எம்.ஐ.அப்துல் நஸார்
காஸாவில் கடந்த 25 நாட்களுக்கும் மேலாக இஸ்ரேல் நடாத்தி வரும் வான் மற்றும் தரை வழித்தாக்குதல்களில் இதுவரை 8700 க்கும் அதிகமான பலஸ்தீனர்கள் உயிரிழந்துள்ள நிலையில் மேலும் 2000 பேர் கட்டிட இடிபாடுகளுக்குள் பல நாட்களாக சிக்கியுள்ளதாக பலஸ்தீன சுகாதார அமைச்சு நேற்று அறிவித்துள்ளது. இவ்வாறு சிக்கியுள்ளவர்களின் 1100க்கும் அதிகமானோர் குழந்தைகள் மற்றும் சிறுவர்கள் என்றும் மீட்புப் பணிகளை முன்னெடுப்பதற்கான வசதிகள் எதுவும் இன்மையால் அவர்களை மீட்பது சாத்தியமற்றுள்ளதாகவும் தெரிவிக்கப்படுகிறது.
இதனிடையே காஸாவில் மக்கள் செறிந்து வாழும் ஜபாலியா அகதிகள் முகாம் மீது இஸ்ரேல் நடாத்திய கொடூரமான வான் தாக்குதலில் 400க்கும் மேற்பட்ட பலஸ்தீனியர்கள் கொல்லப்பட்டுள்ளதுடன் மேலும் நூற்றுக் கணக்கானோர் காயமடைந்துள்ளனர். கடந்த 17 ஆம் திகதி காஸாவின் அல் அஹ்லி மருத்துவமனை மீது நடாத்தப்பட்ட தாக்குதலின் பின்னர் அதிகமானோர் கொல்லப்பட்ட தாக்குதலாக இது கருதப்படுகிறது.
பலஸ்தீனிய சுகாதார அமைச்சின் நேற்று மாலை வரையான தகவல்களின்படி, ஒக்டோபர் 7 முதல் காஸா பகுதியில் 8,796 க்கும் மேற்பட்ட பலஸ்தீனியர்கள் கொல்லப்பட்டுள்ளனர், இதில் 3,524 சிறுவர்கள் மற்றும் 2,187 பெண்கள் அடங்குவர். அதாவது காஸாவில் தினமும் 420க்கும் மேற்பட்ட சிறுவர்கள், குழந்தைகள் கொல்லப்படுகின்றனர் அல்லது காயமடைகின்றனர். கொல்லப்பட்ட பலஸ்தீனியர்களில் 70 வீதமானவர்கள் குழந்தைகள் மற்றும் பெண்கள் என்று அறிக்கைகள் தெரிவிக்கின்றன. இதற்கு மேலதிகமாக 21,543 பலஸ்தீனியர்கள் காயமடைந்துள்ளதாக பலஸ்தீனிய சுகாதார அமைச்சகம் தெரிவித்துள்ளது. ஒக்டோபர் 7 முதல் நேற்று வரை 6,300 சிறுவர்கள் காயமடைந்துள்ளனர்.
இதேவேளை, இடிபாடுகளுக்குள் சிக்கியுள்ள பொதுமக்களின் எண்ணிக்கை 2030 ஆக இருக்கும் என்றும் இவர்களில் 1,120 பேர் சிறுவர்கள் என்றும் மதிப்பிடப்பட்டுள்ளது.
இஸ்ரேலின் தொடர்ச்சியான மற்றும் இடைவிடாத வான்வழித் தாக்குதல்கள், உபகரணங்கள் மற்றும் வாகனங்களை இயக்குவதற்கு எரிபொருள் பற்றாக்குறை போன்ற காரணங்களால் இடிபாடுகளுக்கு அடியில் சிக்கியுள்ளவர்களை மீட்கும் பணிகள் சாத்தியமற்றவையாக மாறியுள்ளன.
மின்சாரம் துண்டிக்கப்பட்டுள்ளதால் காஸாவிலுள்ள அல் சிபா வைத்தியசாலையின் பணிகள் முற்றாக செயலிழந்துள்ளன. அங்கு பயன்பாட்டில் உள்ள மின்பிறப்பாக்கிகளில் இன்னும் சில மணிநேரங்களில் எரிபொருள் முடிவடைந்துவிடும் என நேற்றுக் காலை நடாத்திய ஊடக சந்திப்பில் வைத்தியசாலையின் பணிப்பாளர் தெரிவித்தார்.
