எம்.எப்.எம்.பஸீர்
புத்தளம் – வணாத்தவில்லு, லக்டோஸ் தோட்டத்தில், வெடிபொருட்களை சேகரித்து களஞ்சியப்படுத்தும் மற்றும் உற்பத்தி செய்யும் இடமொன்றினை முன்னெடுத்துச் சென்றமை தொடர்பில் குற்றம் சுமத்தப்பட்டுள்ளவர்களில் தேசிய தௌஹீத் ஜமாஅத் எனும் தடை செய்யப்பட்ட அமைப்பின் முக்கியஸ்தரான நௌபர் மௌலவி உள்ளிட்ட 4 பிரதிவாதிகளுக்கு கடந்த திங்கட்கிழமை (27) பிணையளிக்கப்பட்டுள்ளது.
அபூ தஹ்தா எனும் அபூ ஹனீபா மொஹம்மட் முபீஸ், அபூ சாபியா எனும் அமீர் ஹம்சா மொஹம்மட் ஹமாஸ், அபூ செய்த் எனும் நௌபர் மௌலவி அல்லது மொஹம்மட் இப்ராஹீம் நௌபர், அபூ நஜா எனப்படும் மொஹம்மட் ரமீஸ் மொஹம்மட் சாஜித் அல்லது சாஜித் மௌலவி ஆகிய முறையே 1,2,5,6 ஆம் பிரதிவாதிகளுக்கே சிறப்பு ட்ரயல் அட்பார் நீதிமன்றம் இவ்வாறு பிணையளித்து உத்தரவிட்டது.
தலா ஒன்றரை இலட்சம் ரூபா ரொக்கப் பிணை மற்றும், 2 மில்லியன் ரூபா பெறுமதியான இரு சரீரப் பிணைகளில் செல்ல இவர்களை அனுமதித்த நீதிபதிகள், பிரதிவாதிகளின் வெளிநாட்டு பயணங்களை தடைச் செய்து கடவுச் சீட்டுக்களை மன்றில் ஒப்படைக்க உத்தரவிட்டனர். அத்துடன் ஒவ்வொரு மாதமும் இறுதி ஞாயிற்றுக் கிழமைகளில் முற்பகல் 9.00 மணிக்கும் நண்பகல் 12.00 மணிக்கும் இடையில் குற்றப் புலனாய்வுத் திணைக்களத்தின் புத்தளம் பிராந்திய அலுவலகத்தில் கையெழுத்திட வேண்டும் எனவும் மற்றொரு பிணை நிபந்தனை விதிக்கப்பட்டது.
இந்த விவகார வழக்கு விசாரணைகள், இவ்வழக்கினை விசாரணை செய்யவென புத்தளம் மேல் நீதிமன்றில் அமைக்கப்பட்டுள்ள மூவர் கொண்ட சிறப்பு ட்ரயல் அட்பார் நீதிபதிகள் குழாம் முன்னிலையில், விசாரணைக்கு வந்தது. ஏற்கனவே, குற்றம் சுமத்தப்பட்டுள்ள 6 பிரதிவாதிகளில் ஐவர் சார்பில் முன் வைக்கப்பட்ட பிணைக் கோரிக்கைகளை ஆராய்ந்து, ட்ரயல் அட்பார் நீதிமன்ற நீதிபதிகள் பிணை குறித்த உத்தரவை அறிவித்தே, பிரதிவாதிகளில் நால்வருக்கு பிணையளிப்பதாக அறிவித்தனர்.
பிணையளிக்கப்பட்ட குற்றப் பத்திரிகையின் முதல் இரு பிரதிவாதிகளாக பெயரிடப்பட்டுள்ள, அபூ தஹ்தா எனும் அபூ ஹனீபா மொஹம்மட் முபீஸ், அபூ சாபியா எனும் அமீர் ஹம்சா மொஹம்மட் ஹமாஸ் ஆகியோர் சார்பில் சிரேஷ்ட சட்டத்தரணி ருஷ்தி ஹபீப் தலைமையில் சட்டத்தரணிகளான வஸீமுல் அக்ரம், நதீஹா அப்பாஸ், மொஹம்மட் சஜாத் உள்ளிட்ட குழுவினர் ஆஜராகி வாதங்களை முன் வைத்திருந்தனர்.
