(ஏ.ஆர்.ஏ.பரீல்)
கடந்த 8 ஆம் திகதி வெள்ளிக்கிழமை பெளத்த, இந்து, இஸ்லாமிய, கிறிஸ்தவ மதத் தலைவர்கள், துறைசார் நிபுணர்கள், வர்த்தக சமூகம் மற்றும் சிவில் சமூக அமைப்புகளின் பிரதிநிதிகள் அரசியல் கட்சிகள் சாராத தேசிய கூட்டமைப்பாக ஒன்றிணைந்து பிரகடனம் ஒன்றினை வெளியிட்டுள்ளனர்.
அப்பிரகடனத்தில் தெரிவிக்கப்பட்டுள்ளதாவது; கடுமையான பொருளாதார மற்றும் சமூக நெருக்கடிகளால் நாட்டு மக்கள் பாதிக்கப்பட்டுள்ளனர். இவற்றிலிருந்து விடுபட்டு நிம்மதி மற்றும் சந்தோஷமடைவதற்கும் மீண்டும் எமது நாட்டை உலகின் கெளரவமான, சுதந்திரமான தேசமாக உயர்த்தி நிறுத்துவதற்கும் இலங்கை மக்கள் தமது எதிர்ப்பு ஆர்ப்பாட்டங்கள் மூலம் தெளிவாக வெளிப்படுத்தி வரும் அபிலாஷைகளை இப்பிரகடனம் மூலம் முழு இலங்கை மக்களுக்கும் அறிவிக்கிறோம்.
பாராளுமன்றத்தில் இயலுமான வரை அனைத்துக் கட்சிகளையும் பிரதிநிதித்துவப்படுத்தும் சர்வகட்சி அரசாங்கம் ஒன்று வரையறுக்கப்பட்ட காலத்திற்கு நியமிக்கப்படவேண்டும். பொது மக்களின் வாழ்வை இயல்பு நிலைக்கு மாற்றுவதன் மூலம் தற்போது இலங்கை முகங்கொடுத்துள்ள கடுமையான பொருளாதார மற்றும் சமூக நெருக்கடியில் இருந்து மீட்டெடுத்து நாட்டை மீண்டும் அபிவிருத்திப்பாதையில் செலுத்துவது அந்த அரசாங்கத்தின் முதன்மை நோக்கமாக இருக்க வேண்டும். குறித்த இடைக்கால அரசாங்கத்தின் அமைச்சரவை 15 உறுப்பினர்களைக் கொண்டிருக்க வேண்டும் என்பதோடு அமைச்சுப் பொறுப்புகள் கட்சிபேதங்களின்றி பாராளுமன்றத்தில் இருக்கும் மிகத் தகுதியானவர்களுக்கு வழங்கப்படவேண்டும்.
தற்போது வர்த்தமானி மூலம் அறிவிக்கப்பட்டுள்ள 22 ஆவது அரசியலமைப்புத் திருத்தம் மக்களின் குறைந்த பட்ச எதிர்பார்ப்புக்களையேனும் பூரணப்படுத்துவதில்லை என்பதால் அது தொடர்பில் நாம் ஒருபோதும் திருப்தி அடைவதில்லை. மீண்டும் குறைந்த பட்சம் 19 ஆவது திருத்தமேனும் நடைமுறைக்கு வரும் வகையில் சீரமைக்கப்பட்டு மிகக் குறுகிய காலத்திற்குள் நிறைவேற்றப்படவேண்டும்.
கோத்தாபய ராஜபக்ஷ நிபந்தனைகளின்றி உடனடியாக பதவி விலகவேண்டும்.
தற்போதைய பொருளாதார மற்றும் சமூக நெருக்கடியைத் தீர்ப்பதற்குத் தெளிவான, இலக்குகளுடன் கூடிய வேலைத்திட்டமொன்றை முன் வைக்க முடியுமான, தகுதியுள்ள தலைவர் ஒருவர் ஜனாதிபதி பதவிக்கு நியமிக்கப்படவேண்டும்.
மக்கள் முகங்கொடுத்துள்ள பரிதாபகரமான நிலைமையை நிறைவுக்குக் கொண் வருவதற்காக சர்வமதத்தலைவர்கள், பொதுமக்கள் அமைப்புகள், புத்தி ஜீவிகள், துறைசார் நிபுணர்கள், வர்த்தக சமூகம் போன்ற அனைவருக்கும் பொதுவான வேலைத்திட்டமொன்றினை குறித்த இடைக்கால அரசு முன் வைக்க வேண்டும்.
தற்காலிக, அடைக்கால அரசாங்கம் மூலம் பாராளுமன்ற மற்றும் ஜனாதிபதி தேர்தல்களை நடத்துவது தொடர்பாக வரையறுக்கப்பட்ட காலங்கள் அறிவிக்கப்பட்டு அதற்கேற்ப தேர்தல்கள் நடத்தப்பட வேண்டும்.
அனைத்து அரசியல் கட்சிகளும் தேசத்தின் பாதுகாப்பு மற்றும் பொதுமக்கள் நலன் என்பவற்றைத் தமது அபிலாஷையாகக் கொண்டு தமது கட்சிகளை ஜனநாயக மற்றும் தூர நோக்கு கொண்டவையாக மாற்றிக்கொள்ள உறுதிபூண வேண்டும்.
பொதுமக்கள் இந்தச் செயற்பாடுகளுக்கு ஒத்துழைக்க வேண்டும்.
இந்தச் செயன்முறையின் ஆரம்பம் முதல் இறுதிவரை நல்லெண்ணத்துடனும் பொது நலனை ஒழுங்குபடுத்தும் பாரிய பணியை நாம் அனைவரும் தனித்தனியாகவும் ஒற்றுமையாகவும் மேற்கொள்வோம் என்று இப்பிரகடனம் மூலம் அறிவித்துக்கொள்கிறோம் என தெரிவிக்கப்பட்டுள்ளது.
பிரகடனத்தில் அகில இலங்கை ஜம் இய்யத்துல் உலமா சபையின் சார்பில் அதன் பொதுச் செயலாளர் அஷ்ஷெய்க் அர்கம் நூராமித், உதவி செயலாளர் அஷ்ஷெய்க் எம்.எஸ்.எம்.தாஸிம், பொருளாளர் மற்றும் கிறிஸ்தவ சமூகம் சார்பில் கர்தினால் மெல்கம் ரஞ்சித், இந்து சமூகம் சார்பில் இந்து பேரவையின் சிவ தர்சக சர்மா குருக்கள், பெளத்த சமூகம் சார்பில் மூன்று நிக்காயாக்களின் சார்பில் அனுநாயக்க தேரர்கள், சுமார் 50 க்கும் மேற்பட்ட சிவில் சமூக அமைப்புகளின் பிரதிநிதிகள் கையொப்பமிட்டனர்.- Vidivelli