காஸாவில் போர் நிறுத்தத்துடன் பணயக் கைதிகள் 50 பேர் விடுதலை!
150 பலஸ்தீன கைதிகளை இஸ்ரேல் விடுவிக்கும்
ஹமாஸால் பணயக் கைதிகளாகப் பிடிக்கப்பட்டுள்ள இஸ்ரேலியர்கள் 50 பேர் நான்கு நாட்களுக்குள் விடுவிக்கப்படுவார்கள் என்றும், இந்த காலகட்டத்தில் போர் தற்காலிகமாக நிறுத்தப்படும் என்றும் இஸ்ரேல் பிரதமர் அலுவலகம் தெரிவித்துள்ளது.
அதே நேரத்தில் 50 பணயக் கைதிகளை விடுப்பதற்குப் பதிலாக இஸ்ரேலிய சிறைகளில் உள்ள 150 பலஸ்தீனர்களை விடுவிக்க இஸ்ரேல் சம்மதித்திருப்பதாக ஹமாஸ் வெளியிட்டிருக்கும் அறிக்கையில் கூறப்பட்டுள்ளது.
இஸ்ரேல் அமைச்சரவை இந்த உடன்பாட்டுக்கு ஒப்புதல் அளித்துள்ளது. இஸ்ரேல் பிரதமர் அலுவலகம் இது தொடர்பான அதிகாரபூர்வ அறிக்கையை வெளியிட்டுள்ளது.
இஸ்ரேல் பிரதமர் அலுவலகம் தனது அறிக்கையில், “அனைத்து பணயக் கைதிகளையும் மீட்க இஸ்ரேல் அரசு உறுதி பூண்டுள்ளது. இந்த நோக்கத்தை அடைவதற்கான முதல் கட்ட திட்டத்துக்கு அரசாங்கம் ஒப்புதல் அளித்துள்ளது, அதன்படி பெண்கள் மற்றும் குழந்தைகள் உட்பட 50 பணயக்கைதிகள் நான்கு நாட்களுக்குள் விடுவிக்கப்படுவார்கள். அப்போது சண்டை நிறுத்தப்படும்.”
“பணயக் கைதிகள் அனைவரும் தாயகம் திரும்பும் வரை, ஹமாஸ் முற்றிலுமாக அகற்றப்படும் வரை இஸ்ரேலிய அரசாங்கம், இஸ்ரேலிய இராணுவம் மற்றும் பாதுகாப்புப் படைகள் போரைத் தொடரும். காஸாவிலிருந்து இஸ்ரேலுக்கு புதிய அச்சுறுத்தல் எதுவும் இல்லை என்பது உறுதி செய்யப்படும்.” என்று இஸ்ரேல் கூறியுள்ளது.
ஒவ்வொரு 10 பணயக் கைதிகளை விடுவிப்பதற்கும் கூடுதலாக ஒருநாள் சண்டை நிறுத்தம் இருக்கும் என்றும் இஸ்ரேல் தரப்பில் தெரிவிக்கப்பட்டுள்ளது.
இந்த உடன்பாட்டின் முக்கியத்துவம் என்ன?
முதலில் விடுவிக்கப்படும் முதல் 50 பேரில் பெரும்பாலானோர் இரு நாடுகளின் குடியுரிமை பெற்ற இஸ்ரேலிய பிரஜைகளாக இருப்பார்கள் என்று நம்பப்படுகிறது.
இப்போது இந்த ஒப்பந்தம் தொடர்பாக, ஹமாஸ் புதிய அறிக்கை ஒன்றை வெளியிட்டுள்ளது. இதில் 50 இஸ்ரேலிய பணயக்கைதிகளுக்கு ஈடாக, இஸ்ரேலிய சிறைகளில் உள்ள 150 பலஸ்தீனிய பெண்கள் மற்றும் குழந்தைகள் விடுவிக்கப்படுவார்கள் என்று குறிப்பிடப்பட்டுள்ளது.
இந்த ஒப்பந்தத்தின் கீழ், மனிதாபிமான உதவி, அத்தியாவசிய மருந்துகள் மற்றும் எரிபொருள் நிரப்பப்பட்ட நூற்றுக்கணக்கான டிரக்குகள் காஸாவுக்குள் நுழையும்.