5 ஆம் பிரதிவாதியான அபூ செய்த் எனும் நௌபர் மௌலவி அல்லது மொஹம்மட் இப்ராஹீம் நௌபர் சார்பில் அரசினால் அவருக்கு வழங்கப்பட்ட சட்டத்தரணியும், அபூ நஜா எனப்படும் மொஹம்மட் ரமீஸ் மொஹம்மட் சாஜித் அல்லது சாஜித் மௌலவி சார்பில் சிரேஷ்ட சட்டத்தரணி கஸ்ஸாலி ஹுசைன் உள்ளிட்ட குழுவினரும் மன்றில் ஆஜராகி வாதங்களை முன் வைத்தனர்.
மூன்றாம் பிரதிவாதி கபூர் மாமா அல்லது கபூர் நாநா எனும் மொஹம்மட் சரீப் ஆதம் லெப்பை சார்பில் பிணைக் கோரிக்கை முன் வைக்கப்பட்டிருந்த போதும் அது நிராகரிக்கப்பட்டுள்ளது.
4 ஆம் பிரதிவாதி, அபூ உமர் எனப்படும் மொஹம்மட் இப்ராஹீம் சாதிக் அப்துல்லாஹ் சார்பிலும் சிரேஷ்ட சட்டத்தரணி ருஷ்தி ஹபீப் தலைமையிலான சட்டத்தரணிகளான வஸீமுல் அக்ரம், நதீஹா அப்பாஸ் உள்ளிட்ட குழுவினர் ஆஜராகும் நிலையில், அவர் சார்பில் பிணைக் கோரிக்கை முன் வைக்கப்படவில்லை.
இவ்வழக்கில், தற்போதும் மரணமடைந்துள்ள மொஹம்மட் சஹ்ரான் ஹாஷிம் மற்றும் அச்சு மொஹம்மது அஹமது ஹஸ்தூன் ஆகியோருடன் இணைந்து, வணாத்தவில்லு பகுதியில் வெடிபொருட்களை சேகரிக்கும் மற்றும் தயாரிக்கும் இடமொன்றினை முன்னெடுத்துச் சென்றதாக பயங்கரவாத தடைச் சட்டத்தின் கீழ் பிரதிவாதிகள் 6 பேருக்கும் எதிராக குற்றம் சுமத்தப்பட்டுள்ளது.
நாசகார அல்லது பயங்கரவாத செயற்பாடுகளை முன்னெடுக்கும் எண்ணத்துடன் வணாத்தவில்லு பகுதியில் வெடிபொருட்களை சேகரிக்க சதி செய்தமை, யூரியா நைற்றேட், நைற்றிக் அசிட், தோட்டாக்கள் உள்ளிட்ட வெடிபொருட்களை சேகரித்தமை, வெடிபொருட்களை உற்பத்தி செய்தமை தொடர்பில் பயங்கரவாத தடைச் சட்டத்தின் 2 (1) உ பிரிவின் கீழும், 3 (2) ஆம் பிரிவின் கீழும் பிரதிவாதிகளுக்கு எதிராக விஷேட குற்றச்சாட்டு முன் வைக்கப்பட்டுள்ளது. அத்துடன் வெடிபொருள் சேகரிப்பு, தயாரிப்பு, ஆயுத பயிற்சி உள்ளிட்டவற்றுக்கு உதவி ஒத்தாசை புரிந்தமை தொடர்பில் அனைத்து பிரதிவாதிகளுக்கும் எதிராக குற்றச்சாட்டு முன் வைக்கப்பட்டுள்ளது.