“எமது வைத்தியசாலையில் குறைமாதத்தில் பிறந்த 42 குழந்தைகள் செயற்கை சுவாசத்திலேயே தங்கியுள்ளன. மின்பிறப்பாக்கிகள் செயலிழந்தால் ஒட்சிசன் இயந்திரம் செயலிழக்கும். இதனால் இக் குழந்தைகளை காப்பாற்ற முடியாது போய்விடும். சிறுநீரக நோயாளிகளுக்குத் தேவையான 57 இரத்த சுத்திகரிப்பு இயந்திரங்களும் செயலிழக்கும். உலக நாடுகளிடம் உதவி கோரி நாம் அலுத்துப் போய்விட்டோம். காஸா மக்களே உங்களிடம் ஒரு லீற்றர் பெற்றோல் இருந்தால் அதையும் வைத்தியசாலைக்கு கொண்டு வந்து தாருங்கள் என கோரிக்கை விடுக்கிறேன். இயந்திரங்கள் செயலிழக்கும் நிலை ஏற்பட்டால் எங்கள் கண் முன்னாலேயே அத்தனை நோயாளிகளும் இறந்துபோவார்கள்” என்றும் அவர் குறிப்பிட்டார்.
ஜபாலியா முகாம் மீதான தாக்குதலுக்குப் பின்னர், டசின் கணக்கான உடல்கள் வெள்ளை துணியால் சுற்றப்பட்டு, காஸாவிலுள்ள இந்தோனேசிய வைத்தியசாலையின் பக்கமாக வரிசையாக அடுக்கி வைக்கப்பட்டிருப்பதை காட்டும் புகைப்படங்களை சர்வதேச ஊடகமொன்று வெளியிட்டுள்ளது.
மின்சாரத் துண்டிப்பு மற்றும் வான் அல்லது பீரங்கித் தாக்குதல்கள் மற்றும் குறைந்துவரும் மருந்துகள் போன்றவற்றால் வைத்தியசாலைகள் திணறி வருகின்றன. காஸாவில் சத்திரசிகிச்சை நிபுணர்கள் இரவும் பகலும் பணியாற்றுகின்றனர்.
‘நாங்கள் ஒரு மணித்தியாலம் ஓய்வு எடுத்துக்கொள்கிறோம், ஏனென்றால் எப்போது நோயாளிகள் வருவார்கள் என்று எங்களுக்குத் தெரியாது. பல முறை நாங்கள் தாழ்வாரங்களிலும் சில சமயங்களில் வைத்தியசாலையின் காத்திருப்புப் பகுதிகளிலும் அறுவை சிகிச்சைக்கான இடங்களை அமைக்க வேண்டியிருந்தது” என டாக்டர் முகம்மது அல் ரன் தெரிவித்தார்.
ஹமாஸ் அமைப்பு, எதிர்வரும் நாட்களில் சில வெளிநாட்டு கைதிகளை விடுவிப்பதாக மத்தியஸ்தர்களிடம் கூறியுள்ளதாக, அக் குழுவின் ஆயுதப் பிரிவான அல்-கஸ்ஸாம் படைப்பிரிவின் பேச்சாளர் அபூ உபைதா செவ்வாயன்று தெரிவித்திருந்தார். பணயக் கைதிகளாகப் பிடிக்கப்பட்டோரின் எண்ணிக்கை அல்லது அவர்கள் எந்த நாட்டைச் சேர்ந்தவர்கள் என்பன போன்ற மேலதிக தகவல்களை அவர் வெளியிடவில்லை.
ஜபாலியா அகதிகள் முகாம் மீதான இஸ்ரேலின் தாக்குதலை மனிதாபிமான குழுக்கள் கண்டித்துள்ளன.
ரபா கடவை திறப்பு
காயமடைந்த பலஸ்தீனியர்களை சிகிச்சைக்காக எகிப்துக்கு அழைத்துச் செல்வதற்காக ஒக்டோபர் 7 ஆம் திகதிக்குப் பின்னர் முதன்முறையாக நேற்று ரபா எல்லைக் கடவை தற்போது திறக்கப்பட்டுள்ளது.
காஸாவில் உள்ள எல்லைக் கடவையிலுள்ள ஊடகவியலாளர்களின் கருத்துப்படி, காயமடைந்த டசின் கணக்கான பலஸ்தீனியர்கள் எகிப்திய மருத்துவமனைகளில் சிகிச்சை பெறுவதற்காக ரபா எல்லைக்கடவை வழியாக குண்டுவீச்சுக்குள்ளான பகுதியை விட்டு வெளியேற அனுமதிக்கப்படவுள்ளனர்.
காயமடைந்தவர்களுக்க மேலதிகமாக, காஸாவினுள் வாழ்ந்துவந்த இரட்டைப் பிரஜாவுரிமை கொண்டவர்களும் வெளியேற அனுமதிக்கப்பட்டுள்ளனர். அத்துடன் எகிப்திலிருந்து பல அம்பியூலன்ஸ் வண்டிகள் முதன்முறையாக காஸாவுக்குள் செல்ல அனுமதிக்கப்பட்டன. அவை காயமடைந்தவர்களை எகிப்துக்கு கொண்டு சென்று சிகிச்சையளிக்கும் என தெரிவிக்கப்படுகிறது.
