ஏ.ஆர்.ஏ.பரீல்
எமது நாட்டில் மேற்கொள்ளப்பட்ட, சர்வதேசத்தையே அதிரவைத்த 2019ஆம் ஆண்டின் உயிர்த்த ஞாயிறு தின தற்கொலைத் தாக்குதல் முஸ்லிம் சமூகத்தை தீவிரவாதிகள் என முத்திரை குத்திவிட்டது. முஸ்லிம் சமூகத்தின் சிறியவோர் குழுவினரால் மேற்கொள்ளப்பட்ட இத்தாக்குதல் சமூகத்தின் தலையெழுத்தையே மாற்றி எழுதிவிட்டது என்று கூறலாம்.
முஸ்லிம் சமூகத்தின் புத்திஜீவிகள், மார்க்க அறிஞர்கள், பொதுமக்கள் எனப்பலரும் இத்தாக்குதலை வன்மையாகக் கண்டித்தும் பெரும்பான்மைச் சமூகமும், கத்தோலிக்க சமூகமும் கண்டனங்களையும் மறுப்புகளையும் ஏற்றுக்கொள்ளவில்லை. முஸ்லிம் சமூகத்தின் மீது இந்தப் பழியைச் சுமத்துவதற்கு பல முயற்சிகள் தொடர்ந்தும் முன்னெடுக்கப்பட்டு வருகின்றன. முஸ்லிம்கள் தொடர்ந்தும் இலக்கு வைக்கப்படுகிறார்கள்.
உயிர்த்த ஞாயிறு தாக்குதல் தொடர்பாக ஆராய்வதற்கு நியமிக்கப்பட்டிருந்த ஜனாதிபதி ஆணைக்குழுவின் பரிந்துரைகளில் முஸ்லிம்கள் சார்ந்த பரிந்துரைகள் மாத்திரமே தற்போது ஒன்றன்பின் ஒன்றாக அமுல்படுத்தப்படுகின்றன.
ஏனைய சமூகம் சார்ந்த பரிந்துரைகள் மற்றும் கடந்தகாலங்களில் முஸ்லிம்களுக்கு எதிராக நாட்டில் பரப்பப்பட்ட இனவாதத்தின் சூத்திரதாரிகள் விசாரணை செய்யப்பட வேண்டும் போன்ற சிபாரிசுகளை இதுவரை அரசாங்கம் கண்டு கொள்ளவில்லை. தேடிப்பார்க்கவில்லை என்பதை எவராலும் மறுக்க முடியாது. ஆனால் தற்போது உயிர்த்த ஞாயிறு ஆணைக்குழு பரிந்துரைத்துள்ள முஸ்லிம் சமூகம் சார்ந்த விடயங்கள் ஒன்றன்பின் ஒன்றாக அரங்கேற்றப்பட்டு வருகின்றன.
இஸ்லாம் சமய பாடநூல்களில் திருத்தங்கள்
பாடசாலை மாணவர்களுக்கான இஸ்லாம் சமய பாடநூல்களில் தற்போது திருத்தங்கள் மேற்கொள்ளப்படவுள்ளன. இது தொடர்பாக கல்வி வெளியீட்டுத் திணைக்களத்தின் ஆணையாளர் நாயகம் பி.என். அயிலபெரும சகல தேசிய பாடசாலை அதிபர்கள் மற்றும் பாடநூல்கள் நேரடியாக விநியோகிக்கப்படும் பாடசாலை அதிபர்கள் என்போருக்கு சுற்றுநிருபம் ஒன்றினை அனுப்பி வைத்துள்ளார். EPD/DIS/1/2021/01 ஆம் இலக்க குறிப்பிட்ட சுற்றுநிருபம் 2021.12.14ஆம் திகதி அனுப்பி வைக்கப்பட்டுள்ளது.
இஸ்லாம் தரம் 6 (சிங்களம்), இஸ்லாம் தரம் 6 (தமிழ்), இஸ்லாம் தரம் 7 (சிங்களம்), இஸ்லாம் தரம் 10 (சிங்களம்) இஸ்லாம் தரம் 10 (தமிழ்) , இஸ்லாம் தரம் 11 (தமிழ்) ஆகிய இஸ்லாம் சமய பாடநூல்களில் திருத்தங்கள் மேற்கொள்ள வேண்டியுள்ளதால் அப்பாட நூல்களை பாடசாலை மாணவர்களுக்கு விநியோகிப்பதை உடனடியாக நிறுத்துமாறு அயிலப்பெரும வேண்டியிருந்தார்.
