ஏ.ஆர்.ஏ.பரீல்
உள்ளூராட்சி மன்றத் தேர்தல் இன்று கானல் நீராகிவிட்டது. உள்ளூராட்சி மன்றத் தேர்தல் இவ்வருடம் நடத்தப்படமாட்டாது. அடுத்த வருட முற்பகுதியில் ஜனாதிபதி தேர்தலே நடத்தப்படும் என்பது ஜனாதிபதியினாலும் அதிகாரத்தில் உள்ளவர்களாலும் சமூக மயப்படுத்தப்பட்டு விட்டது.
கடந்த மார்ச் மாதம் 9ஆம் திகதி நடாத்தப்பட்டிருக்க வேண்டிய உள்ளூராட்சி மன்றத்தேர்தல், தேர்தல்கள் ஆணைக்குழுவினால் எதிர்வரும் 25 ஆம் திகதி நடாத்தப்படும் என அறிவிப்புச் செய்துள்ளபோதும் அதுவும் கானல் நீரே.
பல்வேறு காரணங்களைக்கூறி உள்ளூராட்சி மன்றத் தேர்தல் பின் தள்ளப்பட்ட நிலையில் தேர்தலை பிற்போடுவதற்கு அரசுக்கு புதிய காரணம் ஒன்று கைகூடியுள்ளது. அதுவே உள்ளூராட்சி சபைகளுக்கான புதிய எல்லை நிர்ணய அறிக்கையாகும். புதிய எல்லை நிர்ணய அறிக்கை தொடர்பில் பாராளுமன்ற உறுப்பினர்கள் ரவூப் ஹக்கீம், ரிஷாட் பதியுதீன் மற்றும் ஜனாதிபதி சட்டத்தரணி பாயிஸ் முஸ்தபா என்போர் அதிருப்தியை வெளியிட்டிருந்தனர். அறிக்கையை மீளாய்வு செய்து மாற்று வழிகளை கையாளுமாறு கோரியிருந்தனர்.
உள்ளூராட்சி மன்றங்களுக்கான எல்லை நிர்ணயப்பணிகள் நிறைவு படுத்தப்பட்டு கடந்த பெப்ரவரி மாதம் 28 ஆம் திகதி அறிக்கை பிரதமரிடம் கையளிக்கப்பட வேண்டும் என்றே எல்லை நிர்ணயக்குழு நியமிக்கப்பட்டபோது காலக்கெடு வழங்கப்பட்டது. என்றாலும் திட்டமிட்ட தினத்தில் அறிக்கை கையளிக்கப்படவில்லை. தொடர்ந்தும் பின் தள்ளப்பட்டது. தற்போது அறிக்கையின் நகல் பிரதமரிடம் கையளிக்கப்பட்டுள்ளது. உள்ளூராட்சி மன்றங்களின் எண்ணிக்கையையும் அவற்றின் உறுப்பினர் எண்ணிக்கையையும் 50 வீதத்தால் குறைக்கும் நோக்குடனே ஜனாதிபதி எல்லைநிர்ணய குழுவொன்றை நியமிப்பதற்கு உத்தரவிட்டார். நாட்டின் பொருளாதார கட்டமைப்பு வீழ்ச்சியடைந்தமையால் சுமார் 8500 உள்ளூராட்சி மன்ற உறுப்பினர்களை தொடர்ந்தும் கொண்டிருக்க முடியாது. இந்த எண்ணிக்கையை 50 வீதத்தால் குறைக்க வேண்டும் என்பதற்காகவே புதிய எல்லை நிர்ணயம் மேற்கொள்ளப்பட்டது.
சிறுபான்மை உறுப்பினர்
தெரிவுக்கு ஆப்பு
இதேவேளை அரசாங்கம் உள்ளூராட்சி மன்றத் தேர்தலை பிற்போடும் செயற்பாட்டில் இருப்பதால் ஏற்கனவே அறிவிப்புச் செய்த தேர்தலை இரத்துச் செய்து விட்டு உறுப்பினர் தொகையை அரைவாசியாகக் குறைக்கின்ற புதிய எல்லை நிர்ணயத்தின் அடிப்படையிலான தேர்தலை அறிவிப்புச் செய்வதற்கும் வாய்ப்பிருக்கிறது.