காஸா மீதான தாக்குதலை இஸ்ரேல் தொடர்ச்சியாக முன்னெடுத்து வரும் நிலையில் அதனைத் தடுத்து நிறுத்துவதற்கு உலக நாடுகள் எந்த முயற்சிகளையும் எடுக்கவில்லை என பல்வேறு தரப்பிலிருந்தும் குற்றச்சாட்டுக்கள் முன்வைக்கப்பட்டுள்ளன.
உலகெங்கும் பலஸ்தீனுக்கு ஆதரவாக வீதிகளில் இறங்கியுள்ள மக்கள் இஸ்ரேலுடனான தமது இராஜதந்திர உறவுகளைத் துண்டிக்குமாறு தத்தமது நாடுகளுக்கு அழுத்தங்களை வழங்கி வருகின்றனர்.
பொலிவியா இஸ்ரேலுடனான உறவைத் துண்டித்துள்ளதுடன் மேலும் பல இலத்தீன் அமெரிக்க நாடுகளும் இஸ்ரேலுக்கான தமது தூதுவர்களை மீளழைத்துள்ளன. கொலம்பியா மற்றும் சிலி ஆகிய நாடுகளே இவ்வாறு தூதுவர்களை மீளழைத்துள்ளன.
எனினும் ஐக்கிய நாடுகள் சபை உட்பட நூற்றுக்கும் மேற்பட்ட நாடுகள் இஸ்ரேலின் தாக்குதலைக் கண்டித்துள்ள போதிலும் அவற்றினால் இஸ்ரேலின் தாக்குதலை நிறுத்தி காஸாவில் வாழும் மக்களைப் பாதுகாக்க எந்தவித நடவடிக்கைகளையும் எடுக்க முடியவில்லை. அமெரிக்கா, பிரித்தானியா போன்ற உலகின் பலம்வாய்ந்த நாடுகள் இஸ்ரேலுக்கு ஆதரவளிப்பதுடன் தொடர்ச்சியாக பொருளாதார மற்றும் இராணுவ உதவிகளையும் வழங்கி வருகின்றமை குறிப்பிடத்தக்கதாகும்.
இதனிடையே, ஈரான், துருக்கி, ரஸ்யா போன்ற நாடுகள் இஸ்ரேலுக்கு எதிரான கடுமையான நிலைப்பாடுகளை வெளியிட்டு, ஹமாஸுக்கு ஆதரவு தெரிவித்துள்ள போதிலும் அவற்றின் எச்சரிக்கைகள் எந்தவகையிலும் இஸ்ரேலை அச்சுறுத்துவதாக அமையவில்லை.
மறுபுறும் சவூதி அரேபியா, கட்டார், குவைத், ஜோர்தான், லெபனான் போன்ற நாடுகளாலும் இஸ்ரேலின் காட்டுமிராண்டித்தனங்களைக் கட்டுப்படுத்த முடியவில்லை. இந்த நாடுகள் இதுவரை இஸ்ரேலுடன் தமது இராஜதந்திர உறவுகளைத் தொடர்ந்த வண்ணமேயுள்ளன. லெபனானிலுள்ள ஹிஸ்புல்லா இயக்கத்தினர் மாத்திரம் இஸ்ரேலுடன் தற்போது நேரடியாக மோதலில் ஈடுபட்டுள்ளனர்.
நேற்று மாலை இச் செய்தி எழுதப்பட்டுக் கொண்டிருக்கும்போதும், காஸாவிலுள்ள ஜபாலியா அகதி முகாம் மீது இரண்டாவது தடவையாக இஸ்ரேல் விமானத் தாக்குதல் நடத்தியதில் 40க்கும் அதிகமானோர் கொல்லப்பட்டுள்ளதாக அல்ஜெஸீரா செய்தி வெளியிட்டுள்ளது.
ஒக்டோபர் 7 முதல் நேற்று வரை பலஸ்தீனில் சராசரியாக தினமும் 420 பேர் இஸ்ரேலினால் படுகொலை செய்யப்பட்டுள்ளனர். ஒவ்வொரு மணித்தியாலமும் காஸா மீது சராசரியாக 42 குண்டுகள் போடப்பட்டுள்ளன. 12 கட்டிடங்கள் தகர்க்கப்பட்டுள்ளன என அல்ஜெஸீரா நேற்று வெளியிட்ட அறிக்கையில் தெரிவித்துள்ளது. – Vidivelli