சாய்ந்தமருதில் குண்டினை வெடிக்க வைத்தவர்களின் உடற்பாகங்கள் மீண்டும் தோண்டி எடுக்கப்பட்டன
சாராவுக்கு என்ன நடந்தது என்பதைக் கண்டறிய 3 ஆவது டி.என்.ஏ. பரிசோதனைக்கு ஏற்பாடு
(எம்.எப்.எம்.பஸீர், பாறூக் ஷிஹான்)
உயிர்த்த ஞாயிறு தின தொடர் தற்கொலை குண்டுத் தாக்குதல்கள் தொடர்பான விசாரணைகளில் தொடர்ந்து மர்மமாக உள்ள, நீர்கொழும்பு – கட்டுவபிட்டிய தேவாலயத்தில் தாக்குதல் நடாத்திய மொஹம்மது ஹஸ்தூன் எனும் குண்டுதாரியின் மனைவியான புலஸ்தினி மகேந்திரரன் எனும் சாராவுக்கு என்ன நடந்தது என்பது தொடர்பில் வெளிப்படுத்த 3 ஆவது தடவையாகவும் மீண்டும் டி.என்.ஏ. பரிசோதனைகளை முன்னெடுக்க ஏற்பாடுகள் செய்யப்பட்டுள்ளன.
அதற்காக, கடந்த 2019 ஏப்ரல் 26 ஆம் திகதி சாய்ந்தமருது – வெலிவேரியன் பகுதியில் வீடொன்றில் குண்டினை வெடிக்கச் செய்து தற்கொலை செய்துகொண்டதாக நம்பப்படும், சஹ்ரானின் சகோதரர் ரில்வான் தலைமையிலான குழுவினருடைய உடற் பாகங்கள், அம்பாறை பொது மயானத்தில் புதைக்கப்பட்டிருந்த நிலையில், அவை நேற்று மீள தோண்டி எடுக்கப்பட்டன.
கல்முனை நீதிவானிடம் பெற்றுக்கொள்ளப்பட்ட உத்தரவுக்கு அமைய இவ்வாறு உடற்பாகங்கள், அம்பாறை நீதிவான் துஷாரா குமாரி தர்மகீர்த்தி முன்னிலையில் தோண்டி எடுக்கப்பட்டன.
இதற்கு முன்னர் குறித்த உடற்பாகங்கள் தொடர்பில் பரிசோதனைகளை முன்னெடுத்த சட்ட வைத்திய அதிகாரிகள், இவ்விவகாரத்தில் விசாரணைகளை முன்னெடுத்த அனைத்து பொலிஸ் அதிகாரிகளுடன் அரசாங்க இரசாயன பகுப்பாய்வாளர் திணைக்கள அதிகாரிகளும் இந் நடவடிக்கையின் போது பங்கேற்றிருந்தனர்.
பலத்த பொலிஸ் பாதுகாப்புக்கு மத்தியில் முன்னெடுக்கப்பட்ட இந் நடவடிக்கையின் போது, அம்பாறை மாநகர சபையின் பெக்கோ இயந்திரம் கொண்டு புதைக்கப்பட்ட இடம் மீள தோண்டப்பட்ட நிலையில், அரச இரசாயன பகுப்பாய்வாளர் மற்றும் சட்ட வைத்திய அதிகாரிகளின் வழி நடாத்தலில் உடற் பாகங்கள், கறுப்பு நிற பாதுகாப்பு பைகளுடன் தோண்டி எடுக்கப்பட்டன. பின்னர் சட்ட வைத்திய அதிகாரிகள் தேவையான மாதிரிகளைப் பெற்றுக்கொண்டுள்ளதுடன், தற்போது உடற்பாகங்கள் அம்பாறை பொலிஸ் தடயவியல் பிரிவினரின் (சொகோ) பொறுப்பில் வைக்கப்பட்டுள்ளன. இந் நிலையிலேயே இந்த உடற் பாகங்கள் மூன்றாவது டி.என்.ஏ. பரிசோதனைகளை முன்னெடுப்பதற்காக கொழும்புக்கு விரைவில் அனுப்பிவைக்கப்படவுள்ளன.
