அறபா நாள் சொற்பொழிவின் மொழிபெயர்ப்பு ஏற்கனவே 10 மொழிகளில் நேரலையாக ஒலிபரப்பப்படும் சூழலில் இவ்வருடம் முதல் தமிழ் உள்ளிட்ட மேலும் நான்கு மொழிகளுக்கும் அது விரிவுபடுத்தப்பட்டுள்ளதாக சவூதி அரேபிய ஊடகங்கள் தெரிவிக்கின்றன.
நவீன தொழில்நுட்பத்தை பயன்படுத்தி இஸ்லாத்தின் மிதவாதம் மற்றும் சகிப்புத்தன்மைக்கான செய்தி இந்த உலகுக்கு அறிவிக்கப்படும் என்று மக்கா மற்றும் மதீனாவில் உள்ள இரு புனித பள்ளிவாசல்களுக்கான தலைவர் அப்துல் ரகுமான் அல் – சுதைஸ் தெரிவித்துள்ளார் என்று ‘அரப் நியூஸ்’ ஊடகம் தெரிவிக்கிறது.
மக்காவில் உள்ள அல் நிம்ரா பள்ளிவாசலில் நிகழ்த்தப்படும் அறபா நாள் சொற்பொழிவு கடந்த ஐந்தாண்டுகளாக அரபு தவிர்ந்த உலகின் வெவ்வேறு மொழிகளில் மொழிபெயர்த்து ஒலிபரப்பப்பட்டு வருகிறது.
ஏற்கெனவே அவ்வாறு ஆங்கிலம், பிரெஞ்சு, மலாய், உருது, பாரசீகம், ரஷ்ய மொழி, சீன மொழி, வங்க மொழி, துருக்கிய மொழி ஹவுசா ஆகிய பத்து மொழிகளில் மொழிபெயர்புகள் நிகழ்ந்து வரும் சூழலில் இந்த ஆண்டு முதல் தமிழ், இந்தி, ஸ்பானிய மொழி மற்றும் ஆபிரிக்க மொழியான ஸ்வாஹிலி ஆகிய மொழிகள் சேர்க்கப்பட்டுள்ளன என்று அல்-சுதைஸ் தெரிவித்துள்ளார்.
இந்த மொழிபெயர்ப்பு முதல் ஆண்டு 10 இலட்சம் பேருக்கும், இரண்டாம் ஆண்டு 1 கோடியே 10 இலட்சம் பேருக்கும், மூன்றாம் ஆண்டு 50 இலட்சம் பேருக்கும், நான்காம் ஆண்டு 10 கோடி பேருக்கும் பயனாக இருந்தது என்று கூறும் அல் – சுதைஸ் இந்த ஆண்டு 20 கோடி பேருக்கு பலனளிக்கும் என தெரிவித்ததாக அரப் நியூஸ் தெரிவிக்கிறது.- Vidivelli