எல்லை நிர்ணய அறிக்கையின் தகவல்களின் அடிப்படையில் நோக்கினால் சிறுபான்மை சமூகத்தினர் பெரும் எண்ணிக்கையில் வாழ்ந்து வரும் வட்டாரங்கள் புதிய எல்லை நிர்ணயத்தின் மூலம் துண்டாடப்பட்டு அந்த வட்டாரங்கள் பெரும்பான்மை சமூகத்தின் பிடிக்குள் கொண்டுவரப்பட்டுள்ளன. தென்னிலங்கையில் இது பரவலாக நடந்திருக்கிறது. பொதுவாக நாடு பூராகவும் இந்நிலைமை திட்டமிட்டு மேற்கொள்ளப்பட்டுள்ளதாகத் தெரிவிக்கப்படுகிறது.
வடக்கு, கிழக்கு மற்றும் மத்திய மாகாணத்திலும் இதே நிலைமையே ஏற்பட்டுள்ளது. சிறுபான்மை மக்களின் பிரதிநிதித்துவத்தை இல்லாமற் செய்யும் வகையில் உள்ளூராட்சி மன்றங்களின் எல்லை நிர்ணய அறிக்கை தயாரிக்கப்பட்டுள்ளதே? ஏன் இந்தப்பாகுபாடு? என விடிவெள்ளி மஹிந்த தேசப்பிரியவிடம் வினவியது. அவர் இதற்கு மறுப்பு தெரிவிக்கிறார்.
பொது மக்களின் அரசியல் கட்சிகளின் சமூக அமைப்புகளின் ஆலோசனைகளும், கருத்துகளும் கோரப்பட்டன. ஆலோசனைகளும், சிபாரிசுகளும் எழுத்து மூலம், கொழும்பு, நாராஹேன்பிட்டி, நில அளவைத் திணைக்களத்தில் இயங்கி வரும் எல்லைநிர்ணய தலைமைக் காரியாலயத்துக்கு அனுப்பி வைக்கும்படி கோரப்பட்டது. கிடைக்கப்பெற்ற ஆலோசனைகள் கவனத்திற்கொள்ளப்பட்டன. பெரும்பாலான பிரதேசங்களிலிருந்து இவ்வாறான ஆலோசனைகள் கிடைக்கவில்லை என மஹிந்த தேசப்பிரிய தெரிவித்தார்.
மாவட்ட ரீதியில் ஒவ்வொரு மாவட்டத்திலும் அரசாங்க அதிபர்களின் தலைமையில் உப குழுக்கள் அமைக்கப்பட்டிருந்தன. அக்குழுக்கள் அந்தந்த மாவட்டங்களின் எல்லை நிர்ணய பணிகளை முன்னெடுத்தது. அக்குழுவில் நில அளவைத்திணைக்களம், தேர்தல் திணைக்களம், புள்ளி விபரத் திணைக்களம், உள்ளூராட்சி திணைக்களம், என்பனவற்றின் அதிகாரிகள் உள்ளடங்கியிருந்தனர். மாவட்ட குழுக்களின் எல்லை நிர்ணய அறிக்கைகள் தலைமைக் காரியாலயத்துக்கு அனுப்பி வைக்கப்பட்டன. அவை அங்கு பரிசீலனைக்கு உட்படுத்தப்பட்டு எல்லை நிர்ணயத்தில் பிரச்சினைகள் இருந்தால் அவை நிவர்த்தி செய்யப்பட்டன. குடிசன மதிப்பீட்டு திணைக்களம் 2020 ஆம் ஆண்டு மேற்கொண்ட மதிப்பீட்டளவிலான சனத்தொகை தரவுகளை கவனத்திற் கொள்ளுமாறு மாவட்ட எல்லை நிர்ணயக்குழுக்களுக்கு அறிவுறுத்தப்பட்டிருந்தது.
