பலஸ்தீன் விவகாரத்தில் ஜனாதிபதி தனது நிலைப்பாட்டினை வெளியிட வேண்டும்

வெளிவிவகார அமைச்சர் அலி சப்ரி பாராளுமன்றத்தில் சுட்டிக்காட்டு

By A.R.A Fareel Last updated Dec 13, 2023

(ஏ.ஆர்.ஏ. பரீல்)

காஸாவின் வடக்கிலிருந்து தெற்கு நோக்கி நகருமாறு இஸ்ரேல் பிறப்பித்த உத்தரவுக்கமைய தெற்குக்கு நகரும் மக்களை இலக்கு வைத்து இஸ்ரேல் மேற்கொள்ளும் தாக்குதல்களினால் மக்கள் நடு வீதியில் வீழ்ந்து உயிர் துறக்கிறார்கள். இந்நிலையில் யுக்ரேன் பிரச்சினையின் போது ஜனாதிபதி உடனடியாக தனது நிலைப்பாட்டினை கொள்கையினை வெளியிட்டது போன்று பலஸ்தீன விவகாரத்திலும் திறந்த தெளிவான நிலைப்பாட்டினை மேற்கொள்ள வேண்டியுள்ளது என வெளிவிவகார அமைச்சர் அலி சப்ரி பலஸ்தீன் விவகாரம் தொடர்பில் தனது நிலைப்பாட்டினை விளக்குகையில் தெரிவித்தார்.

அவர் தொடர்ந்தும் பாராளுமன்றத்தில் உரையாற்றுகையில்,
இன்று நாம் எமது வாழ்நாளில் மிகவும் துயரமான சம்பவங்களை மத்திய கிழக்கில் கண்டுகொண்டிருக்கிறோம். இன்று இரண்டு மாதங்களுக்கும் அதிகமாக பலஸ்தீனர்களின் பூமிக்கு மேலால் வானிலிருந்து இஸ்ரேல் விமானப் படையினர் குண்டுகளைப் பொழிந்து வருகின்றனர்.

காஸாவில் வடக்கில் வதியும் பலஸ்தீனர்கள் அனைவரும் தமது பிறந்த பூமியை விட்டும், வாழ்விடங்களைக் கைவிட்டும் உயிர்களைக் காப்பாற்றிக் கொள்வதற்காக தெற்குப் பகுதிக்குச் செல்லுமாறு இஸ்ரேல் அறிவித்தது. அதன் பின்பு அந்தப் பிரதேசங்களிலிருந்த பாடசாலை, வைத்தியசாலைகள், வீடுகள், இஸ்லாமிய மற்றும் கிறிஸ்தவ மத நிலையங்களை இஸ்ரேல் படையினர் அழித்து நிர்மூலமாக்கினார்கள். உணவு, குடிநீர் மற்றும் வழங்கப்படும் மருந்துகள் அனைத்துக்கும் இஸ்ரேல் படையினர் தடை விதித்தனர். எண்ணெய்க்கு தடை விதித்தனர். முழு பிராந்தியத்தையும் இருளில் மூழ்கச் செய்தனர். இந்த இரண்டு மாதகால எல்லைக்குள் சுமார் 17 ஆயிரம் பேரைக் கொலை செய்தனர். இவர்களில் 75 வீதமானோர் பெண்களும் சிறுவர்களுமாவார்கள். இலட்சக் கணக்கானோர் மாற்றுத் திறனாளிகளாக மாறியுள்ளனர்.
கண்கள், தலை, கை, கால்களில் இரத்தம் வழிய வரும் சிறிய பிள்ளைகள், தாய்மார்களை நாம் சமூக வலைத் தளங்களிலும் அல்ஜெஸீரா ஊடகத்திலும் காண்கிறோம். இவர்கள் எங்களது பிள்ளைகளைப் போன்றவர்கள். எங்களது தாயாரைப் போன்ற பெண்கள், சகோதரிகள்.