இதனைவிட, முதல் பிரதிவாதியான அபூ தஹ்தா எனப்படும் மொஹம்மட் முபீஸ் மீது, பயங்கரவாதத்துக்கு நிதியளித்தலை தடுக்கும் சர்வதேச இணக்கப்பாட்டு சட்டத்தின் 3 ஆம் உறுப்புரையின் கீழ் குற்றம் சுமத்தப்பட்டுள்ளது. ஆயுத களஞ்சியத்துடன் கூடிய வணாத்தவில்லு லக்டோ தோட்டத்தின் ஒரு பகுதியை ஆயுத பயிற்சிகளை முன்னெடுக்க அபூ உமர் எனும் சாதிக் அப்துல்லாஹ்வுக்கு வழங்கியமை தொடர்பில் அந்த குற்றச்சாட்டு முன்வைக்கப்பட்டுள்ளது. இந் நிலையில் இவ்வழக்கின் சாட்சி விசாரணைகள் எதிர்வரும் ஆகஸ்ட் மாதம் ஆரம்பிக்கப்படவுள்ளது.
எவ்வாறாயினும் சிறப்பு ட்ரயல் அட்பார் நீதிமன்றம் பிணையளித்த போதும், முதல் இரு பிரதிவாதிகளைத் தவிர ஏனையோருக்கு மேலும் சில வழக்குகள் இருப்பதால், அவர்கள் விளக்கமறியலிலேயே தொடர்ந்தும் தடுத்து வைக்கப்பட்டுள்ளமை குறிப்பிடத்தக்கது.
வணாத்தவில்லு விவகாரத்தின் பின்னணி:
கடந்த 2018 ஆம் ஆண்டு இடம்பெற்ற மாவனல்லை சிலை உடைப்பு சம்பவங்கள் தொடர்பான விசாரணைகளின் போதே வணாத்தவில்லுவில் வெடி பொருட்கள் களஞ்சியப்படுத்தப்பட்டிருந்த இடம் விசாரணையாளர்களால் கண்டறியப்பட்டது.
சிலை உடைப்பு தொடர்பில் மாவனெல்லை பொலிஸாரும் கேகாலை மாவட்ட தீர்க்கப்படாத குற்றங்களை விசாரிக்கும் பிரிவும் பல்வேறு தகவல்களை வெளிப்படுத்தியிருந்த நிலையில், சிலையொன்றை உடைக்கும்போது பொதுமக்களிடம் பிடிபட்டவருடன் வந்த மற்றைய நபர் இச்சம்பவங்களின் பிரதானி என்பது கண்டறியப்பட்டிருந்தது. அத்துடன் அவரது சகோதரரும் இந்த விடயங்களுடன் தொடர்புபட்டுள்ளமையும், சகோதரர்கள் இருவருமே இந்த விஷமத்தனமான செயற்பாடுகளுக்கு தலைமை வகித்துள்ளமையும் கண்டறியப்பட்டது.
மொஹம்மட் இப்ராஹிம் சாதிக் அப்துல்லா, மொஹம்மட் இப்ராஹிம் சாஹித் அப்துல்லா என்ற இந்த சகோதரர்களை கண்டுபிடிக்க கேகாலை சிறப்பு பொலிஸ் பிரிவினருக்கு மேலதிகமாக சி.ஐ.டி.யும் களத்தில் குதித்தது.
இந் நிலையில் தேடப்படும் சாதிக் அப்துல்லாவும், சாஹித் அப்துல்லாவும் புத்தளம், வணாத்தவில்லு பொலிஸ் பிரிவுக்குட்பட்ட புபுதுகம – லெக்டோ ஹவுஸ், இலக்கம் 637/3 எனும் இடத்தில் அமைந்துள்ள தென்னந் தோப்பில் மறைந்துள்ளதாக குற்றப் புலனாய்வுப் பிரிவுக்கு ஒரு தகவல் கிடைத்திருந்தது. அந்த தகவல் கிடைத்திருந்தது. அதிலும் பாலாவி, புத்தளம் – மன்னார் வீதியின் இரண்டாம் குறுக்குத் தெருவைச் சேர்ந்த மொஹம்மட் முபீஸ் என்பவருடன் அவர்கள் இருப்பதாக இதன்போது தகவல் வெளிப்படுத்தப்பட்டிருந்தது.
