்திரத்தை விரைவில் சமர்ப்பிக்கவுள்ளேன் என நீர் வழங்கல் மற்றும் தோட்ட உட்கட்டமைப்பு அபிவிருத்தி அமைச்சர் ஜீவன் தொண்டமான் தெரிவித்துள்ளார்.
நேற்று முன்தினம்(02) ஹட்டனில் நடைபெற்ற இப்தார் நிகழ்வில் கலந்துகொண்டு உரையாற்றுகையிலேயே அவர் இதனைத் தெரிவித்தார்.
கடந்த வருடம் ஜனவரி மாதமே நான் நீர்வழங்கல் அமைச்சைப் பொறுப்பேற்றிருந்தேன். எனினும் கடந்த காலங்களில் யார் இந்த அமைச்சுப் பதவியை வகித்த போதிலும் தற்போதைய அமைச்சர் என்ற வகையில் நீர் ஊடாக கொவிட் வைரஸ் பரவாது என்ற உண்மையை ஏற்றுக் கொள்ள வேண்டியது தனது பொறுப்பு என்றும் அவர் சுட்டிக்காட்டினார்.
இது தொடர்பில் அவர் மேலும் தெரிவித்துள்ளதாவது, கொவிட் 19 வைரஸ் தொற்றினால் உயிரிழந்தவர்களின் ஜனாசாக்கள் புதைக்கப்படுவதால் நிலத்தடி நீர் உள்ளிட்ட நில வளங்கள் பாதிக்கப்படும் என தெரிவித்து கட்டாய தகனக்கொள்கையை முன்னாள் ஜனாதிபதி கோட்டாபய ராஜபக்ஷ நடைமுறைப்படுத்தியிருந்தார்.
இந்த கூற்றை உலக சுகாதார ஸ்தாபனம் உள்ளிட்ட பல அறிவியல் சார்ந்த அமைப்புக்கள் ஏற்க மறுத்த போதிலும் இந்த கொள்கை நடைமுறைப்படுத்தப்பட்டது. இது இஸ்லாமியர்கள் மத்தியில் மிகப்பெரிய தாக்கத்தை ஏற்படுத்தியிருந்தது.
இந்நிலையில் நீர் வழங்கல் அமைச்சராக நான் பதவியேற்ற பின்னர் இது தொடர்பில் ஆய்வொன்றை மேற்கொள்ள முயற்சித்தேன். அதன்படி கடந்த அரசாங்கத்தின் நிலைப்பாடு சவாலுக்குட்படுத்தப்பட்டு ஸ்ரீ ஜயவர்தனபுர பல்கலைக் கழகத்தின் நிபுணர்கள் தலைமையிலான குழு மற்றும் பேராதனைப் பல்கலைக்கழகத்தின் நீர் தொழில்நுட்பத்துக்கான கூட்டு ஆராய்ச்சி மற்றும் விளக்க மையத்தின் ஊடாக இந்த ஆய்வுகள் மேற்கொள்ளப்பட்டது.
ஸ்ரீ ஜயவர்தனபுர பல்கலைக்கழகத்தின் நிபுணர்கள் தலைமையில் நீர் வழங்கல் அமைச்சின் நிதியுதவியுடன், இலங்கையின் பல்வேறு இடங்களில் மேற்பரப்பு மற்றும் கழிவுநீரில் SARS-CoV-2 வைரஸ் இருக்கிறதா என ஆய்வு செய்யப்பட்டது. ஆகஸ்ட் மற்றும் டிசம்பர் 2021 க்கு இடையில் நடத்தப்பட்ட இந்த ஆராய்ச்சியானது, நீர் மூலம் வைரஸ் பரவும் அபாயத்தை மதிப்பிடுவதை நோக்கமாகக் கொண்டது.
இதனை ஆதரிக்கும் வகையில், பேராதனைப் பல்கலைக்கழகத்தின் நீர் தொழில்நுட்பத்துக்கான கூட்டு ஆராய்ச்சி மற்றும் விளக்க மையம் ஒரு விரிவான ஆய்வை முன்னெடுத்தது. இது COVID-19-பாதிக்கப்பட்ட உடல்களை அடக்கம் செய்வதால் நிலத்தடி நீர் மாசுபாடு ஏற்படுகிறதா என ஆய்வு செய்தது. இந்த ஆய்வின் முடிவு இந்த ஆண்டு (2024) வெளியிடப்பட்டது, இந்த ஆய்வானது, தொற்றுநோய்களின் போது முறையான பாதுகாப்புடன் புதைகுழிகளில் சடலங்களை அடக்குவதால் நிலத்தடி நீருக்கு எந்த ஆபத்தும் இல்லை என்று முடிவு செய்தது. சீல் வைக்கப்பட்ட உடல் பைகளில் ஆழமாக புதைப்பது உட்பட முறையான அடக்கம் செய்யும் நடைமுறைகள், ஒருபோதும் நிலத்தடி நீரை மாசுபடுத்தாது என உறுதிப்படுத்தப்பட்டுள்ளது.
எனவே கூடிய விரைவில் கொவிட் 19 தொற்று காலத்தில் இஸ்லாமியர்களின் ஜனாசாக்கள் கட்டாய தகனக் கொள்கையின் அடிப்படையில் எரிக்கப்பட்டமைக்கு அரசாங்கம் மன்னிப்புக் கோருவதற்கான அமைச்சரவைப் பத்திரம் சமர்ப்பிக்கப்படும் என தெரிவித்தார்.- Vidivelli