நான்கு நாள் போர் நிறுத்தத்தின் போது இஸ்ரேல் எந்தத் தாக்குதலையும் நடத்தாது, யாரையும் கைது செய்யாது என்று ஹமாஸின் அறிக்கை கூறுகிறது.
“நான்கு நாள் தற்காலிக போர்நிறுத்தத்தின் போது, தெற்கு காஸாவில் விமானங்கள் பறக்க முற்றிலுமாகத் தடை இருக்கும். வடக்கு காஸாவில் ஒவ்வொரு நாளும் ஆறு மணி நேரம் இந்தக் கட்டுப்பாடு அமுலில் இருக்கும்.” என்று ஹமாஸ் வெளியிட்ட அறிக்கையில் கூறப்பட்டுள்ளது.
காசாவின் வான்வெளி முழுவதும் இஸ்ரேலின் கட்டுப்பாட்டில் உள்ளது.
ஒக்டோபர் 7ம் திகதி இஸ்ரேல் மீது ஹமாஸ் நடத்திய தாக்குதலில், 240 இஸ்ரேலியர்களை ஹமாஸ் பணயக் கைதிகளாக பிடித்து வைத்துள்ளது. இவர்களில் நான்கு பணயக்கைதிகள் மட்டுமே இதுவரை விடுவிக்கப்பட்டுள்ளனர்.
300 பலஸ்தீன கைதிகளின் பட்டியல் வெளியீடு
ஹமாஸுடன் செய்து கொண்ட உடன்பாட்டின்படி இஸ்ரேல் விடுவிக்கப் போகும் 300 பலஸ்தீன சிறைக் கைதிகளின் பட்டியலை இஸ்ரேல் வெளியிட்டுள்ளது.
இஸ்ரேலிய நீதித்துறையின் இணையதளத்தில் இந்தப் பட்டியல் வெளியிடப்பட்டுள்ளது. இவர்களில் 274 பேர் ஆண்கள். பெரும்பாலும் 17 -முதல்18 வயதுடையவர்கள். அவர்கள் மீதான குற்றச்சாட்டுகளும் இஸ்ரேலின் பட்டியலில் குறிப்பிடப்பட்டுள்ளது.
எனினும் முதலில் 150 பேர் மட்டுமே விடுவிக்கப்படுவார்கள் என்று ஹமாஸ் ஏற்கனவே வெளியிட்ட அறிக்கையில் இருந்து தெரிய வருகிறது.
கத்தார் கூறுவது என்ன?
நான்கு நாட்கள் சண்டை நிறுத்த ஒப்பந்தம் ‘போரை முடிவுக்கு கொண்டுவர’ வழிவகுக்கும் என்று கத்தார் நம்புகிறது.
காஸாவில் சண்டை நிறுத்தம் செய்ய உதவிய அமெரிக்கா மற்றும் எகிப்துக்கு கத்தார் பிரதமர் முகம்மது பின் அப்துல் ரஹ்மான் பின் ஜாசிம் அல் தானி நன்றி தெரிவித்துள்ளார்.
இந்த ஒப்பந்தம் “போர் மற்றும் இரத்தக்களரிக்கு முற்றுப்புள்ளி வைக்கும்” என்றும் ஒரு “விரிவான மற்றும் நிலையான ஒப்பந்தத்தை” உருவாக்கும் என்றும் நம்புவதாகக் அவர் கூறியுள்ளார்.
இந்த ஒப்பந்தம் “ஒரு விரிவான, நியாயமான அமைதி செயல்முறைக்கான பேச்சுவார்த்தைக்கு வழிவகுக்கும்” என்று தான் நம்புவதாகவும் பிரதமர் கூறினார்.
“கத்தாருக்கு நன்றி”
இந்த உடன்பாடு தொடர்பாக ஹமாஸ் டெலிகிராமில் ஓர் அறிக்கையை வெளியிட்டது. அதில் “மனிதாபிமான அடிப்படையில் போர்நிறுத்த உடன்பாடு செய்யப்பட்டுள்ளது.” என்று குறிப்பிட்டுள்ளது. இந்த ஒப்பந்தத்திற்கு மத்தியஸ்தம் செய்த கத்தார் மற்றும் எகிப்துக்கு ஹமாஸ் நன்றி தெரிவித்துள்ளது.