கால், கைகள், கண்கள் இழக்கப்பட்டு ஜனாஸாக்கள் கொண்டு வரப்படுகின்றன. இவர்களில் பெண்கள் சிறுவர்கள் மாத்திரமல்ல. ஐக்கிய நாடுகள் சபையின் பணிகளுடன் தொடர்புபட்டவர்கள், ஊடகவியலாளர்கள், டாக்டர்கள் மற்றும் வைத்திய சேவையைச் சேர்ந்தவர்கள் இந்தப் பட்டியலில் அடங்குகின்றனர்.

இந்தக் கொடிய தாக்குதல்களை நிறுத்துவதற்கு ஐக்கிய நாடுகள் சபை கொண்டு வந்த தீர்மானங்கள் அதிகார பலம் கொண்ட நாடுகளால் தொடர்ந்தும் நிராகரிக்கப்பட்டே வருகின்றன. ஐக்கிய நாடுகள் சபையில் அமெரிக்கா மற்றும் இஸ்ரேல் உட்பட பலம் வாய்ந்த நாடுகள் சிலவற்றைத் தவிர பெரும்பான்மையான உலக நாடுகள் யுத்த நிறுத்தம் மற்றும் மனிதாபிமான உதவிகளுக்கு வாய்ப்பளிக்க வேண்டும் என்ற கோரிக்கை தொடர்ந்தும் நிராகரிக்கப்பட்டது.

காஸாவில் பலஸ்தீன மக்களை உயிரைப் பாதுகாத்துக் கொள்வதற்காக வடக்கிலிருந்து தெற்கிற்கு செல்லுமாறு இஸ்ரேல் இராணுவம் உத்தரவிட்டது. தற்போது தெற்கிற்கும் வான் வழித் தாக்குதல்கள் நடத்தப்படுகின்றன. தரை வழித் தாக்குதலும் மேற்கொள்ளப்படுகின்றன. இதனை ஊடகங்களில் நாம் பார்க்கிறோம். வடக்கிலிருந்து தெற்கு நோக்கி நகர்ந்து கொண்டிருக்கும் மக்கள் இஸ்ரேலின் தாக்குதல் காரணமாக நடு வீதியில் வீழ்ந்து உயிர் துறக்கிறார்கள். இவற்றை உறுதி செய்யும் படங்களை நாம் சமூக வலைத்தளங்களில் காண்கிறோம்.

முழு காஸாவினதும் மில்லியன் கணக்கான மக்களையும் சினாய் பாலைவனத்துக்கு அனுப்பி விட்டு முழு காஸா பிராந்தியத்தையும் இஸ்ரேலின் ஒரு பகுதியாக மாற்றிக் கொள்வதே இஸ்ரேலின் திட்டம். தற்போது இது முழு உலகிற்கும் இரகசியமானதல்ல.

‘காஸா பிராந்தியம் பிள்ளைகளின் சுடுகாடாக மாறியுள்ளது. உடனடியாக யுத்த நிறுத்தத்தை கடைப்பிடியுங்கள்’ என ஐக்கிய நாடுகள் சபையின் பொதுச் செயலாளர் அறிக்கையொன்றினை வெளியிட்டுக் கோரியுள்ளார்.
ஆனால் இஸ்ரேல் ஐ.நா.வின் பொதுச் செயலாளரின் கோரிக்கையை மறுத்துள்ளது. ஐ.நா. பொதுச் செயலாளரைப் பதவியிலிருந்தும் வெளியேற்ற வேண்டுமென இஸ்ரேல் எச்சரிக்கை செய்துள்ளது. எனக்கு இந்நேரத்தில் ஒன்று ஞாபகத்துக்கு வருகிறது. கொங்கோ பிரச்சினையின் போது டேக் ஹெமர்சல் எனும் பொதுச் செயலாளரையும் அதிகார பலம் கொண்ட சக்திகள் பதவியிலிருந்து விலகுமாறு அச்சுறுத்தல் விடுத்தன. அன்று அவர் ஐக்கிய நாடுகளின் பொதுச் சபையில் ஆற்றிய உரை எனக்கு ஞாபகத்தில் வருகிறது.