திட்டமிட்ட செயற்பாடு
மஹிந்த தேசப்பிரிய தலைமையிலான எல்லை நிர்ணயக்குழு, மாவட்ட ரீதியில் அரசாங்க அதிபர்களின் தலைமையில் குழுக்களை நியமித்து இந்தப் பொறுப்பினை அக்குழுக்களிடமே கையளித்திருந்தது. மாவட்ட ரீதியிலான அதிகாரிகளே சிறுபான்மை பிரதிநிதித்துவத்தை இல்லாமற் செய்யும் வகையில் அல்லது குறைக்கும் வகையில் எல்லை நிர்ணயத்தை பூர்த்தி செய்துள்ளனர். இந்த அறிக்கைகள் கொழும்பிலுள்ள எல்லை நிர்ணய தலைமைக்காரியாலயத்துக்கு அனுப்பி வைத்த பின்னராவது தலைமைக்குழு அறிக்கைகளை ஆராய்ந்து பரீசிலனை செய்திருக்க வேண்டும்.
ஆனால் நாடுபூராகவும் இது வரை இருந்துவந்த சிறுபான்மை பிரதிநிதித்துவம் திட்டமிட்டு இல்லாமற் செய்யப்பட்டுள்ளது. உள்ளூராட்சிமன்ற பிரதிநிதித்துவத்தை 50 வீதமாகக் குறைக்கும் நோக்கிலே எல்லை நிர்ணயம் மேற்கொள்ளப்பட்டது என்பதை நாம் ஏற்றுக்கொள்கிறோம். ஆனால் முற்றாக சிறுபான்மை இனப்பிரதிநிதித்துவத்தை இல்லாமற் செய்யும் வகையிலான எல்லை நிர்ணயம் பல்வேறு சமூகப் பிரிவுகள் வாழும் நாட்டுக்குப் பொருத்தமற்றதாகும். எல்லை நிர்ணயக்குழுவின் தலைவர் இவ்விடயத்தில் கரிசனை கொள்ள வேண்டும். மாறாக பெரும்பாலான பகுதிகளிலிருந்து ஆலோசனைகளும், கருத்துகளும் கிடைக்கவில்லை எனத்தெரிவிப்பது ஏற்றுக்கொள்ள முடியாததாகும்.
சிறுபான்மை பிரதிநிதித்துவம் புதிய எல்லை நிர்ணயத்தின் மூலம் இல்லாமலாக்கப்பட்டமைக்கு உதாரணமாக கண்டி மாவட்டத்தின் பாத்ததும்பறை பிரதேச சபையைக் குறிப்பிடலாம். பாத்ததும்பறை பிரதேச சபையில் 32 ஆக இருந்த பிரதிநிதித்துவம் தற்போது 9 ஆகக் குறைக்கப்பட்டிருக்கிறது.
அங்குள்ள வாக்காளர்களின் எண்ணிக்கை 60,965 இவர்களில் 14,000 பேர் (உடதலவின்ன, மடவளை) முஸ்லிம்கள். மற்றும் சுமார் 1000 பேர் தமிழர்கள். மொத்த வாக்காளர் தொகையில் இது 25 சதவீதம். இதுவரை காலம் ஒவ்வொரு முறையும் சபையில் ஐந்து அல்லது 6 பேர் பிரதிநிதித்துவம் பெற்று வந்துள்ளனர். தற்போது புதிய எல்லை நிர்ணயத்தின்படி இச்சபை ஒரு சிறுபான்மை உறுப்பினரைக்கூட பெற்றுக்கொள்ள முடியாத நிலைமை உருவாகியுள்ளது.
இந்தப் பிரதேச சபையில் முஸ்லிம்கள் பெருவாரியாக வாழ்கின்ற கிராம சேவகர் பிரிவுகள் முறையே 611, 612, 637, 638, 639 ஆகும். இப்பிரிவுகள் அனைத்து கிராம சேவகர் பிரிவுகளுடன் தற்போது இணைக்கப்பட்டுள்ளன.