இது குறித்து விடிவெள்ளியிடம் பேசிய பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சர் நிஹால் தல்துவ,
‘ தோண்டி எடுக்கப்பட்ட உடற்பாகங்களிலிருந்து சட்ட வைத்திய அதிகாரிகள் தேவையான மாதிரிகளைப் பெற்றுள்ளனர். தற்போது பெறப்பட்ட மாதிரிகள், உடற்பாகங்கள் அனைத்தும் அம்பாறை பொலிஸ் ஸ்தல தடயவியல் பிரிவினரின் பொறுப்பின் கீழ் உள்ளன. எதிர்வரும் நாட்களில் கல்முனை நீதிவானிடம் சி.ஐ.டி.யினரும், அம்பாறை பொலிஸ் ஸ்தல தடயவியல் பிரிவினரும் அறிக்கை ஊடாக விடயங்களை முன் வைத்து, டி.என்.ஏ. பரிசோதனைக்காக உடற்பாகங்களை அரச இரசாயன பகுப்பாய்வாளருக்கு அனுப்புவர்.’ என தெரிவித்தார்.
கடந்த 2019 ஏப்ரல் 26 ஆம் திகதி சாய்ந்தமருது – வெலிவேரியன் பகுதியில் வீடொன்றில் மறைந்திருந்த பயங்கரவாதிகள், பாதுகாப்பு படைகளுடனான மோதலினிடையே குண்டினை வெடிக்கச் செய்து தற்கொலை செய்துகொண்டிருந்தனர்.
இதன்போது அங்கு மொத்தமாக 19 பேர் இருந்ததாக தகவல்கள் வெளிப்படுத்தப்பட்டன. எனினும் சஹ்ரானின் மனைவியும் அவரது ஒரு குழந்தையும் உயிருடன் மீட்கப்பட்டனர். எனினும் முன்னெடுக்கப்பட்ட ஸ்தல பரிசோதனைகளின் போதும் அடையாளம் காணப்பட்ட உடற்பாகங்கள் மீது முன்னெடுக்கப்பட்ட டி.என்.ஏ. பரிசோதனைகளின் போதும், 16 சடலங்களே அடையாளம் காணப்பட்டிருந்தன. இந் நிலையிலேயே அங்கிருந்த சாரா எனும் பயங்கரவாதி தப்பித்துள்ளதாக தகவல்கள் வெளிப்படுத்தப்பட்டன.
கொழும்பு மற்றும் நீர் கொழும்பு, மட்டக்களப்பு ஆகிய இடங்களில் கடந்த 2019 ஏப்ரல் 21 ஆம் திகதி தம்மைத் தாமே இலங்கையின் ஐ.எஸ்.ஐ.எஸ். இனர் என அழைத்துக்கொண்ட தேசிய தெளஹீத் ஜமா அத் தலைவனாக செயற்பட்ட சஹ்ரான் ஹஷீம் தலைமையிலான கும்பலினால் 8 தொடர் குண்டுத் தாக்குதல்கள் நடாத்தப்பட்டன.
இந்த குண்டுவெடிப்பு தொடர்பிலான விசாரணைகளிலேயே சாரா தொடர்பில் முதலில் தகவல்கள் வெளிப்படுத்தப்பட்டன. குறிப்பாக கட்டுவாபிட்டிய தேவாலய குண்டுவெடிப்பு சம்பவத்தின் குண்டுதாரியின் மனைவி என அடையாளம் காணப்பட்ட சாரா, அந்த குண்டுதாரியை காதலித்து மதம் மாறி அவனை திருமணம் செய்திருந்தார்.
இந் நிலையில், 2019 ஏப்ரல் 21 ஆம் திகதி தாக்குதல்களை நடாத்திய குண்டுதாரிகளான சஹ்ரான் ஹஸீமின் குடும்பத்தினர், ஹஸ்தூனின் மனைவி உட்பட மேலும் பலர் சாய்ந்தமருது – வெலிவேரியன் பகுதியில் வீடொன்றில் மறைந்திருப்பது தெரியவரவே, அதனை சுற்றி வளைத்த போது, அங்கு இருந்த தற்கொலை குண்டுதாரிகள் குண்டுகளை வெடிக்கச் செய்து தமது உயிர்களை மாய்த்துக்கொண்டிருந்தனர். அதனையடுத்து இராணுவத்தினர் முன்னெடுத்த தேடுதலில், சஹ்ரானின் மனைவி ஹாதியாவும், அவரது மகளும் படுகாயமடைந்த நிலையில் உயிருடன் மீட்கப்பட்டிருந்தனர். இந் நிலையில் சிகிச்சைகளிடையே சஹ்ரானின் மனைவியிடம் முன்னெடுத்த விசாரணைகளில் சி.ஐ.டி. சிறப்புக் குழு பல்வேறு தகவல்களை வெளிப்படுத்திக்கொண்டிருந்தது.
