நாட்டின் பொருளாதாரத்தைக் கட்டியெழுப்புவதற்கு அனைவரையும் ஒன்றுபட்டுச் செயற்பட முன்வருமாறு ஜனாதிபதி அடிக்கடி அழைப்பு விடுத்து வருகிறார். நேற்றைய தினம் கொழும்பு ரோயல் கல்லூரியில் இடம்பெற்ற நிகழ்வொன்றில் உரையாற்றிய அவர், இந்த அழைப்பை மீண்டும் நினைவுபடுத்தினார்.
“இந்த நாட்டைக் கட்டியெழுப்ப அனைத்து போட்டி எண்ணங்களையும் மறந்து ஒன்றிணையுமாறு அனைவருக்கும் அழைப்பு விடுக்கின்றேன். அரசியலில் ஈடுபடும் எவரையும் தமது அரசியல் பயணத்தை நிறுத்திவிட்டு என்னுடன் இணையுமாறு நான் கோரவில்லை. ஆனால் நாட்டின் வீழ்ச்சியடைந்த பொருளாதாரத்தை மீண்டும் கட்டியெழுப்பும் வரை அனைத்து அரசியல்வாதிகள், வர்த்தகர்கள், விவசாயிகள், கல்வியலாளர்கள், பேராசிரியர்கள் உள்ளிட்ட அனைவரையும் ஒன்றிணைந்து செயல்படுமாறு கேட்டுக்கொள்கிறேன். அத்துடன், இந்த நாட்டைக் கட்டியெழுப்புவதற்கு ஒன்றிணையுமாறு பாதுகாப்புப் படையினர், பொலிஸார், அரச உத்தியோகத்தர்கள், ஆசிரியர்கள் என அனைவரையும் கேட்டுக்கொள்கின்றேன். இதுதான் நாம் ஒன்றிணைந்து எதிர்கொள்ள வேண்டிய சவாலாகும்” என அவர் இந் நிகழ்வில் சுட்டிக்காட்டியுள்ளார்.
அதேபோன்றுதான் சமூக நீதிக்கான தேசிய இயக்கத்தின் தலைவரும் முன்னாள் சபாநாயகருமான கரு ஜயசூரியவும் இதேபோன்றதொரு அழைப்பை விடுத்துள்ளார். இது தொடர்பில் அறிக்கை ஒன்றை வெளியிட்டுள்ள அவர், அனைத்துத்தரப்பினரும் தற்போது நாடு முகங்கொடுத்திருக்கும் நெருக்கடியின் பாரதூரத்தன்மையை சரியாகப் புரிந்துகொண்டு, நாட்டின் நலனுக்குக் கேடு விளைவிக்கக்கூடிய நடவடிக்கைகளில் ஈடுபடாதிருப்பது அவசியமென வலியுறுத்தியுள்ளார்.
“இன்றளவிலே எமது நாடு முகங்கொடுத்திருக்கும் பாரிய நெருக்கடியின் உண்மையான நிலைவரத்தை அனைத்துத்தரப்பினரும் சரியாகப் புரிந்துகொள்ளவேண்டியது அவசியமாகும். இருப்பினும் தற்போது நாடு எதிர்கொண்டிருக்கும் மிக மோசமான ஆபத்து குறித்த உண்மையான புரிதலுடன்தான் அனைத்துத்தரப்பினரும் செயற்படுகின்றார்களா? என்ற கேள்வியை எழுப்ப வேண்டியிருக்கின்றது.
ஒட்டுமொத்த நாடு தொடர்பில் கொண்டிருக்கும் தீவிர கரிசனையுடனும், எந்தவொரு அரசியல் தரப்புடன்கூடிய அதிகார ஆசைகளுமின்றியே நாம் இவ்வாறு கேள்வி எழுப்புகின்றோம். அதுமாத்திரமன்றி இன, மத, மொழி உள்ளிட்ட குறுகிய மட்டுப்பாடுகளுக்குள் சிக்காத, முன்னேற்றமடைந்த நாட்டை எமது அடுத்த தலைமுறையினரிடம் கையளிக்கவேண்டிய பொறுப்பு எமக்கு இருக்கின்றது.