611, 612 பிரிவுகள் மற்றும் 637, 638 பிரிவுகள் ஏற்கனவே ஒன்றாக இணைக்கப்பட்டிருந்தமை குறிப்பிடத்தக்கது. பாத்ததும்பறை பிரதேச சபையில் குறைந்தது மூன்று முஸ்லிம் வட்டாரங்கள் உருவாக்கப்பட்டிருக்க வேண்டும். அவை புவியியல் ரீதியாக ஒரே நிலத்தொடருடன் இயல்பாகவே அமைந்திருக்கின்றன என்பது குறிப்பிடத்தக்கது. தற்போது அமைக்கப்பட்டிருக்கும் வட்டாரங்களில் முஸ்லிம் வாக்காளர்கள் சிதறடிக்கப்பட்டிருப்பதை பின்வரும் வட்டார பட்டியலிலிருந்து தெளிவாக அவதானிக்க முடியும்.
பாத்ததும்பற பிரதேச சபை
புதிய வட்டாரங்கள்
மீகம்மன: 594, 601, 602, 603, (612)
பொல்கொல்ல: 609, 610, (611), 615.
அபேசிங்க கம: 635, 636, (637), 639.
மடவள: 604, (638), 640, 641.
பிடிேய கெதர: 595, 596, 597, 634, 633, (639), 642, 643, 644, 645.
வத்தேகம: 594, 598, 599, 600, 620, 621, 622.
பரணகம: 623, 624, 625, 627, 628, 631, 632.
கஹல்ல : 605, 606, 608, 613, 614.
அபதென்ன: 616, 617, 618, 619, 629, 630. முதல் ஐந்து வட்டாரங்களுடன் முஸ்லிம் கிராம சேவகர் பிரிவுகள் இணைக்கப்பட்டு முஸ்லிம் பிரதி நிதித்துவம் அப்பிரிவுகளில் சிறுபான்மை ஆக்கப்பட்டுள்ளது.
பிரதமரிடம் கோரிக்கை
எல்லை நிர்ணய குழுவின் அறிக்கை நாடெங்கும் சிறுபான்மையினரின் பிரதிநிதித்துவத்தை இல்லாமற் செய்தும் அல்லது குறைக்கும் வகையிலே அமைந்துள்ளது என ஸ்ரீலங்கா முஸ்லிம் காங்கிரஸ் தலைவரும் பாராளுமன்ற உறுப்பினருமான ரவூப் ஹக்கீம், அகில இலங்கை மக்கள் காங்கிரஸின் தலைவர் ரிசாத் பதியூதீன் மற்றும் ஜனாதிபதி சட்டத்தரணி பாயிஸ் முஸ்தபா என்போர் பிரதமரும், விடயத்துக்குப் பொறுப்பான அமைச்சருமான தினேஷ் குணவர்தனவிடம் தெரிவித்துள்ளனர். அத்தோடு திட்டமிட்டபடி குழுவின் அறிக்கையை வெளியிட வேண்டாமெனவும் கோரியுள்ளனர்.
எல்லை நிர்ணய அறிக்கை சிறுபான்மையினரின் பிரதிநிதித்துவத்தைக் குறைக்கும் வகையிலே அமைந்துள்ளது. இதனை யாரிடம் முறையிட வேண்டுமென நாம் எல்லை நிர்ணய குழுவின் தலைவர் மஹிந்த தேசப்பிரியவிடம் வினவினோம்.
“முறைப்பாடுகளை விடயத்துக்குப் பொறுப்பான அமைச்சரிடம் முன்வைக்கலாம். முறைப்பாடுகள் தொடர்பில் ஆராய்வதற்கு எல்லை நிர்ணய மீளாய்வு குழுவொன்றினை நியமிக்கும் அதிகாரம் அமைச்சரிடமே உள்ளது’’ என அவர் தெரிவித்தார்.
