20 நாட்களாக தாக்குதல் 6500 பலஸ்தீனர்கள் பலி
உயிரிழந்தவர்களில் அரைவாசிப் பேர் சிறுவர்கள் உணவின்றித் தவிக்கும் காஸா மக்கள் பட்டினிச்சாவை எதிர்கொள்ளும் அபாயம்
பலஸ்தீன் மீது இஸ்ரேல் கடந்த 20 தினங்களாக நடாத்தி வரும் தாக்குதல்களில் இதுவரை 6500 க்கும் அதிகமானோர் உயிரிழந்துள்ளனர். இவர்களில் அரைவாசிப் பேர் சிறுவர்களாவர். வான் தாக்குதல்களில் இடிந்து வீழ்ந்த கட்டிடங்களுக்குள் சிக்கியுள்ளவர்களின் எண்ணிக்கையையும் சேர்க்கும் பட்சத்தில் உயிரிழந்தவர்களின் எண்ணிக்கை 8 ஆயிரத்தை தாண்டும் என மத்திய கிழக்கு ஊடகங்கள் செய்தி வெளியிட்டுள்ளன.
இதனிடையே, அடிப்படை வசதிகள் அனைத்தும் துண்டிக்கப்பட்டுள்ளதால் காஸாவில் மக்கள் பட்டினிச் சாவை எதிர்கொண்டுள்ளதாகவும் ஊடகங்கள் செய்தி வெளியிட்டுள்ளன. ‘‘காஸாவுக்குள் உடனடியாக உதவிகள் சென்றடையாவிட்டால் உலகின் மிகப் பெரிய மனிதப் புதைகுழியாக காஸா மாறும்’’ என எகிப்து அரச புலனாய்வுப் பிரிவின் தலைவர் தியா ரஸ்வான் எச்சரித்துள்ளார்.
இதனிடையே இஸ்ரேல் பட்டினியை ஓர் ஆயுதமாக பலஸ்தீனர்கள் மீது பிரயோகிப்பதாக தொண்டு நிறுவனமான ஒக்ஸ்பாம் குற்றஞ்சாட்டியுள்ளது. இதுவரை காஸா மக்களுக்குத் தேவையான உணவில் 2 வீதம் மாத்திரமே அங்கு அனுப்பப்பட்டுள்ளதாக அந்நிறுவனம் தெரிவித்துள்ளது.
‘‘முழு உலகுமே பார்த்திருக்க மில்லியன் கணக்கான மக்கள் கூட்டாக தண்டிக்கப்படுகிறார்கள்’’ என ஒக்ஸ்பாம் மத்திய கிழக்கு பிராந்தியத்திற்கான பணிப்பாளர் அபீ கலீல் தெரிவித்துள்ளார்.
இதனை உறுதிப்படுத்தும் வகையில் பெண் ஒருவர் கருத்து வெளியிடுகையில் ‘‘ 10 பேர் குடும்பத்திற்கு ஒரு நாளைக்கு 2 இறாத்தல் பாண் மாத்திரமே கிடைக்கிறது. ஒரு தண்ணீர் போத்தால்தான் தருகிறார்கள். எம்மிடம் இருப்பது பசி மட்டுமே. வேறு எதுவுமே இல்லை. மலசல கூடத்திற்குச் செல்வதற்கு நான்கைந்து மணித்தியாலங்கள் காத்திருக்க வேண்டும். மக்கள் ஏமாற்றமடைந்துள்ளார்கள். ஏன் இங்களுக்கு இவ்வளவு அநீதி? யா அல்லாஹ் எமக்கு நடப்பது அநீதி… அரபு நாடுகளே எமக்கு நடப்பது அநீதி’’ என அவர் குறிப்பிடுகிறார்.
காஸாவின் சுகாதார சேவைகள் முற்றாக செயலிழந்துவிட்டதாக அறிவிக்கப்பட்டுள்ளது. மின்சாரம் மற்றும் எரிபொருள் இல்லாததன் காரணமாக வைத்தியசாலைகளை நடாத்த முடியாத நிலை தோன்றியுள்ளது.
கான் யூனுஸிலுள்ள நாசர் வைத்தியசாலையில் பணிபுரியும் வைத்தியர் முஹம்மத் கந்தீல் நிலைமையை விபரிக்கையில் ‘‘ என்னால் இங்குள்ள நிலைமைகளை வார்த்தைகளில் வர்ணிக்க முடியாதுள்ளது. நேற்றிரவு காயமடைந்த 300 பேர் கொண்டு வரப்பட்டனர். கொல்லப்பட்ட 150 ஜனாஸாக்கள் வந்தன. கடுமையாக காயமடைந்த இரு கர்ப்பிணித் தாய்மாருக்கு சிசேரியன் அறுவைச் சிகிச்சை செய்தோம். வைத்தியசாலைகளில் பணியாற்றுபவர்கள் ஒவ்வொருவரும் தமது உறவுகளை இழந்து கொண்டிருக்கிறார்கள். ஆனாலும் நாம் வேலை செய்தாக வேண்டியுள்ளது’’ என்றார்.
காஸாவிலுள்ள மக்கள் ஒவ்வொருவருக்கும் அவர்களது கைகளில் அவர்களது பெயர் பொறிக்கப்பட்ட இறப்பர் பட்டிகள் அணிவிக்கப்பட்டுள்ளன. தாக்குதல்களில் உயிரிழக்கும் பட்சத்தில் இலகுவில் அடையாளம் காணும் வகையில் இந்த ஏற்பாடு செய்யப்பட்டுள்ளது.
ஹமாஸ் ஒரு தீவிரவாத இயக்கம் அல்ல என்றும் அது தமது தாய் நாட்டைப் பாதுகாப்பதற்காக போராடும் விடுதலை இயக்கம் என்றும் துருக்கியின் ஜனாதிபதி அர்துகான் தெரிவித்துள்ளார்.
இதேவேளை ஹமாஸ் இயக்கத்தினால் பயணக் கைதிகளாகப் பிடித்து வைக்கப்பட்டுள்ள இஸ்ரேலியர்களை விடுவிப்பது தொடர்பான பேச்சுவார்த்தைகள் தொடர்ச்சியாக இடம்பெற்று வருவதாக கட்டார் தெரிவித்துள்ளது.- Vidivelli