(ஏ.ஆர்.ஏ.பரீல்)
ஹஜ் யாத்திரிகர்கள் கட்டாயமாக ஏற்றிக்கொள்ளவேண்டிய நோய்த்தடுப்பூசி மருந்து இலங்கையில் இருப்பில் இல்லாத நிலையில் குறிப்பிட்ட நோய்த்தடுப்பூசி மருந்து அதற்கான விதிமுறைகளை மீறி இறக்குமதி செய்யப்பட்டபோது சில வைத்திய நிலையங்கள் ஊடாக ஹஜ் யாத்திரிகர்களுக்கு விநியோகிக்கப்பட்டு வருவதாக அரச வைத்திய அதிகாரிகள் சங்கத்தின் (GMOA) தலைவர் டாக்டர் ஹரித அளுத்கே குற்றம் சுமத்தி உள்ளார்.
அவர் மேலும் குறிப்பிடுகையில் ‘இந்தத் தடுப்பூசி ஹஜ் யாத்திரிகர்களுக்கு கட்டாயமாகும். சவூதி அரேபியாவில் மக்கா, மதீனாவில் யாத்திரிகர்கள் ஒன்று கூடும்போது தோற்றுநோய்க்குள்ளாகாமல் இருப்பதற்கே இத்தடுப்பூசி ஏற்றிக்கொள்ளப்படுகிறது. சவூதி அரேபியாவின் அதிகாரிகள், சர்வதேச சுகாதார அமைப்புகள், உலக சுகாதார ஸ்தாபனம் (WHO) என்பன ஹஜ் யாத்திரை மேற்காள்ளும் ஒவ்வொருவரும் தடுப்பூசி ஏற்றிக்கொள்ளவேண்டும் என கட்டாயப்படுத்தியுள்ளது.
ஹஜ் யாத்திரை வருடம் முழுவதும் மேற்கொள்ளப்படு வதில்லை. ஒரு குறிப்பிட்ட காலத்திலே மேற்கொள்ளப் படுகிறது. ஹஜ் யாத்திரிகர்கள் தடுப்பூசி ஏற்றிக்கொள்வது கட்டாயமாகும்.
தற்போது இந்த தடுப்பூசி விதிகளுக்கு மாறாக கள்ள வழியிலே நாட்டுக்குள் கொண்டு வரப்பட்டுள்ளது. இந்த தடுப்பூசி குறிப்பிட்ட குளிரூட்டப்பட்ட நிலையிலே போக்குவரத்து செய்யப்படவேண்டும். தடுப்பூசி ஏற்றப்படும் வரை குறிப்பிட்ட சீதோஷ்ண அளவு பேணப்படவேண்டும்.
ஆனால் இந்த தடுப்பூசிகள் தேவையான சீதோஷ்ண அளவு இன்றி பைகளில் எடுத்து வரப்பட்டுள்ளதாக தெரிவிக்கப் படுகிறது. இது உண்மையென்றால் தடுப்பூசியின் தரம் எவ்வாறு பேணப்பட்டிருக்கும்.
இந்நிலைமை மிகவும் அபாயகரமானதாகும். நோயாளிகளை அல்லது தடுப்பூசி ஏற்றிக்கொள்பவர்களை ஏமாற்றுவதாகும். அத்தோடு நாட்டின் சட்டத்தை மீறியதாகும். அதனால் சம்பந்தப்பட்ட அதிகாரிகள் இதன் உண்மை தன்மை என்ன என்பதை நாட்டு மக்களுக்குத் தெளிவுபடுத்த வேண்டும்.
அத்தோடு ஹஜ் யாத்திரிகர்கள் வருடாந்தம் இலங்கையிலிருந்து ஆயிரக்கணக்கானோர் ஹஜ் யாத்திரை செல்கிறார்கள். ஹஜ் யாத்திரிகர்கள் கட்டாயமாக நோய்த்தடுப்பூசி ஏற்றிக் கொண்டிருக்கவேண்டும். அதற்கான ஆவணம் சவூதியில் பரீசீலிக்கப்படும்.
இந்நிலையில் தற்போது குறிப்பிட்ட நோய்த்தடுப்பூசி எதுவும் இலங்கையில் இருப்பில் இல்லை என்றே ஊடகங்கள் வெளிப்படுத்தியுள்ளன.
என்றாலும் பதிவு செய்யப்படாத தடுப்பூசிகள் தொகையொன்று சட்டவிரோதமாக தவறான வழியில் நாட்டுக்குள் கொண்டு வரப்பட்டுள்ளது என குற்றம் சுமத்தப்பட்டுள்ளது. இவ்வாறு நாட்டுக்குள் கொண்டு வரப்பட்டுள்ள தடுப்பூசிகள் சில வைத்திய நிலையங்கள் ஊடாக தேவையானவர்களுக்கு விநியோகிக்கப்பட்டுள்ளதாகவும் குற்றச்சாட்டுக்கள் முன்வைக்கப்பட்டுள்ளது.
சுகாதாரத்துறையினர் ஹஜ் யாத்திரை காலத்தில் இவ்வாறான பிரச்சினைகள் ஏற்படும் என்பதை ஏற்கனவே தெரிந்து வைத்திருக்க வேண்டும். இக்காலத்தில் நோய்த்தடுப்பூசி தேவைப்படும் என்பதை கவனத்தில் கொண்டிருக்கவேண்டும்.
ஹஜ் யாத்திரிகர்களையும் மக்களையும் நோய்த்தொற்று ஆபத்திலிருந்தும் பாதுகாப்பதே இதன் நோக்கம்.
எமது நாட்டின் சுகாதார அதிகாரிகள் ஹஜ் யாத்திரிகர்களுக்குத் தேவையான குறிப்பிட்ட தடுப்பூசி மருந்தினை திட்டமிட்டு இருப்பில் வைத்திருப்பது அவர்களது பொறுப்பாகும்.இந்த தடுப்பூசி மருந்து காலம் முழுவதும் தேவைப்படுவது அல்ல, ஹஜ் யாத்திரை காலத்திலே தேவைப்படுகிறது. ஆனால் சுகாதார அமைச்சு தனது பொறுப்பிலிருந்தும் தவறியுள்ளது. மருந்து மாபியாகாரர்களுக்கு, இந்நிலைமை மூலம் சந்தர்ப்பம் வழங்கியுள்ளது. இந்த தடுப்பூசி மருந்து சாதாரண மருந்தல்ல. இலகுவில் இறக்குமதி செய்ய முடியாது.
இம்மருந்து பயனாளிக்கு ஏற்றப்படும்வரை உரிய சீதோஷண நிலை பேணப்படவேண்டும். ஆனால் இந்த நிலைமை பேணப்படாது இறக்குமதி செய்யப்பட்டுள்ளது. இலங்கை முஸ்லிம்கள் தமது மார்க்க கடமையினை மேற்கொள்வதற்கு தடைகளின்றி சந்தர்ப்பம் வழங்கவேண்டும்.இந்நிலைமையினால் பாதிக்கப்பட்டுள்ள முஸ்லிம்களுக்கு அரசாங்கம் மாற்று வழியினை ஏற்பாடு செய்ய வேண்டும்.
இவ்விவகாரத்தில் மாற்றுவழி ஏற்பாடு செய்யப்படவேண்டும். சுகாதார அமைச்சு உடனடியாக இது பற்றி தெளிவுபடுத்த வேண்டும். பதில் வழங்க வேண்டும் என்றார்.- Vidivelli