அதன்படியே சி.ஐ.டி. குழுவினர் அங்கு செல்ல நடவடிக்கைகளை எடுத்திருந்தனர். புத்தளம் – மன்னார் வீதியூடாக சென்ற சி.ஐ.டி. குழுவினர் அங்கு சென். செபஸ்டியன் கிறிஸ்தவ ஆலயம் அமைந்துள்ள இடத்திலிருந்து இடது பக்கமாக உள்ள வீதியில் சுமார் 2.5 கிலோ மீற்றர்கள் வரை செல்ல வேண்டியேற்பட்டது. அப்போதே அங்கு அந்த 80 ஏக்கர் வரை விஸ்தீரணம் கொண்ட தென்னத்தோப்பை சி.ஐ.டி.யினரால் அடைய முடியுமாக இருந்துள்ளது. ஆள் நடமாட்டமில்லாத ஒதுக்குப்புறமான அந்த தோட்டத்தில் காடுகள் அடர்ந்திருந்தன. போவதற்கு வழி மட்டும் செய்யப்பட்டிருந்தது. அங்கு சி.ஐ.டி.யினர் செல்லும்போது மாலை நேரமாக இருந்தது.
அந்த தோட்டத்தில் ஒரு சிறு கட்டிடம் இருந்த நிலையில் அக்கட்டிடத்துக்கு சூரியஒளி ஊடாக மின்சாரமும் பெறப்பட்டிருந்தது. சாதிக் அப்துல்லா, சாஹித் அப்துல்லாவை தேடி சி.ஐ.டி. சென்றபோதும் அவர்கள் அங்கு இருக்கவில்லை. எனினும், வேறு இளைஞர்கள் நால்வர் அங்கு இருந்தனர். அவர்களில் குறித்த தென்னத்தோப்பு உரிமையாளரின் மகனான மொஹம்மட் முபீஸும் ஒருவர். அந்த தென்னத்தோப்பு அபூ ஹனீபா என்பவருக்கு உரியது. அவர் மரணித்திருந்த நிலையில் அது அவரது இரு மகள்மார் மற்றும் மகனால் பராமரிக்கப்பட்டுள்ளது. மகள்மார் குறித்த காணி தொடர்பில் நேரடியாக எதனையும் முன்னெடுக்காத நிலையில் மகனான மொஹம்மட் முபீஸே அக்காணியில் நடந்த நடவடிக்கைகளை கண்காணித்துள்ளார்.
இந்நிலையில் சி.ஐ.டி. அங்கு சிலை உடைப்பு சந்தேக நபர்களைத் தேடி சென்றபோது, முபீஸும் அவருடன் புத்தளம் – மன்னார் வீதியைச் சேர்ந்த மொஹம்மட் பஸ்ரின், மொஹம்மட் பர்வீன் ஆகியோரும், புத்தளம், வான் வீதியைச் சேர்ந்த மொஹம்மட் ஹமாசும் அத்தோட்டத்தின் சிறிய கட்டிடப் பகுதியில் இருந்துள்ளனர்.
இந்நால்வரிடமும் சி.ஐ.டி. விசாரித்துக்கொண்டிருக்கும் போது, அங்கிருந்த சி.ஐ.டி. அதிகாரி ஒருவரின் கண்ணில் சுமார் 20 மீற்றர் தூரத்தில் புதைத்து, அரைவாசி நிலமட்டத்துக்கு மேல் தெரியும் பிளாஸ்ரிக் பீப்பாய் ஒன்று தென்பட்டுள்ளது.
அப்போது அந்த அதிகாரி யதார்த்தமாக அந்த பீப்பாய் வரை சென்று அதனை சோதித்துள்ளார். இதன்போதே அதில் சி-4 ரகத்தை ஒத்ததென சந்தேகிக்கத்தக்க வெடிபொருள்கள், மேலும் சில அமில வகைகள் மறைத்து வைக்கப்பட்டுள்ளமையை அவர் அவதானித்துள்ளார். இதனையடுத்து உடனடியாக அந்த நால்வரையும் சி.ஐ.டி. தனது பொறுப்பிலெடுத்து அதுகுறித்து விளக்கம் கோர ஆரம்பித்தது.