சிறிய நாடுகளின் பாதுகாப்புக்காகவே ஐக்கிய நாடுகள் அமைப்பு கட்டாயமாகத் தேவைப்படுகிறது. இந்தச் சபையில் அங்கம் வகிக்கும் பெரும்பான்மையான நாடுகளின் ஆதரவு இருக்கும்வரை நான் ‘அந்தப் பொறுப்பினை நிறைவேற்றுவேன்’ என அன்று அவர் தெரிவித்தார்.

சிறிய நாடுகளின் பாதுகாப்பிற்காக இருக்கும் ஐக்கிய நாடுகள் அமைப்பு, மனித உரிமைகள் ஆணைக்குழு, சர்வதேச நீதிமன்றம் என்பன தீர்மானம் மேற்கொள்ளல், அறிக்கைகள் வெளியிடல் அன்றி சிறிய நாடுகளின் மக்களின் பாதுகாப்பு, சுயநிர்ணயம் என்பன தொடர்பில் அந்நாடுகள் எத்தகைய நடவடிக்கைகளிலும் ஈடுபட முடியாத அளவுக்கு வல்லரசு நாடுகள் ஆதிக்கம் செலுத்துகின்றன. இதனால் குறிப்பிட்ட அமைப்புகளின் செயற்றிறன் குன்றியுள்ளது.

பலஸ்தீனர்களின் பூமியின் மீது இவ்வாறான மிலேச்சத்தனமான தாக்குதல்கள் தொடராக மேற்கொள்ளப்பட்டமை இதுவே முதற்தடவை அல்ல. கடந்த இரண்டு மாதத்திற்கும் அதிகமாக தினமும் பலஸ்தீனர்கள் நூற்றுக்கணக்காக இவ்வாறு கொல்லப்பட்டு வருவதை நாம் காண்கிறோம். இதற்கு முன்பு ஒவ்வொரு வருடமும் இவ்வாறான மிலேச்சத்தனமான தாக்குதல்கள் நடத்தப்பட்டு வந்துள்ளன.

இவ்வாறான சந்தர்ப்பங்களில் ஐக்கிய நாடுகளின் அமைப்பு அது தொடர்பில் ஆராய்ந்து அறிக்கை சமர்ப்பிப்பதற்கு நியமிக்கப்பட்டிருந்த குழுக்களின் அறிக்கைகள் தாள்களில் எழுதப்பட்ட வெறும் வார்த்தைகளுக்கு மட்டுப்படுவதற்கு வல்லரசு சக்திகள் காரணமாக இருந்தன.

2021ஆம் ஆண்டு பலஸ்தீனர்களின் பூமி மீது மேற்கொள்ளப்பட்ட தாக்குதல்கள் தொடர்பில் ஆராய்வதற்கு குழுவொன்று நியமிக்கப்பட்டது. அந்தக் குழுவின் தலைவராக இலங்கைப் பிரதிநிதி மொஹான் பீரிஸ் நியமிக்கப்பட்டிருந்தார். அந்தக் குழுவின் அறிக்கையை அவர் ஐ.நாவின் பொதுச் சபைக்குக் கையளித்தார்.

