குறிஞ்சாங்கேணி பாலத்தின் நிர்மாண பணிகள் இடைநிறுத்தம்
ஆசிய அபிவிருத்தி வங்கியுடன் பேச்சு நடத்தி மீள ஆரம்பிக்க அமைச்சரவை அங்கீகாரம்
(றிப்தி அலி)
எட்டு உயிர்களை பலியெடுத்த கிண்ணியா, குறிஞ்சாங்கேணி பாலத்தின் நிர்மாணம் உட்பட நாட்டில் புதிதாக நிர்மாணிக்கப்பட்டு வந்த அனைத்து பாலங்களினதும் நிர்மாணப் பணிகள் தற்காலிகமாக இடைநிறுத்தப்பட்டுள்ளன என நெடுஞ்சாலைகள் அமைச்சர் பந்துல குணவர்த்தன தெரிவித்தார்.
நாட்டில் ஏற்பட்டுள்ள பொருளாதார நெருக்கடி காரணமாக வெளிநாடுகளிடம் கடன் பெறுவது நிறுத்தப்பட்டமையினாலேயே பால நிர்மாணப் பணிகளை முன்கொண்டு செல்ல முடியாதுள்ளது எனவும் அவர் குறிப்பிட்டார்.
குறிஞ்சாங்கேணி பால நிர்மாணப் பணிகள் கைவிடப்பட்டுள்ளமை தொடர்பில் கடந்த செவ்வாய்க்கிழமை (09) நடைபெற்ற அமைச்சரவை தீர்மானங்களை அறிவிக்கும் ஊடகவியலாளர் மாநாட்டில் ஊடகவியலாளரொருவர் எழுப்பிய கேள்விக்கு பதிலளிக்கையிலேயே அமைச்சர் பந்துல குணவர்த்தன மேற்கண்டவாறு கூறினார்.
இது தொடர்பில் அவர் மேலும் கருத்துத் தெரிவிக்கையில்,
“பால நிர்மாணங்களை மேற்கொண்ட ஒப்பந்தக்காரர்களுக்கு சுமார் 100 பில்லியன் ரூபாவிற்கு மேல் செலுத்த வேண்டியுள்ளது. இந்த பணத்தினை எவ்வாறு திருப்பிச் செலுத்துவது தொடர்பில் அரசாங்கம் இதுவரை எந்தத் தீர்மானம் மேற்கொள்ளவில்லை. இதுவொரு பாரிய பிரச்சினையாகும்.
இதனால் பாலம் மற்றும் வீதி நிர்மாணங்கள் இடைநடுவில் நிறுத்தப்பட்டுள்ளன. இந்த விடயம் தொடர்பில் ஆசிய அபிவிருத்தி வங்கியுடன் பேச்சு நடத்தி கடன் பெற்று நிறைவுசெய்யப்படாதுள்ள பாலம், வீதிகளை நிர்மாணிக்க அமைச்சரவை அங்கீகாரம் வழங்கியுள்ளது என அவர் தெரிவித்தார்.
இதேவேளை, அண்மையில் ஏற்பட்ட திடீர் வெள்ளப் பெருக்கின் காரணமாக நாவலப்பட்டி மற்றும் யட்டியாந்தோட்டை உள்ளிட்ட நான்கு பிரதேசங்களில் பாலங்கள் உடைந்துள்ளன. இதனால், கிராமங்களுக்கு இடையிலான தொடர்பு முற்றிலும் பாதிக்கப்பட்டுள்ளன.
அது மாத்திரமல்லாமல், மாணவர்கள் பாடசாலைக்கு செல்ல முடியாதுள்ளதுடன், பாதிக்கப்பட்ட மக்களுக்கு தேவையான உணவுகளைக் கூட கொண்டு செல்ல முடியாதுள்ளது.
இந்த பாலங்களை உடனடியாக நிர்மாணிக்க 1.2 பில்லியன் ரூபா நிதி தேவைப்படுகின்றது. எனினும், குறித்த நிதி தற்போது அரசாங்கத்திடமில்லை. இதனால் தற்காலிக பாலம் அமைப்பதற்கு தேவையான நிதியினை ஒதுக்கீடு செய்ய அரசாங்கம் தீர்மானித்துள்ளது” என்றார்.- Vidivelli