அப்போது இருட்டிவிடவே உடனடியாக புத்தளம் பொலிஸ் விஷேட அதிரடிப் படையினர் ஸ்தலத்துக்கு வரவழைக்கப்பட்டதுடன், அந்த தோட்டம் அதிரடிப் படை பாதுகாப்பின் கீழ் அடுத்த 24 மணி நேரத்துக்குள் கொண்டுவரப்பட்டது.
இந்நிலையில் மறுநாள் சி.ஐ.டி.யினரால் விரிவான சோதனைகள் நடாத்தப்பட்டன. இதன்போது சி.ஐ.டி. உயரதிகாரிகள் ஸ்தலத்துக்கு விரைந்தனர். வெடிபொருட்கள் தொடர்பில் விசேட பயிற்சியளிக்கப்பட்ட மோப்பநாய் ரினாவும், லெசியும் ஸ்தலத்துக்கு அழைத்துவரப்பட்டு சோதனையிடப்பட்டது. அரச இரசாயனப் பகுப்பாய்வாளர்கள், வெடிபொருள் நிபுணர்கள் எனப் பலரும் அப்போது அங்கு கூடினர்.
இந்நிலையில்தான் நாள் முழுவதும் நடாத்தப்பட்ட சிறப்புத் தேடுதலில் அந்த தென்னத் தோப்பிலிருந்து பல உபகரணங்கள் கைப்பற்றப்பட்டன. அதன்படி அவை தொடர்பில் அங்கிருந்த அந்த நான்கு பேரையும் சி.ஐ.டி. கைது செய்தது.
சுமார் 90 கிலோ வெடிபொருட்களுக்கு மேலதிகமாக 100 இந்திய தயாரிப்பு டெடனேடர்கள், வயர் கோர்ட் தொகுதிகள், இலங்கைக்குள் தடை செய்யப்பட்டுள்ள நைட்டிரேட் அமிலம் 20 லீட்டர் அடங்கிய 6 கேன்கள், மின் குமிழ்கள், அதிசக்திவாய்ந்த வெடிபொருட்களுக்குப் பயன்படுத்தும் சி 4 வெடி மருந்து 75 கிலோ, குழல் 12 துப்பாக்கி ஒன்று, அதற்குப் பயன்படுத்தும் தோட்டாக்கள், எயா ரைபிள் ரக துப்பாக்கி ஒன்று, பாதுகாப்பு கூடாரங்கள் இரண்டு, 20 நாட்கள் வரை பயன்படுத்த முடியுமான உலருணவுகள், கணினி ஒன்று, கமெராவொன்று, தமிழ், அரபு மொழிகளிலான சமயப் புத்தகங்கள், பெரும் தொகை பாய்கள் என பல பொருட்கள் கைப்பற்றப்பட்டன.
இந்நிலையிலேயே அங்கு கைது செய்யப்பட்ட நால்வரையும் அந்தப் பொருட்களுடன் சி.ஐ.டி. தனது தலைமையகத்துக்கு அழைத்து வந்தது. அவர்கள் கைது செய்யப்பட்டு 48 மணி நேரத்தில் அந்த நால்வரையும் பயங்கரவாத தடை சட்ட விதிகள் பிரகாரம் 90 நாட்கள் தடுப்புக் காவலில் வைத்து விசாரிக்க பாதுகாப்பு அமைச்சிடம் விண்ணப்பித்த சி.ஐ.டி. அதற்கான அனுமதியையும் பெற்றுக்கொண்டது. இவர்களில் முபீஸ் மற்றும் ஹமாஸ் தவிர ஏனைய இருவரும் குற்றமற்றவர்கள் என விடுவிக்கப்பட்டிருந்தனர்.– Vidivelli