பல வார பேச்சுவார்த்தைகளுக்குப் பிறகு, ஒக்டோபர் 7 முதல் ஹமாஸின் பிடியில் இருக்கும் இஸ்ரேலிய பணயக்கைதிகள் தொடர்பான ஒப்பந்தத்தை எட்டும் தறுவாயில் இருப்பதாக இஸ்ரேலும் ஹமாஸும் சமீபத்தில் கூறின.
செவ்வாய்க்கிழமை ராய்ட்டர்ஸிடம் பேசிய ஹமாஸ் தலைவர் இஸ்மாயில் ஹனியா, ஹமாஸ் இஸ்ரேலுடனான ‘போர் நிறுத்த ஒப்பந்தத்திற்கு’ மிக அருகில் இருப்பதாக கூறினார்.
இஸ்ரேலியப் பிரதமர் பெஞ்சமின் நெதன்யாகுவும் விரைவில் “நல்ல செய்தியை” பகிர்ந்து கொள்வதாகக் கூறியிருந்தார்.
கடந்த ஒக்டோபர் மாதம் 7 ஆம் திகதி ஹமாஸ் அமைப்பினர் இஸ்ரேலுக்கு எதிராக மேற்கொண்ட தாக்குதலில் 1200இஸ்ரேலியர்கள் கொல்லப்பட்டனர். சுமார் 240 பேர் ஹமாஸ் அமைப்பினரால் கடத்திச் செல்லப்பட்டு மறைத்து வைக்கப்பட்டுள்ளனர். அப்போது முதல் இஸ்ரேல் காஸா மீது மேற்கொண்ட தாக்குதல்களில் சுமார் 14000பலஸ்தீனர்கள் பலியாகியுள்ளனர். இவர்களில் பெரும் எண்ணிக்கையானவர்கள் சிறுவர்களும் பெண்களுமாவார்கள். இந்த தரவுகளை ஹமாஸின் கட்டுப்பாட்டில் உள்ள சுகாதார அமைச்சு தெரிவித்துள்ளது.
இந்நிலையில் நாளாந்தம் பலஸ்தீனர்கள் இஸ்ரேலினால் பலி கொள்ளப்பட்டு வரும் சூழலில் இஸ்ரேல் பணயக் கைதிகளின் விடுதலை தொடர்பில் மும்முரமாக முயற்சிகள் மேற்கொள்ளப்பட்டு வருகின்றன.
கடந்த மாதம் நான்கு இஸ்ரேல் பணயக்கைதிகளின் விடுதலைக்கு பேச்சுவார்த்தைகளில் ஈடுபட்ட கட்டார் தொடர்ந்தும் பணயக்கைதிகள் விடுதலை தொடர்பில் முயற்சித்து வருகிறது.
சர்வதேச செஞ்சிலுவை சங்கத்தின் தலைவர் கட்டாருக்கு விஜயம் செய்து பணயக்கைதிகள் தொடர்பில், அங்கு நிலை கொண்டிருக்கும் ஹமாஸ் அரசியல் தலைவர்களுடன் கலந்துரையாடியுள்ளார். நடுநிலையான மனிதாபிமானமான ரீதியில் இரு தரப்பினரும் இவ்விவகாரத்தில் ஓர் உடன்படிக்கைக்கு வந்தால் நாம் பணயக்கைதிகளின் விடுதலைக்கு உதவுவதற்கு தயாராக உள்ளோம் என சர்வதேச செஞ்சிலுவை சங்கத்தின் தலைவர் தெரிவித்துள்ளார்.
இவ் விவகாரத்தில் தீர்மானமொன்று மேற்கொள்வதில் சிறிய தடைகளே உள்ளன. அவற்றைப் பேச்சுவார்த்தைகள் மூலம் தீர்த்துக் கொள்ளலாம் என தான் கருதுவதாக கட்டார் பிரதமர் ஷேக் மொஹமட் பின் அப்தூல் ரஹ்மான் அல்தானி தெரிவித்துள்ளார்.
இதேவேளை, அமெரிக்காவுக்கான இஸ்ரேலிய தூதுவர் மைக்கல் ஹர்சொக், கணிசமான எண்ணிக்கையிலான பணயக்கைதிகளை விடுதலை செய்து கொள்வதற்கு எதிர்வரும் நாட்களில் முடியுமாக இருக்கும் எனத் தெரிவித்துள்ளார். – Vidivelli