தற்போது காஸா மீது மேற்கொள்ளப்படும் தாக்குதல்களை நிறுத்தும்படி கோரி உலகெங்கும் இலட்சக்கணக்கான மக்கள் வீதியில் இறங்கி ஆர்ப்பாட்டம் நடத்துவதை நாங்கள் காண்கிறோம். ஜப்பானின் டோக்கியோவிலிருந்து சிலி வரை அதேபோன்று ஒக்லாந்திலிருந்து அம்மான் வரையும் லொஸ் என்ஜல்ஸிலிருந்து ஜகார்த்தா வரையும் நிரந்தர யுத்த நிறுத்தம் கோரி இந்த மோசமான கொலைகளை நிறுத்துவதற்காக வீதியில் இறங்கியிருக்கிறார்கள்.
உலகெங்குமுள்ள புத்திஜீவிகள், நிபுணர்கள், மாணவர்கள், இளைஞர்கள் நிரந்தர யுத்த நிறுத்தத்துக்கு குரல் கொடுத்து வருகிறார்கள். அமெரிக்காவில் உள்ள யூதர் இனத்தவர் கூட அமெரிக்க காங்கிரஸை சுற்றி வளைத்து அமர்ந்து போராடியதை நாம் எம் கண்களினால் கண்டோம்.

தென்னாபிரிக்கா, இந்தோனேஷியா, பெலிஸ், நமீபியா, பங்களாதேஷ், பொலிவியா, கொமரோஸ், ஜிபொடி உட்பட நாடுகள் இந்த மிலேச்சத்தனமான கொள்கைக்கு எதிராக சர்வதேச நீதிமன்றுக்குச் சென்றுள்ளன. பல நாடுகள் இஸ்ரேலுடனான இராஜதந்திர உறவினை நிறுத்திக் கொள்வதற்கு தீர்மானித்து அறிக்கை வெளியிட்டுள்ளன. தென்னாபிரிக்கா, சிலி, பெலிஸ், கொலம்பியா, ஹொன்டுராஸ், பஹ்ரைன், ஜோர்தான், துருக்கி, சாட் ஆகிய நாடுகளுடன் தினமும் பல நாடுகள் இணைந்து வருகின்றன.

எமது நாடு போன்ற சிறிய நாடுகளுக்கு உள்ள பாதுகாப்பு உலக மக்களின் நிலைப்பாடாகும். உலக மக்களின் தலையீடாகும். பல வருடகாலமாக தென்னாபிரிக்காவில் நிலவிய சிறுபான்மையான வெள்ளையர்களின் அடக்குமுறைக்கு மேற்கத்தேய நாடுகளில் சில மற்றும் ஊடக ஏகாதிபதியம் என்பனவற்றின் ஆசிர்வாதம் கிடைக்காது. என்றாலும் உலகின் சிறிய நாடுகள் மற்றும் உலக மக்கள் அந்த சிறுபான்மை வெள்ளையர்களின் ஆட்சிக்கு எதிராக ஒன்றுபட்டனர். அவர்களுடனான இராஜதந்திர தொடர்புகளை துண்டித்தனர். அவர்களது உற்பத்திப் பொருட்களை நிராகரித்தனர். இவ்வாறான அகிம்சை வாத போராட்டங்களின் முன்னால் தென்னாபிரிக்காவின் சிறுபான்மை வெள்ளையர்களின் ஆட்சி மண்டியிட வேண்டியேற்பட்டது.

இன்று பலஸ்தீன மக்களின் நிலைமை பரிதாபத்துக்குரியதாக மாறியுள்ளது. ஏகாதிபத்தியவாதிகளின் கீழ் எமது பரம்பரையினர் அடிமைகளாக பல்வேறு இன்னல்களுக்கு மத்தியில் சுரண்டப்பட்டு வாழ்ந்த வரலாறு எனது நினைவுக்கு வருகிறது. அன்று ஏகாதிபத்தியவாதிகளால் வாரியபொல தேரர், வீரபுரன் அப்பு மற்றும் கொங்காலே கொட பண்டா போன்ற வீரர்கள் தீவிரவாதிகளாக முத்திரை குத்தப்பட்டார்கள். இது எனது நினைவுக்கு வருகிறது.