இப்பாட நூல்கள் மாணவர்களுக்கு ஏற்கனவே விநியோகிக்கப்பட்டிருந்தால் அவற்றை பாடசாலை களஞ்சியங்களுக்கு திருப்பிப் பெற்றுக்கொள்ளுமாறும் அதிபர்களுக்கு தெரிவிக்கப்பட்டிருந்தது.
தற்போது மாணவர்கள் பயன்படுத்துகின்ற குறிப்பிட்ட இஸ்லாம் சமய பாட நூல்கள் திருப்பி எடுக்கப்பட வேண்டியுள்ளதுடன் மீள்பயன்பாட்டிற்காக அவற்றை மாணவர்களுக்கு விநியோகிக்கக்கூடாது. இந்நூல்களுக்குப் பதிலாக புதிய திருத்தப்பட்ட நூல்களை வழங்குவதற்கு கல்வி வெளியீட்டுத் திணைக்களம் மூலம் நடவடிக்கை மேற்கொள்ளப்படும் எனவும் சுற்று நிருபத்தில் தெரிவிக்கப்பட்டிருந்தது.
கல்வி வெளியீட்டுத் திணைக்கள ஆணையாளர் நாயகத்தின் விளக்கம்
கல்வி வெளியீட்டுத் திணைக்களத்தின் இந்தத் திடீர் நடவடிக்கையினால் முஸ்லிம் சமூகம் அதிர்ச்சியடைந்தது. பாடசாலை மாணவர்களுக்கான பரீட்சைகள் திட்டமிடப்பட்டுள்ள நிலையில் இஸ்லாம் சமய பாட நூல்கள் மீளத் திருப்பிப் பெறப்படவுள்ளன. திருத்தங்கள் மேற்கொள்ளப்படவுள்ளன என அறிவிக்கப்பட்டமையால் பாடசாலை மாணவர்கள் உள ரீதியில் பாதிப்புகளை எதிர்நோக்கினர்.
கல்வி வெளியீட்டுத் திணைக்கள ஆணையாளர் நாயகம் பீ.என். அயிலப்பெருமவிடம் சுற்றுநிருபம் தொடர்பில் விளக்கம் கோரிய போது, ‘இஸ்லாமிய சமய பாட நூல்கள் திருத்தங்களுடன் மீள அச்சிடப்பட்டு வருகின்றன’ என்றார்.
யாரின் உத்தரவுக்கமைய இந்நடவடிக்கை முன்னெடுக்கப்பட்டது? என்று வினவிய போது, உயிர்த்த ஞாயிறு தாக்குதல் தொடர்பில் ஆராய்ந்த ஜனாதிபதி ஆணைக்குழுவின் பரிந்துரைகள் மற்றும் ஒரே நாடு ஒரே சட்டம் தொடர்பான ஞானசார தேரரின் தலைமையிலான ஜனாதிபதி செயலணியின் பரிந்துரைக்கமையவே இந்நடவடிக்கைகள் மேற்கொள்ளப்பட்டன எனப் பதிலளித்தார்.
குறிப்பிட்ட இஸ்லாம் சமய பாட நூல்கள் மீள திருப்பிப் பெற்றுக் கொள்ளப்பட்டதன் மூலம் மாணவர்களின் கல்வி நடவடிக்கைகளுக்கு எவ்வித பாதிப்பும் ஏற்படாது. எதிர்வரும் ஏப்ரல் மாதத்துக்கு முன்பு திருத்தப்பட்ட புதிய பாடநூல்கள் மாணவர்களுக்கு வழங்கப்படும். கல்வி அமைச்சினால் நியமிக்கப்பட்ட குழுவொன்றின் பரிந்துரைகளுக்கு அமைய கல்வி வெளியீட்டுத் திணைக்களத்தின் இஸ்லாமிய கற்கைகளுக்குப் பொறுப்பான முஸ்லிம் அதிகாரிகளின் சிபாரிசுகளின்படியே இஸ்லாமிய சமயபாட நூல்களில் திருத்தங்கள் மேற்கொள்ள நடவடிக்கை எடுக்கப்பட்டது என்றும் அவர் கூறியுள்ளார்.
ஒரே நாடு ஒரே சட்டம் தொடர்பான ஜனாதிபதி செயலணியின் தலைமைக் காரியாலயம் மற்றும் தேசிய பாதுகாப்பு கற்கைகள் நிறுவனம் என்பனவற்றிலிருந்து எமக்குக் கிடைத்த தகவல்களின்படி அப்பாட நூல்களில் தகாத, அடிப்படைவாத வசனங்கள் அடங்கியுள்ளன. இந்த பாட நூல்களில் அடங்கியிருந்த தீவிரவாத வசனங்களே திருத்தப்பட்டுள்ளன. எனினும் சிறிய திருத்தங்களே மேற்கொள்ளப்பட்டுள்ளன எனவும் அவர் தெரிவித்தார்.