பாராளுமன்ற உறுப்பினர்கள் ரவூப் ஹக்கீம், ரிசாத் பதியுதீன் மற்றும் ஜனாதிபதி சட்டத்தரணி பாயிஸ் முஸ்தபாவின் வேண்டுகோள் ஏற்றுக்கொள்ளப்பட்டால் எல்லை நிர்ணயங்களை மாற்றியமைப்பதற்கு காலம் செல்லலாம்.
இந்தத் தாமதத்தை நோக்கியே இதுவரை அரச தரப்பும் நகர்வுகளை முன்னெடுத்துள்ளது எனக் குறிப்பிடலாம். ஏனென்றால் உள்ளூராட்சித் தேர்தலை ஜனாதிபதித் தேர்தலுக்கு முன்பு நடத்தாமலிருப்பதே ஜனாதிபதி ரணில் விக்கிரமசிங்கவின் திட்டமாகும்.
பாராளுமன்ற உறுப்பினர்
ரவூப் ஹக்கீம்
‘உள்ளூராட்சி மன்றங்களின் புதிய எல்லை நிர்ணயம் வடக்கு, கிழக்கில் மாத்திரமல்ல ஏனைய பகுதிகளிலும் சிறுபான்மை பிரதிநிதித்துவத்தை சவாலுக்குட்படுத்தியுள்ளது. அதனால் அவசரப்பட்டு அறிக்கை தொடர்பில் செயற்பட வேண்டாம் என நாம் பிரதமரிடம் கோரிக்கை விடுத்திருக்கிறோம். எமது கோரிக்கைக்கு பிரதமர் செவிசாய்ப்பார் என்ற நம்பிக்கை இருக்கிறது’ என ஸ்ரீலங்கா முஸ்லிம் காங்கிரஸ்ஸின் தலைவர் ரவூப் ஹக்கீம் எம்.பி. தெரிவித்தார்.
இது தொடர்பில் அவர் மேலும் தெரிவிக்கையில், உள்ளூராட்சி மன்றங்களின் எண்ணிக்கையையும் உறுப்பினர் எண்ணிக்கையையும் 50 வீதத்தால் குறைப்பதற்காகவே புதிய எல்லை நிர்ணயம் மேற்கொள்ளப்பட்டுள்ளது. இதன் காரணமாகவும் சிறுபான்மை பிரதிநிதித்துவம் பாதிக்கப்பட்டுள்ளது. அதனால் உள்ளூராட்சி சபைகளின் உறுப்பினர் எண்ணிக்கையை 50 வீதத்தால் குறைப்பதைத் தவிர்த்து 1/3 வீதமாக குறைப்பதற்கு நடவடிக்கை மேற்கொள்ளும்படியும் அதன் அடிப்படையில் எல்லை நிர்ணயத்தை அமைத்துக்கொள்ளும்படியும் பிரதமருக்கு ஆலோசனை வழங்கியிருக்கிறோம்.
2/3 பிரதிநிதித்துவம் உள்வாங்கப்படும் வகையில் எல்லை நிர்ணயம் அமைந்தால் இப்பிரச்சினைக்கு ஓரளவு தீர்வு காணலாம். அத்தோடு வட்டார மற்றும் விகிதாசார அடிப்படையிலான கலப்பு முறையிலன்றி பழைய தேர்தல் முறையின் கீழ் (விகிதாசார முறை) உள்ளூராட்சி மன்ற தேர்தலை நடாத்தும் படியும் கோரியுள்ளோம். எல்லை நிர்ணயம், மற்றும் உள்ளூராட்சி மன்றத்தேர்தல் எல்லா சமூகங்களுக்கும் நியாயம் கிட்டும் வகையில் அமைய வேண்டும்.