அதன்படி, குறித்த சாய்ந்தமருது வீடு சுற்றிவளைக்கப்படும் போது அங்கு இருந்தவர்கள் யார் யார் என்பதை சி.ஐ.டி. வெளிப்படுத்தியது. கொழும்பிலிருந்து அவர்கள் சாய்ந்தமருதுக்கு செல்லும் வழியே, குருணாகல் மாவட்டம் – கிரிஉல்ல பகுதி துணிக்கடையில் அடுத்த கட்ட தாக்குதலுக்கு என சந்தேகிக்கப்படும் வெள்ளை ஆடைகளை கொள்வனவு செய்யும் சி.சி.ரி.வி. காட்சிகளிலும் சாரா உள்ளிட்டவர்கள் தெளிவாக விசாரணைகளால் அடையாளம் காணப்பட்டனர்.
இவ்வாறான பின்னணியில், சட்டத் தேவைக்காக சாய்ந்தமருது வீட்டில் தற்கொலை செய்துகொண்டு உயிரிழந்த பயங்கரவத கும்பலைச்சேர்ந்தவர்களின் ஆள் அடையாளத்தை நிரூபிக்க, சஹ்ரானின் மனைவி ஹாதியாவின் வாக்கு மூலத்தினை அடிப்படையாக கொண்டு டி.என்.ஏ. பரிசோதனைகள் ஆரம்பிக்கப்பட்டன.
அதாவது, சம்பவ இடத்திலிருந்து ஸ்தல தடயவியல் பிரிவினரால் அடையாளம் காணப்பட்டு மீட்கப்பட்ட உயிரியல் கூறுகள், குண்டு வெடிக்கச் செய்யும் போது வீட்டில் இருந்தவர்கள் என சஹ்ரானின் மனைவி ஹாதியாவின் வாக்குமூலத்தில் குறிப்பிடப்பட்டவர்களின் இரத்த உறவுகளிடம் பெறப்பட்ட உயிரியல் கூறுகளுடன் ஒப்பீடு செய்யப்பட்டன.
இதன்போது ஹாதியாவின் வாக்கு மூலத்தில் குறிப்பிடப்பட்டிருந்த அனைவரினதும் டி.என்.ஏ.க்கள் கண்டறியப்பட்டு அவர்களது இறப்பு அறிவியல் ரீதியில் உறுதி செய்யப்பட்ட போதும், ஹாதியா பெயர் குறிப்பிட்ட சாரா தொடர்பில் மட்டும் டி.என்.ஏ. பரிசோதனைகள் தோல்வியடைந்தன. ( ஹாதியாவின் வாக்கு மூலத்தை தவிர வேறு சுயாதீனமான சாட்சிகள் ஊடாகவும் அவ்வீட்டில் இருந்தவர்கள் யார் என்பதை விசாரணையாளர்கள் கண்டறிந்திருந்தனர்)
இதனையடுத்து அது குறித்து விஷேட விசாரணைகள் ஆரம்பிக்கப்பட்டன. சாராவின் தாயின் டி.என்.ஏ. மாதிரிகளை பெற்றே, சம்பவ இடத்திலிருந்த உயிரியல் கூறுகளுடன் அது ஒப்பீடு செய்யப்பட்டிருந்தது.
இவ்வாறான நிலையிலேயே ஏற்கனவே இரு முறை செய்யப்பட்ட டி.என்.ஏ. பரிசோதனைகளுக்கு மேலதிகமாக மீளவும் டி.என்.ஏ. பரிசோதனைகளுக்கான நீதிமன்ற அனுமதி பெறப்பட்டு தற்போது உடற் பாகங்கள் தோண்டி எடுக்கப்பட்டு, இரசாயன பகுப்பாய்வுகளுக்காக கொழும்புக்கு அனுப்பி வைக்கப்படவுள்ளமை குறிப்பிடத்தக்கது.
-Vidivelli