அதிகாரத்தைக் கைப்பற்றுவதற்காக ஒருவருக்கொருவர் பிரிந்துநின்று சண்டையிடக்கூடிய சூழ்நிலையில் இப்போது நாடு இல்லை. மாறாக அனைத்துத்தரப்பினரதும் கூட்டிணைந்த கடப்பாட்டின் ஊடாக நாட்டைக் கட்டியெழுப்புவதே தற்போதைய அவசியத்தேவையாக இருக்கின்றது. எனவே அரசாங்கமும், ஏனைய அரசியல் கட்சிகளும், ஏனைய முக்கிய கட்டமைப்புக்களும் தேசிய ரீதியிலான பொறுப்புணர்வுடன் செயற்படுவதுடன் அனைத்துப்பிரஜைகளும் பொதுவான புரிந்துணர்வைக் கொண்டிருப்பது காலத்தின் தேவையாகும்.
ஆகவே நாட்டின் நலனுக்குக் கேடு விளைவிக்கக்கூடிய நடவடிக்கைகளில் ஈடுபடுவதைத் தவிர்க்குமாறு அனைத்துத்தரப்பினரிடமும் வலியுறுத்துகின்றோம். அதேபோன்று அரசாங்கம் மக்களின் உணர்வுகளையும் பிரச்சினைகளையும் நன்கு புரிந்துகொண்டு, பாராளுமன்றத்தின் ஊடாக இப்பிரச்சினைக்குத் தீர்வுகாண்பது அவசியமாகும். மேலும் மக்களின் கருத்துக்கு மதிப்பளித்து, தேர்தல்களை உரிய காலப்பகுதியில் நடாத்துமாறும் வலியுறுத்துகின்றோம்” என்றும் கரு ஜயசூரிய தனது அறிக்கையில் மேலும் குறிப்பிட்டுள்ளார்.
உண்மையில் நாடு மிகப் பாரிய நெருக்கடியில் சிக்கியுள்ள நிலையில், இதிலிருந்து வெளிவருவதற்கான முயற்சிகளை முன்னெடுப்பது ஆட்சியில் உள்ளவர்களது கடமை மாத்திரமல்ல. மாறாக ஆளும் தரப்புடன் எதிர்த்தரப்புகளும் இணைந்தே இந்தக் கடினமான பணியை முன்னெடுக்க வேண்டும்.
இன்று எதிர்க்கட்சிகள் நாடளாவிய ரீதியில் பாரிய கூட்டங்களையும் போராட்டங்களையும் முன்னெடுத்து வருவதைக் காண்கிறோம். ஜனநாயக நாடென்ற வகையில் யாரும் இவ்வாறான செயற்பாடுகளை முன்னெடுக்க முடியும். எனினும் நாடு எதிர்கொண்டுள்ள நெருக்கடியிலிருந்து மீள்வதற்கான பொதுவானதொரு கொள்கையை உருவாக்கி அதன்படி அடுத்து வரும் சில வருடங்களுக்குச் செயற்பட வேண்டியதே காலத்தின் தேவையாகும். அதைவிடுத்து ஒவ்வொருவரும் ஒவ்வொரு கோணத்தில் நாட்டை வழிநடாத்த முயற்சிப்பது மீண்டும் ஒரு பொருளாதார பேரனர்த்தத்திற்கே வழிவகுக்கும். எனவேதான் முன்னாள் சபாநாயகரும் சிரேஷ்ட அரசியல் தலைவருமான கரு ஜயசூரிய அழைப்பு விடுத்துள்ளதுபோன்று சகல தரப்பினரும் காலத்தின் தேவை கருதி ஒன்றுபட்டுச் செயற்பட வேண்டும் என வலியுறுத்த விரும்புகிறோம்.- Vidivelli