(எஸ்.எம்.எம்.முர்ஷித், ஏ.எச்.ஏ.ஹுஸைன்)
அரசியல் தீர்வு விடயத்தில் தமிழ் தரப்புடனான பேச்சுவர்த்தைகள் இடம்பெற்று வருகின்றன. இந்நிலையில் அரசியல் தீர்வுக்கான அதிகார பகிர்வு பேச்சுவார்த்தைகளில் முஸ்லிம் தரப்பின் வகிபாகம் எவ்வாறு அமைய வேண்டும் என்பது தொடர்பாக எமது அரசியல் தலைமைகள் ஒன்றுபட்டு தீமானமொன்றை மேற்கொள்ள வேண்டும் என சுற்றாடல்துறை அமைச்சர் நஸீர் அஹமத் தெரிவித்தார்.
ஓட்டமாவடி பிரதேச செயலகத்தின் புதிய கட்டட திறப்பு விழா நேற்றுமுன்தினம் பிரதேச செயலாளர் வீ.தவராஜா தலைமையில் இடம் பெற்றது. இந்நிகழ்வில் பிரதம அதிதியாக சுற்றாடல் அமைச்சர் நஷீர் அஹமட் உரையாற்றும் போதே இவ்வாறு தெரிவித்தார்.
அவர் தொடர்ந்து உரையாற்றுகையில்.
முன்னாள் ஜனாதிபதி கோத்தாபாய ராஜபக்ஸ நாட்டை ஆட்சி செய்வதில் சிக்கல் ஏற்பட்ட நிலையில் நாட்டை பாரம் எடுத்து ஆட்சியை செய்யுமாறு தற்போதைய எதிர்கட்சி தலைவர் சஜித் பிரேமதாசாவை அழைத்து சொன்னபோது அவர் பின்வாங்கினார். இந்நிலையில் நாட்டில் ஒரு புரட்சி ஏற்பட்டு விடுமோ என்ற அச்சம் எல்லோர் மத்தியிலும் இருந்தது. அந்த சந்தர்ப்பத்தில்தான் இன்றைய ஜனாதிபதி ரணில் விக்ரமசிங்க தைரியத்தோடு நாட்டை பாரம் எடுத்து பொருளாதார வீழ்ச்சியில் இருந்த நாட்டை கட்டி எழுப்பிக் கொண்டு இருக்கின்றார்.
இந்த சந்தர்ப்பத்தில் தழிழ்தரப்பு அரசியல் கட்சிகளுடன் பேச்சுவார்த்தை இடம் பெற்று அவர்களது கோரிக்கைகள் கேட்டறியப்பட்டுள்ளன. இந்நிலையில் அதிகார பகிர்வில் முஸ்லிம்களுடைய பங்கு என்ன என்கின்ற விடயத்தை மிகவும் தெட்டத் தெளிவாக ஆணித்தரமாக முஸ்லிம் அரசியல் தலைமைகள் எல்லோரும் உடன்பாட்டுக்கு வரவேண்டிய தேவை இருந்தது.
இலங்கை இந்திய ஒப்பந்தம் கைச்சாத்திடப்பட்ட போது இரவோடு இரவாக முஸ்லிம்களுடைய உரிமைகள் பறிக்கப்பட்ட ஒரு அரச சாசனமாகத்தான் பதின்மூன்றாவது திருத்தம் இருந்தது. அதன் பின்னர் வடக்கு கிழக்கு இணைக்கப்பட்டு முஸ்லிம் சமுகத்தினுடைய ஒட்டு மொத்த அரசியல் தலைவிதியை மாற்றிய ஒரு வரலாற்றினை நாங்கள் எப்போதம் மறந்துவிட முடியாது.
அவ்வாறானதொரு வரலாறு மீண்டும் எழுதப்பட்டு விடக் கூடாது என்பதற்காக நாங்கள் மிகவும் தெளிவாக இருக்கின்றோம். இரவோடு இரவாகத்தான் பதின்மூன்றாவது திருத்தம் இந்தியாவினுடைய அழுத்தத்தினால் நிறைவேற்றப்பட்டது. அப்போது முஸ்லிம்களால் எதுவும் பேசமுடியாமல் இருந்தது. அப்போதிருந்த ஜே.ஆர் ஜெயவர்த்தனவிடம் முஸ்லிம் பாராளுமன்ற உறுப்பினர்கள் தலைமையில் முஸ்லிம்களது அரசியல் நிலவரம் என்ன என்று கதைப்பதற்கு சென்ற வேளையில் உங்களுக்கு கதவு திறந்து இருக்கின்றது வெளியே போகலாம் என்று சொல்லப்பட்டது. அவ்வாறான ஒரு நிலைமைக்கு முஸ்லிம்கள் மீண்டும் தள்ளப்பட்டு விடக்கூடாது என்று நாங்கள் தெளிவாக இருக்கின்றோம் என்று தெரிவித்தார்.- Vidivelli