சபையில் ஒரு கட்சியின் பெரும்பான்மையை ஸ்திரப்படுத்திக் கொள்ளும் வகையில் தேர்தல் அமைய வேண்டும். இல்லையேல் ஒரு கட்சிக்குள்ளேயே பிரச்சினைகள் ஏற்படும். எங்கள் கட்சிக்குள்ளும் கடந்த காலங்களில் பிரச்சினை ஏற்பட்டது. இவ்வாறான நிலைமைகள் உருவாகாத வண்ணம் உள்ளூராட்சி மன்றங்கள் இயங்க வேண்டும்.
எல்லை நிர்ணய அறிக்கை விவகாரத்தில் சில ஏற்பாடுகளைச் செய்து கொள்ளலாம் என்ற நம்பிக்கை இருக்கிறது. எமது கோரிக்கைகள் சாத்தியப்படும் என்ற நம்பிக்கை இருக்கிறது. மக்கள் விடுதலை முன்னணியும் எல்லை நிர்ணய அறிக்கை விவகாரத்தில் முரண்பட்டே உள்ளது.
ஐக்கிய சமாதான கூட்டமைப்பு கட்சி
எமது நாட்டில் எந்தவொரு ஆணைக்குழு நியமிக்கப்பட்டு அறிக்கை சமர்ப்பிக்கப்பட்டாலும் அதில் முஸ்லிம்களுக்கு அநீதி இழைக்கப்படுகிறது. இதேபோன்று எல்லை நிர்ணயம் என்று ஒன்று நடந்தால் வட, கிழக்கு முஸ்லிம்கள் அச்சப்படுகிறார்கள். உள்ளூராட்சி மன்றங்களுக்கான புதிய எல்லை நிர்ணயத்திலும் முஸ்லிம்களுக்கு அநீதி இழைக்கப்பட்டுள்ளது என ஐக்கிய சமாதானக் கூட்டமைப்பின் செயலாளர் நாயகம் ஹசன் அலி தெரிவித்தார்.
உள்ளூராட்சி மன்ற எல்லை நிர்ணயம் தொடர்பில் அவர் மேலும் கருத்து தெரிவிக்கையில், “எல்லை நிர்ணயம் தொடர்பில் தமிழ், முஸ்லிம் கட்சிகளை அழைத்து கலந்துரையாடப்பட்டது. பெரும்பான்மையின கட்சிகளோடு தனியாக பேச்சுவார்த்தை நடத்தப்பட்டது. கலந்துரையாடலில் எல்லை நிர்ணயங்களில் முஸ்லிம் சமூகத்துக்கு அநீதி இழைக்கப்படுவது பற்றி நான் சுட்டிக்காட்டினேன்.
எல்லை நிர்ணயக்குழுவுக்கு உறுப்பினராக முஸ்லிம் ஒருவரும், தமிழர் இருவரும் நியமிக்கப்படுகிறார்கள். ஏனைய உறுப்பினர்கள் பெரும்பான்மை இனத்தைச் சேர்ந்தவர்கள். நியமிக்கப்படும் தமிழ், முஸ்லிம் உறுப்பினர்கள் அரசாங்கத்துக்கு ஆதரவானவர்கள். அத்தோடு அரச உயர் அதிகாரிகளாகவும் இருக்கிறார்கள். அதனால் அவர்களால் அரசாங்கத்தின் கொள்கையே அரங்கேற்றப்படுகிறது.
எல்லை நிர்ணயக்குழுவுக்கு புத்திஜீவிகள் மட்டத்திலிருந்து சுயாதீனமான உறுப்பினர்கள் நியமிக்கப்படவேண்டும். பல்கலைக்கழக மட்டத்திலிருந்து உறுப்பினர்கள் நியமிக்கப்பட வேண்டும். இவ்வாறான நடைமுறை பின்பற்றப்படும்வரை எல்லை நிர்ணயத்தினால் சிறுபான்மை சமூகத்துக்கு அநீதியே இடம் பெறும் என்றார்.
