தமது கட்சியின் தலைவர் ரவூப் ஹக்கீம் வேண்டிக் கொண்டதற்கமையவே, 20 ஆம் திருத்தத்திற்கு ஆதரவு வழங்கியதாகவும் அதனடிப்படையிலேயே தற்போதும் அரசாங்கத்துக்கு ஆதரவு வழங்கி வருவதாக சுற்றுச்சூழல் அமைச்சர் நசீர் அஹமட் தெரிவித்துள்ளார்.
பிபிசி தமிழுக்கு வழங்கிய செவ்வியிலேயே அவர் இதனைக் குறிப்பிட்டுள்ளார்.
இது தொடர்பில் அவர் மேலும் தெரிவித்துள்ளதாவது, “பொதுஜன பெரமுன பாராளுமன்ற உறுப்பினர் டிரான் அலஸின் வீட்டிடுக்கு 2020ஆம் ஆண்டு ஒக்டோபர் மாதம் 10ஆம் திகதி மிலிந்த மொரகொடவுடன் (தற்போதைய இந்தியாவுக்கான இலங்கைத் தூதுவர்) ஒரு தடவை சென்ற முஸ்லிம் காங்கிரஸ் தலைவர் ரஊப் ஹக்கீம், அங்கு ஜனாதிபதி கோட்டாபய ராஜபக்சவைச் சந்தித்து தனக்குத் தேவையான அனைத்து ஒப்பந்தங்களையும் செய்து முடித்தார.;
அதேபோன்று முஸ்லிம் காங்கிரஸ் தலைவர் ரஊப் ஹக்கீமுடைய வீட்டுக்கு 2020 ஒக்டோபர் 18ஆம் திகதி பசில் ராஜபக்ச வந்து ஹக்கீமுடன் பேச்சுவார்ததை நடத்தினார். அப்போது நான் உட்பட முஸ்லிம் காங்கிரஸின் 4 பாராளுமன்ற உறுப்பினர்களும் அங்கு இருந்தோம். அதன்போது முஸ்லிம் காங்கிரஸின் 04 பாராளுமன்ற உறுப்பினர்களும் அரசியலமைப்புக்கான 20ஆவது திருத்தத்தை ஆதரித்து வாக்களிப்பார்கள் என பசில் ராஜபக்சவிடம் முஸ்லிம் காங்கிரஸ் தலைவர் ரஊப் ஹக்கீம் வாக்குறுதி வழங்கினார்.
பசில் ராஜபக்சவுடனான அந்த சந்திப்பு பகல் 12.16 மணிக்கு ஆரம்பித்து 1.15 வரைக்கும் நடந்தது.
அரசியலமைப்பின் 20ஆவது திருத்தம் தொடர்பான விவாதத்தில் கலந்து கொண்டு பாராளுமன்றில் நான் உரையாற்றிய போது, எமது கட்சித் தலைவர் மனச்சாட்சிக்கு அமைவாக வாக்களிக்குமாறு எங்களுக்குக் கூறியுள்ளார் என கூறினேன். அதனை தலைவர் ஹக்கீம் கேட்டுக் கொண்டிருந்தார். நான் கூறியது பொய் என்றால், அவர் என்னை இடைமறித்து, ‘நீங்கள் 20ஆவது திருத்தத்தை எதிர்த்து வாக்களிக்க வேண்டும்” எனக் கூறியிருக்கலாமல்லவா? ஆனால் அவர் அதனைச் செய்யவில்லை. காரணம், அவரின் உத்தரவுக்கு அமைவாகத்தான் அன்று 20ஆவது திருத்தத்துக்கு ஆதரவாக நாம் வாக்களித்தோம்.
இவ்வாறு எம்மை அரசாங்கத்தின் பக்கம் செல்லுமாறு கூறிவிட்டு, இப்போது முஸ்லிம் காங்கிரஸ் தலைவர் எம்மைக் குற்றஞ்சாட்டுவது எந்தவகையில் நியாயம் எனவும் ஹாபிஸ் நசீர் கேள்வியெழுப்பியுள்ளார்.– Vidivelli