(எம்.எப்.அய்னா)
நீர்கொழும்பு கட்டுவாபிட்டிய தேவாலயம் மீது நடத்தப்பட்ட தற்கொலை தாக்குதலின் குண்டுதாரியான மொஹம்மட் ஹஸ்தூனின் மனைவியான, 2 ஆம் கட்ட தாக்குதலுக்கு தயாராக இருந்ததாக கூறப்படும் புலஸ்தினி ராஜேந்திரன் அல்லது சாரா ஜஸ்மின் அல்லது சாரா தப்பிச் செல்ல உதவியதாக சந்தேகத்தில் கைது செய்யப்பட்ட பிரதான பொலிஸ் பரிசோதகர் என்.ரி. அபூபக்கரை பிணையில் விடுவித்து நீதிமன்றம் உத்தரவிட்டுள்ளது. மட்டக்களப்பு மேல் நீதிமன்ற நீதிபதி அப்துல்லாஹ் இதற்கான உத்தரவை கடந்த திங்களன்று (20) பிறப்பித்துள்ளார்.
சாரா குறித்து பொலிஸாருக்கு தகவல்களை மறைத்ததாக கூறி சட்ட மா அதிபர் மட்டக்களப்பு மேல் நீதிமன்றில் பொலிஸ் அதிகாரியான அபூபக்கருக்கு எதிராக தொடர்ந்துள்ள வழக்கு, விசாரணைக்கு வந்த போதே, அவர் சார்பில் சிரேஷ்ட சட்டத்தரணி என்.எம்.சஹீட் முன் வைத்த பிணைக் கோரிக்கையை ஏற்றே இந்த உத்தரவு பிறப்பிக்கப்பட்டது. அதன்படி, குறித்த பிரதான பொலிஸ் பரிசோதகரை 10 ஆயிரம் ரூபா ரொக்கப் பிணை, 25 இலட்சம் ரூபா பெறுமதியான இரு சரீரப் பிணைகளில் விடுவித்த மேல் நீதிமன்ற நீதிபதி அப்துல்லாஹ், அவரது வெளிநாட்டுப் பயணங்களை தடை செய்து கடவுச் சீட்டை நீதிமன்றில் ஒப்படைக்க உத்தரவிட்டார்.
குறித்த வழக்கு விசாரணைக்கு வந்த போது, அபூபக்கர் சார்பில் ஆஜராகிய சிரேஷ்ட சட்டத்தரணி என்.எம்.சஹீட், சட்ட மா அதிபர் தககல் செய்துள்ள குற்றப் பத்திரிகை முற்றிலும் பிழையானது என வாதிட்டதுடன், கல்முனை நீதிவான் நீதிமன்றில் விசாரணையாளர்கள் தாக்கல் செய்துள்ள விசாரணை அறிக்கையில் சாரா தப்பிச் செல்ல பிரதிவாதியான அபூபக்கர் உதவியதாக சான்றுகள் இல்லை என குறிப்பிடப்பட்டுள்ளதாக கூறினார்.
சட்ட மா அதிபரின் குற்றப் பகிர்வுப் பத்திரம் மொட்டைத் தலைக்கும் முழங்காலுக்கும் முடிச்சுப் போடும் ஒன்று என இதன்போது விமர்சித்த அவர், தனது சேவைபெறுநருக்கு பிணை கோரினார்.
எனினும், இவ்வழக்கு தொடர்பில் கையாள சட்ட மா அதிபரால் நியமிக்கப்பட்டுள்ல சிறப்பு அரச சட்டவாதி சகி அஹமட், பிரதிவாதிக்கு பிணை வழங்கக்டும் ஆட்சேபனம் வெளியிட்டார்.
இந்நிலையிலேயே, நீண்டகாலமாக பிரதிவாதி விளக்கமறியலில் வைக்கப்பட்டுள்ளதை விஷேட காரணியாக கருதி, நீதிபதி அப்துல்லாஹ், பிரதிவாதிக்கு பிணையளித்து உத்தரவிட்டார்.