இதேபோன்றே தென்னாபிரிக்காவின் சுதந்திர போராட்டத்தின் தலைவர்களான நெல்சன் மண்டேலா, டெஸ்மன் டுட்டு போன்றோருக்கு இந்த மேற்கத்தேய நாடுகளின் அடிவருடிகள் மற்றும் மேலைத்தேய ஊடகங்கள் தீவிரவாதிகள் என்று பட்டம் சூட்டின. அன்று உலக நாடுகளின் எழுச்சியினால் மற்றும் ஆபிரிக்க மக்களின் போராட்டத்தின் காரணமாக அந்த ஏகாதிபத்தியவாதிகளின் ஆட்சியைத் தோற்கடிக்க முடிந்தது.

தென்னாபிரிக்காவின் சுதந்திரப் போராட்டம் வெற்றியளித்திருந்தாலும் பலஸ்தீனர்களின் போராட்டத்தை வெற்றியடையச் செய்வதற்கு உலக சமூகத்தினால் இன்னும் முடியாமற் போயுள்ளது.

தென்னாபிரிக்கா சுதந்திரம் பெற்ற சந்தர்ப்பத்தில் நெல்சன் மண்டேலா மற்றும் டெஸ்மன் டுட்டு வெளியிட்ட கருத்து எனது நினைவுக்கு வருகிறது.
நெல்சன் மண்டெல்லா இவ்வாறு கூறினார்.

‘தென் ஆபிரிக்காவில் நாம் பெற்றுக் கொண்டுள்ள சுதந்திரம், பலஸ்தீன மக்கள் சுதந்திரம் பெற்றுக் கொள்ளும் தினமன்றே பூரணத்துவம் அடையும் என்று கூறினார்.

டெஸ்மன் டுடு இவ்வாறு கூறினார்.
‘நான் பலஸ்தீனர்களின் பூமிக்குச் சென்றேன். பலஸ்தீனர்கள் நாம் தென்னாபிரிக்காவில் அனுபவிக்கும் துன்பங்களை விட மோசமான துயரங்களை அனுபவிக்கிறார்கள்.

தென்னாபிரிக்கா விவகாரத்தில் அன்று எமது தலைவர்கள் கொண்ட நிலைப்பாட்டுக்கு அமைவாகவும், ஆசிய, ஆபிரிக்க நாடுகளின் ஒற்றுமை மற்றும் அணிசேரா நாடுகள் உலக அபிப்பிராயத்துக்கு தலைமை வழங்கியது போன்று இன்று நாம் பலஸ்தீன விவகாரத்தில் ஏகாதிபத்திய வாதிகளின் சூழ்ச்சிகளை முறியடிக்க வேண்டும். பலஸ்தீன மக்களின் வாழ்க்கையைப் பாதுகாப்பதற்காக நிரந்தர யுத்த நிறுத்தத்துக்காக நாங்கள் சிறிய நாடென்றாலும் உலகின் கருத்தொற்றுமையுடன் ஒன்று சேர வேண்டும். பலஸ்தீனர்களின் நாட்டின் சுதந்திரத்துக்காக குரல் கொடுக்க வேண்டும். ஐக்கிய நாடுகள் சபையின் தீர்மானத்துடன் அச்சமின்றி ஒன்றுபட வேண்டும்.
இன்று பலஸ்தீன பிரச்சினையின் சரி பிழை, கறுப்பு வெள்ளை பிரச்சினை போன்றதாகும். இந்நிலையில் நாம் சரியான பக்கம் அணிதிரள வேண்டும். மனிதப் படுகொலைகளை நிறுத்துவதற்கு யுத்த நிறுத்தம் அவசியமாகும். இதற்காக குரல் கொடுக்க வேண்டும்.

யுக்ரேன் பிரச்சினை உருவானபோது ஜனாதிபதி உடனடியாக அது தொடர்பில் தனது நிலைப்பாட்டினை தெரிவித்தார். அதுபோன்று ஜனாதிபதி பலஸ்தீன விவகாரத்திலும் திறந்த, தெளிவான நிலைப்பாட்டினை மேற்கொள்ள வேண்டியுள்ளது என்றார். – Vidivelli