சமூகம் தெளிவுபடுத்தப்பட வேண்டும்
எல்லை நிர்ணயங்கள் தொடர்பில் முஸ்லிம் சமூகம் உரிய தெளிவுகள் அற்ற நிலையிலே இருக்கிறது. எல்லை நிர்ணயத்தின் முக்கியத்துவத்தையும், அதன் பெறுமதியையும் முஸ்லிம் சமூகம் மதிப்பீடு செய்வதில்லை. இதனாலே எல்லை நிர்ணயப் பணிகள் ஆரம்பிக்கப்படும்போது எல்லை நிர்ணயக்குழு பொதுமக்கள், சமூக அமைப்புகளிடமிருந்து அறிக்கைகள், கருத்துக்கள், பரிந்துரைகள் என்பனவற்றைக்கோரி பகிரங்க அறிவித்தல் விடுக்கப்பட்டபோதிலும் எமது சமூகம் மெளனமாகவே இருந்து வந்துள்ளது. சமூகத்தின் பிரதிநிதித்துவத்தைக் காப்பாற்றிக்கொள்வதற்கு அவர்கள் செயலில் இறங்குவதில்லை.
உள்ளூராட்சி சபைகளுக்கான புதிய எல்லை நிர்ணயத்தின்போது முஸ்லிம் அரசியல் கட்சிகள் கூட அதிக அக்கறை கொள்ளாது ஏனோ தானோ என்று இருந்துள்ளன. சமூகத்தை இது விடயத்தில் தெளிவுபடுத்த அவை தவறியுள்ளன. இதனாலேயே எமது பிரதிநிதித்துவத்தை நாம் இழந்துவிட வேண்டிய நிலைமை உருவாகியுள்ளது. இவ்விடயத்தில் முஸ்லிம் புத்திஜீவிகள், சமூக இயக்கங்கள், அரசியல்வாதிகள் உடனடியாக கவனம் செலுத்த வேண்டும். செயலில் இறங்கவேண்டும். இதனையே சமூகம் எதிர்பார்க்கிறது.
நகல் அறிக்கை கையளிப்பு
இதேவேளை நேற்று முன்தினம் உள்ளூராட்சி மன்றங்களுக்கான புதிய எல்லை நிர்ணயத்தின் நகல் வரைபு அறிக்கை பிரதமரும், விடயத்துக்குப் பொறுப்பான அமைச்சருமான தினேஷ் குணவர்தனவிடம் கையளிக்கப்பட்டது. எல்லை நிர்ணயக்குழுவின் தலைவர் மஹிந்த தேசப்பிரிய நகல் அறிக்கையை பிரதமரிடம் கையளித்தார்.
அறிக்கை சிறுபான்மையினருக்குப் பாதகமாக சிறுபான்மை பிரதிநிதித்துவத்தை கேள்விக்குள்ளாக்கி வெளியிடப்பட்டுள்ளது என்ற முறைப்பாடுகளுக்கு இடமளிக்கப்பட்டுள்ளது. நகல் அறிக்கை உள்ளூராட்சி மன்ற அலுவலகங்களில் பொதுமக்கள் பார்வைக்காக காட்சிப்படுத்தத் திட்டமிட்டுள்ளமை வரவேற்கத்தக்கதாகும். அறிக்கை காட்சிப்படுத்தப்பட்டு ஒருவார காலத்துக்குள் முறைப்பாடுகளும் பொதுமக்களின் ஆலோசனைகளும் எல்லைநிர்ணய குழுவின் தலைமை அலுவலகம் கொழும்புக்கு அனுப்பி வைக்கப்படவேண்டும் என குழுவின் உறுப்பினர் கே.தவலிங்கம் தெரிவித்தார்.
இந்நிலையில் முஸ்லிம் சமூகம் இதுவிடயத்தில் விரைந்து செயற்படவேண்டும். தங்கள் பிரதிநிதித்துவத்தை உள்வாங்கிக் கொள்ளும் வகையில் ஆவணங்களையும் நிலத்தொடர்புகளையும் குழுவுக்கு அனுப்பி வைக்கவேண்டும். இது எமது அரசியல் வாதிகள் மற்றும் பொதுமக்களின் கடமையாகும்.-Vidivelli