கொவிட் 19 தொற்றினால் மரணித்தவர்களின் சடலங்களை அடக்கம் செய்ய முடியாது; எரிக்கவே முடியும் எனும் அறிவுபூர்வமற்ற கொள்கையை நடைமுறைப்படுத்திய ஒரே நாடு இலங்கையே என்பதை உலகமே அறியும். இந் நிலையில் இந்தக் கொள்கையை நடைமுறைப்படுத்துமாறு நிபுணர்கள் என்றழைக்கப்படும் சிலர் தம்மை தவறாக வழிநடாத்தியதாக சுகாதார அமைச்சர் கெஹலிய ரம்புக்வெல்ல பாராளுமன்றத்தில் தெரிவித்த கருத்து தற்போது பலரதும் கவனத்தை ஈர்த்துள்ளது.
ஸ்ரீ லங்கா முஸ்லிம் காங்கிரஸ் தலைவரும் பாராளுமன்ற உறுப்பினருமான ரவூப் ஹக்கீம் கடந்த வாரம் இது தொடர்பில் சபையில் கேள்வியெழுப்பியிருந்தார். அதற்கு பதிலளித்த சுகாதார அமைச்சர், குறித்த நிபுணர் குழுவில் அங்கம் வகித்த பேராசிரியர் மெத்திகா விதானகே என்பவரே இக் கொள்கையை நடைமுறைப்படுத்த வேண்டும் என்பதில் விடாப்பிடியாக இருந்ததாவும் அவர் அரசாங்கத்தை தவறாக வழிநடாத்தியுள்ளதை தற்போது தாம் உணர்வதாகவும் குறிப்பிட்டிருந்தார். உண்மையில் அமைச்சரின் இந்த பதில் சிறு பிள்ளைத்தனமானதாகும்.
சடலங்களை கட்டாய தகனம் செய்யும் தீர்மானமானது இலங்கைக்கு சர்வதேச அளவில் பாரிய தலைகுனிவை ஏற்படுத்தியிருந்தது. குறிப்பாக 57 முஸ்லிம் நாடுகளை இலங்கை பகைத்துக் கொள்ள வேண்டி ஏற்பட்டது. மேலும் பல சர்வதேச மனித உரிமை அமைப்புகளின் கோபத்தைச் சம்பாதிக்க வேண்டியிருந்தது. உள்நாட்டில் இதற்கு எதிராக குரல் கொடுக்காதவர்களே இல்லை என்ற அளவுக்கு இவ்விவகாரம் எதிர்ப்பைச் சம்பாதித்திருந்தது. அமைச்சரவைக்குள் கூட இந்த விவகாரம் பிளவுகளை ஏற்படுத்தியது. இவ்வாறான எதிர்ப்புகள் இருக்கத்தக்கதாக, ஒரே ஒரு நிபுணரின் நிலைப்பாட்டை மதித்து இந்த கட்டாய தகனக் கொள்கையை நடைமுறைப்படுத்தினோம் என அமைச்சர் கூறுவது வேடிக்கையானதாகும்.
உலக சுகாதார நிறுவனம் கொவிட் 19 இனால் மரணிப்பவர்களை அடக்கம் செய்ய முடியும் என அனுமதி வழங்கிய நிலையிலும் உலகின் 180 க்கும் மேற்பட்ட நாடுகளில் இவ் வைரஸ் தொற்றினால் மரணிப்பவர்கள் அடக்கம் செய்யப்பட்ட நிலையிலும் ‘எரிக்க மட்டுமே முடியும்’ என இலங்கையில் எடுக்கப்பட்ட தீர்மானம் முழுக்க முழுக்க அரசியல் பின்னணி கொண்டது என்பது வெளிப்படை உண்மையாகும். சுகாதார அமைச்சின் நிபுணர்களின் வழிகாட்டலிலேயே இத் தீர்மானம் எடுக்கப்பட்டது என ஜனாதிபதி முதல் அரச அதிகாரிகள் வரை இதற்கு வியாக்கியானம் கூறினாலும் அதில் எந்தவித உண்மையும் இல்லை என்பது பின்னாட்களில் வெட்ட வெளிச்சமாகியது.
அப்போதைய சுகாதார அமைச்சர் பவித்ரா வன்னியாராச்சி நியமித்த குழுவுக்கு மேலதிகமாக கொவிட் கட்டுப்பாடு தொடர்பான அப்போதைய இராஜாங்க அமைச்சர் சுதர்ஷினி பெர்ணான்டோ புள்ளே, 11 பேர் கொண்ட நிபுணர் குழுவொன்றை நியமித்திருந்தார். குறித்த குழுவில் திறமைவாய்ந்த வைரஸ் தொடர்பான நிபுணர்கள் அங்கம் வகித்தனர். இவர்கள் சடலங்களை அடக்கம் செய்ய முடியும் என அனுமதி வழங்கியிருந்ததுடன் இதன் மூலம் நீர் மாசடைவதற்கான எந்தவித ஆதாரங்களும் இல்லை என்றும் குறிப்பிட்டிருந்தனர். இதற்கு மேலதிகமாக புகழ்பெற்ற தொற்றுநோயியல் நிபுணர் பேராசிரியர் மலிக் பீரிஸ் போன்றவர்கள் கூட நிலத்தடி நீரினால் ஒருபோதும் வைரஸ் பரவாது எனத் தெளிவாகக் குறிப்பிட்டிருந்தனர். எனினும் இவற்றையும் முன்னாள் ஜனாதிபதி கோட்டபாய தலைமையிலான அரசாஙகம் கருத்திலெடுக்கவில்லை. இந் நிலையில் இன்று யாரோ ஒரு சிலர் தம்மை தவறாக வழிநடாத்திவிட்டனர் என இலகுவாகக் கூறித் தப்பி விட அனுமதிக்க முடியாது.
எனவேதான் இந்த விவகாரத்தை முஸ்லிம் சமூகமும் ஏனைய மனித உரிமை அமைப்புகளும் தீவிரமாக கவனத்திற்குட்படுத்த வேண்டும். இந்த தவறான தீர்மானத்திற்கமைய எரிக்கப்பட்டவர்களதும் ஓட்டமாவடியில் அடக்கம் செய்யப்பட்டவர்களதும் அடிப்படை உரிமைகள் பாதிக்கப்பட்டுள்ளதாக கருதி அடிப்படை உரிமை வழக்குகள் தொடரப்பட வேண்டும். பாரிய தொகை நஷ்டயீடு கோரப்பட்ட வேண்டும். சம்பந்தப்பட்டவர்களைத் தண்டிக்குமாறும் பாதிக்கப்பட்ட மக்களுக்கு நஷ்டயீடு வழங்குமாறும் அரசாங்கத்திற்கு அழுத்தம் வழங்க வேண்டும். இந்தக் கோரிக்கைகள் சமூகத்தின் சகல மட்டங்களிலிருந்தும் முன்வைக்கப்பட வேண்டும் என வலியுறுத்த விரும்புகிறோம்.- Vidivelli