எம்.எஸ்.எம் நூர்தீன்
மட்டக்களப்பு மாவட்டத்தில் வட கீழ் பருவப் பெயர்ச்சி மழை தொடராக பெய்து வருவதனால் மாவட்டத்திலுள்ள குளங்கள், ஆறுகளின் நீர் மட்டம் அதிகரித்துள்ளதுடன், மாவட்டத்தின் பெரும்பாலான பகுதிகள் வெள்ளத்தில் மூழ்கியுள்ளன.
இவ்வருடத்தின் முதல் தினமான ஜனவரி 01 திங்கட் கிழமை பிற்பகல் இரண்டு மணியளவில் ஆரம்பித்த மழை தொடர்ந்து பெய்த நிலையில் மறுநாள் காலை 6 மணியளவிலேயே ஓய்ந்தது. இந்த காலப்பகுதியில் மட்டக்களப்பு மாவட்டத்தில் மாத்திரம் 164.9 மில்லி மீற்றர் மழை பதிவாகியுள்ளது.
இதனால் மாவட்டத்தின் மண்முனை வடக்கு, காத்தான்குடி, கோரளைப்பற்று வடக்கு, மண்முனை தென்மேற்கு பட்டிப்பளை, போரதீவுப்பற்று வெல்லாவெளி மற்றும் எறாவூர்பற்று போன்ற பிரதேச செயலாளர் பிரிவுகளில் வெள்ள நீர் வீடுகளுக்குள் புகுந்ததுடன் பெரும்பாலான வீதிகளும் வெள்ள நீரால் நிறைந்துள்ளன.
இதேவேளை மாவட்டத்தில் காத்தான்குடி பிரதேசத்தில் தாழ் நிலப்பகுதிகள் வெள்ளத்தால் நிறைந்துள்ளதுடன் 1231 குடும்பங்களும் 4218 நபர்களும் பாதிக்கப்பட்டுள்ளனர். அவர்களில் 34 குடும்பங்களின் 109 பேர் உறவினர்களின் வீடுகளில் தங்கியுள்ளதாக மட்டக்களப்பு மாவட்ட தேசிய அனர்த்த நிவாரண சேவைகள் நிலையம் தெரிவித்துள்ளது.
அத்துடன் கிரான் புலி பாய்ந்தகல் மற்றும் கின்னயடி பிரம்படித்தீவு, ஈரலகுளம், மயிலவட்டுவான், வாகரை, கல்லரிப்பு பகுதிகளுக்குச் செல்லும் பாதை முற்றாக வெள்ளத்தில் மூழ்கியுள்ளதால் அங்கு படகு சேவைகள் இடம்பெற்று வருகின்றன.
புதிய காத்தான்குடி வடக்கு, புதிய காத்தான்குடி தெற்கு, புதிய காத்தான்குடி கிழக்கு, காத்தான்குடி ஹைராத் நகர், ரிஸ்வி நவி மற்றும் ஷுஹதா பிரதேசம் உட்பட பல தாழ் நிலப் பிரதேசங்கள் வெள்ளத்தினால் மூழ்கியுள்ளதுடன் வீடுகளுக்குள்ளும் வெள்ளம் புகுந்துள்ளது.
திங்கட்கிழமை (1) மாலை தொடக்கம் திங்கட்கிழமை இரவு முழுவதுமாக பெய்த மழையினால் இந்த வெள்ள அபாயம் ஏற்பட்டுள்ளது.
இவ்வாறு பாதிக்கப்பட்ட மக்களுக்கு பொது நிறுவனங்களும் பள்ளிவாசல்களும் சமைத்த உணவுகளை வழங்கி வருவதுடன் வீடுகளில் நிறைந்துள்ள வெள்ள நீரை வெளியேற்றுவதிலும் உதவி வருகினறன.
வெள்ளத்தினால் பாதிக்கப்பட்டு இடம்பெயர்ந்து உறவினர்கள் நண்பர்கள் வீடுகளில் தங்கியுள்ள குடும்பங்களை அடையாளப்படுத்தி பதிவு செய்யுமாறு காத்தான்குடி பிரதேச செயலாளர் உதய ஸ்ரீதர் காத்தான்குடி பிரதேச செயலாளர் பிரிவு உள்ள கிராம உத்தியோகத்தர்களுக்கு ஆலோசனை வழங்கியுள்ளார்.
காத்தான்குடி பிரதேச செயலாளர் பிரிவில் வெள்ள அனர்த்தத்தினால் இடம்பெயரும் மக்களை தேவை ஏற்படின் தற்காலிக இடங்களில் தங்க வைப்பதற்காக பொதுக் கட்டிடங்களை ஆயத்தம் செய்யுமாறு காத்தான்குடி பிரதேச செயலாளர் உதய சிறீதர் சகல கிராம உத்தியோகத்தர்களுக்கும் அறிவுறுத்தல் வழங்கியுள்ளார்.
இதேவேளை மட்டக்களப்பு மாவட்டத்தில் தொடர்ச்சியாக பெய்துவரும் அடை மழை காரணமாக வெள்ள அனர்த்தத்தினால் பாதிக்கப்பட்ட பகுதிகளை மாவட்ட அரசாங்க அதிபர் திருமதி.ஜே.ஜே.முரளீதரன் செவ்வாய்க்கிழமை நேரில் சென்று பார்வையிட்டார்.
இவ்வேளை நீரினை அகற்றுவதற்கான நடவடிக்கைகளை மாவட்ட அனர்த்த முகாமைத்துவப் பிரிவு, மட்டக்களப்பு மாநகர சபை, மண்முனைப் பற்று பிரதேச செயலகம் என்பன இணைந்து முன்னெடுத்தன.
காத்தான்குடி பிரதேச செயலகப் பிரிவில் வெள்ள அனர்த்தத்தினால் பாதிக்கப்பட்ட பிரதேசங்களை மாவட்ட அரசாங்க அதிபர் பார்வையிட்டதுடன் அவ்வாறு பாதிக்கப்பட்டு நலன்புரி நிலையங்களுக்கு வருகைதர முடியாமல் தமது வீடுகளிலே தங்கியிருக்கும் மக்களுக்கு ஹைறாத் பள்ளிவாசல் நிருவாகத்தினால் சமைத்த உணவு வழங்கப்படும் நிகழ்விலும் அரசாங்க அதிபர் திருமதி.ஜே.ஜே.முரளீதரன் கலந்து கொண்டார்.
இக்கள விஜயத்தின்போது அனர்த்த முகாமைத்துவ நிலைய அதிகாரிகள், மண்முனைப்பற்று உதவிப் பிரதேச செயலாளர் எம்.சியாஉல்ஹக், காத்தான்குடி பிரதேச செயலாளர் யூ. உதயஸ்ரீதர், கிராம சேவை உத்தியோகத்தர்கள், பிரதேச செயலக மற்றும் மட்டக்களப்பு மாநகர சபை அதிகாரிகள், மட்டக்களப்பு மாவட்ட தகவல் திணைக்கள அதிகாரி வ.ஜீவானந்தன் உள்ளிட்ட அதிகாரிகள் பலரும் கலந்துகொண்டிருந்தனர்.- Vidivelli