முன்னதாக உயிர்த்த ஞாயிறு தின தாக்குதல்கள் குறித்த ஜனாதிபதி விசாரணை ஆணைக் குழுவில் முன்னெடுக்கப்பட்ட சாட்சியங்களின் போது, உயிர்த்த ஞாயிறு தாக்குதலின் பின்னர், நீர்கொழும்பு கட்டுவாபிட்டிய தேவாலயம் மீது நடத்தப்பட்ட தற்கொலை தாக்குதலின் குண்டுதாரியான மொஹம்மட் ஹஸ்தூனின் மனைவியான புலஸ்தினி ராஜேந்ரன் அல்லது சாரா, களுவாஞ்சிக்குடியிலிருந்து இந்தியாவுக்கு தப்பிச் செல்ல உதவியமை தொடர்பில், சாட்சியங்கள் பதிவு செய்யப்பட்டிருந்தன.
ஜனாதிபதி விசாரணை ஆணைக் குழுவில், பிரதான பொலிஸ் பரிசோதகர் அர்ஜுன மாஹின்கந்த வழங்கிய சாட்சியத்தின் படி, கடந்த 2020 ஜூலை 13 ஆம் திகதி பிரதான பொலிஸ் பரிசோதகர் அபூபக்கர் பயங்கரவாத தடை சட்டத்தின் கீழ் கைது செய்யப்பட்டிருந்தார்.
உண்மையில் கல்முனை – சாய்ந்தமருது வெலிவொலிவேரியன் கிராம பகுதியில் கடந்த 2019 ஏப்ரல் 26 ஆம் திகதி வீடொன்றுக்குள் குண்டை வெடிக்கச் செய்து நடாத்தப்பட்ட தற்கொலை தாக்குதலில் உயிர் தப்பியதாக நம்பப்படும் சாரா ஜெஸ்மின் எனும் பெண் களுவாஞ்சிக் குடி, மான்காடு பகுதியில் மறைந்திருந்ததாக கண்கண்ட சாட்சியாளர் ஒருவர் ஊடாக தனக்கு கடந்த 2020 ஜூலை 06 ஆம் திகதி தகவல் கிடைத்ததாக அர்ஜுன மாஹின்கந்த குறிப்பிட்டிருந்தார். அதன்படி கடந்த 2020 ஜூலை 8 ஆம் திகதி மட்டக்களப்பு சென்று அங்கு சாராவை நேரில் கண்ட நபரையும் சந்தித்ததாகவும் அந்த கண்கண்ட சாட்சியாளரின் சாட்சியத்தின் பிரகாரம், கடந்த 2019 செப்டம்பர் மாதத்தில் ஒரு நாள், அதிகாலை 3.15 அளவில் மட்டக்களப்பு – கல்முனை பிரதான வீதியில் தேத்தா தீவு பகுதியை கடந்து சென்றுகொண்டிருந்த போது, பிரதான வீதிக்கு நுழைய முடியுமான குறுக்கு வீதியான கடற்கரை வீதியிலிருந்து பெண் ஒருவரும் இரு ஆண்களும் வந்ததாக தகவலாளி தகவல் அளித்ததாக அர்ஜுன மாஹின்கந்த குறிப்பிட்டிருந்தார்.
அப்பெண் அப்போது கறுப்பு நிற பர்தா அணிந்திருந்ததாகவும், முகத்தை மறைத்திருக்கவில்லை எனவும் அவரின் பின்னால் இரு ஆண்கள் வந்ததையும் கண்டதாக சாட்சியாளர் அவதானித்துள்ளார்.
அவ்வாறு பிரதான வீதிக்கு வந்த பெண், பாதை ஓரமாக நிறுத்தப்பட்டிருந்த இள மஞ்சள் நிற டப்பிள் கெப் ரக வாகனத்தில் (59 – 0874) ஏறுவதை சாட்சியாளர் அவதானித்துள்ளார். குறித்த கெப் வண்டியின் பின் ஆசனத்தில் அந்த பெண் அமர்ந்துள்ளதுடன், முன் ஆசனத்தில், அதாவது சாரதி ஆசனத்துக்கு அருகே உள்ள ஆசனத்தில் அப்போது களுவாஞ்சிக் குடி பொலிஸ் நிலையத்தின் போக்குவரத்து பிரிவு பொறுப்பதிகாரி அபூபக்கர் இருந்துள்ளதை சாட்சியாளர் கண்டுள்ளார் என அர்ஜுன மாஹின்கந்த சாட்சியமளித்திருந்தார்.
இது தொடர்பிலேயே, அபூபக்கர் கைது செய்யப்பட்டு 2020 முதல் தடுப்புக் காவலிலும் விளக்கமறியலிலும் இருந்து வந்த நிலையில் தற்போது பிணையளிக்கப்பட்டுள்ளமை குறிப்பிடத்தக்கது.- Vidivelli