இலங்கை யாத்திரிகர்கள் ஒழுக்க கட்டுப்பாட்டுடன் நடந்து கொள்வார்கள்
இலங்கை தூதுக் குழுவிடம் சவூதி ஹஜ், உம்ரா அமைச்சர் தெரிவிப்பு
(ஏ.ஆர்.ஏ.பரீல்)
‘‘இலங்கை ஹஜ் யாத்திரிகர்கள் நல்லொழுக்கம் மற்றும் நன்நடத்தையுள்ளவர்கள். இது எனக்கு மிகவும் மகிழ்ச்சியைத் தருகிறது. சவூதி அரேபியாவின் இரு புனித தலங்களிலும் தூய்மையாக சிறந்த ஒழுக்கக் கட்டுப்பாடுகளுடன் நடந்துகொள்கிறார்கள்’’ என சவூதி அரேபியாவின் ஹஜ் உம்ரா அமைச்சர் கலாநிதி தெளபீக் பின் பெளஸான் அல்ராபியா தெரிவித்தார்.
கடந்த ஞாயிற்றுக் கிழமை சவூதி அரேபியா ஜித்தாவில் இலங்கை புத்தசாசன மத மற்றும் கலாசார அலுவல்கள் அமைச்சர் விதுர விக்கிரமநாயக்கவும், சவூதி அரேபிய ஹஜ், உம்ரா அமைச்சருமான கலாநிதி தெளபீக் பின் பெளஸான் அல்ராபியாவும் இவ்வருடத்திற்கான ஹஜ் உடன்படிக்கையில் கைச்சாத்திட்டனர். அந்நிகழ்வின் போதே சவூதி அமைச்சர் மேற்கண்டவாறு தெரிவித்தார்.
இலங்கை ஹஜ் தூதுக்குழு அமைச்சர் விதுர விக்கிரமநாயக்க தலைமையில் சவூதி அரேபியாவுக்கு விஜயம் செய்திருந்தது. இத்தூதுக் குழுவில் அமைச்சருடன் முஸ்லிம் சமய, கலாசார பண்பாட்டலுவல்கள் திணைக்களத்தின் பணிப்பாளர் பைசல் ஆப்தீன், அரச ஹஜ் குழுவின் தலைவர் இப்றாஹிம் அன்சார், ஹஜ் குழு உறுப்பினர் இப்ஹாஸ் நபுஹான் மற்றும் இரு ஹஜ் முகவர்கள் சங்கங்களினதும் தலைவர்களான அப்துல் காதர் பதுர்தீன் மொஹமட் கரீம், ரிஸ்மி ரியால் ஆகியோர் அடங்கியிருந்தனர்.
மேலும் ரியாதிலுள்ள சவூதி அரேபியாவுக்கான இலங்கைத் தூதுவர் பி.எம்.ஹம்ஸா, ஜித்தாவிலுள்ள இலங்கை கொன்சல் ஜெனரல் அல் ஹப்ஸி மெளலானா என்போரும் நிகழ்வில் கலந்து கொண்டிருந்தனர்.
இதேவேளை இலங்கைக்கு சவாலான சந்தர்ப்பங்களிலும், நல்ல நேரங்களிலும் சவூதி அரேபியா எம்முடன் கைகோர்த்துள்ளது. இலங்கை எரிபொருள் பெற்றுக் கொள்வதில் சவால்களை எதிர்நோக்கிய காலத்தில் ஒத்துழைப்பு வழங்கியுள்ளது.இலங்கையர்களுக்கு தொடர்ச்சியாக பல்லாயிரக்கணக்கான தொழில்வாய்ப்புகளை வழங்கிவருகிறது என்றார்.- Vidivelli