உயிர்த்த ஞாயிறு ஆணைக்குழுவின் பரிந்துரைகள்
பாடசாலைகள், பாடத்திட்டம், சமய பாடநூல்கள் தொடர்பில் உயிர்த்த ஞாயிறு ஆணைக்குழு பரிந்துரைகளை சிபாரிசு செய்துள்ளது.
தேசிய, மாகாண பாடசாலைகள் மற்றும் சர்வதேச பாடசாலைகள் எதிர்காலத்தில் பௌத்தம், கிறிஸ்தவம், இந்து, இஸ்லாம் என்ற ரீதியில் வேறுபடுத்தப்படாது பொதுவானதாக அமைய வேண்டும். அனைத்துப் பாடசாலைகளிலும் நாட்டின் மத விகிதாசாரத்துக்கேற்ப மாணவர்கள் இணைத்துக் கொள்ளப்பட வேண்டும். பாடசாலைகளில் அனைத்துமத மாணவர்களும் ஒன்றாகக் கல்வி கற்க வேண்டும்.
நாட்டின் தேசிய, மாகாண பாடசாலைகள் மற்றும் சர்வதேச பாடசாலைகள் என்பனவற்றில் கல்விபயிலும் மாணவர்களுக்கான சமயபாட நூல்களில் தீவிரவாதம் அல்லது பயங்கரவாத இலக்கியம் என்பன நேரடியாக அல்லது மறைமுகமாக உள்ளடங்கியுள்ளதா என்பது ஆராய்ந்து அறியப்பட வேண்டும்.
கல்வி வெளியீட்டு பாட நூல்கள் குழுவொன்றினால் மீளாய்வு செய்யப்பட்டு பாட நூல்களில் அடிப்படைவாத அல்லது தீவிரவாத கருத்துகள் உள்ளடங்கியுள்ளதா என்பதனை ஆராய்ந்து அக்கருத்துகள் அகற்றப்பட வேண்டும் என உயிர்த்த ஞாயிறு ஆணைக்குழு தனது பரிந்துரையில் தெரிவித்துள்ளது. இஸ்லாம் மத பாட நூல்களில் அடங்கியுள்ளதாகக் கூறப்படும் அடிப்படை வாதத்துடன் தொடர்பான வசனங்கள் இதன் அடிப்படையிலே அகற்றப்பட்டுள்ளன அல்லது திருத்தப்பட்டுள்ளன என கல்வி வெளியீட்டுத் திணைக்களம் தெரிவித்துள்ளது.
மீளாய்வு குழு
குறிப்பிட்ட இஸ்லாம் சமய பாட நூல்களைப் படித்து மீளாய்வு செய்து திருத்தங்கள் தொடர்பில் பரிந்துரை செய்வதற்கு கல்வி அமைச்சினால் குழுவொன்று நியமிக்கப்பட்டது. இக்குழுவில் பாட நூல்கள் அபிவிருத்திக்கான ஆணையாளர் நிர்மலா பியசீலி, தோட்டப்புற பாடசாலைகளின் கல்வி அபிவிருத்திக்கான பணிப்பாளர் எஸ்.முரளீதரன், சமயக் கல்விகளுக்கான பணிப்பாளர் நிமல் தர்மசிறி, தமிழ் பாடசாலைகளின் அபிவிருத்திக்கான கல்விப் பணிப்பாளர் என். ஆலால சுந்தரம், வெளியீடுகளுக்கான உதவி ஆணையாளர் இந்துனில் பியசாத் ஆகியோர் உள்ளடங்கியிருந்தனர்.
இஸ்லாம் சமய பாடநூல்களில் அடங்கியுள்ள அடிப்படைவாத கருத்துக்களை மற்றும் வசனங்களை மீளாய்வு செய்து திருத்தங்களை மேற்கொள்வதற்காக நியமிக்கப்பட்ட குழுவில் ஒரு முஸ்லிமேனும் அடங்கியில்லாமை பெரும் தவறாகும்.
இஸ்லாமிய கற்கைகளுக்கு பொறுப்பான அதிகாரிகள்
கல்வி வெளியீட்டுத் திணைக்களத்தின் இஸ்லாமிய கற்கைகளுக்குப் பொறுப்பாக இருக்கும் இரு முஸ்லிம் அதிகாரிகளிடம் கல்வி அமைச்சினால் நியமிக்கப்பட்டிருந்த குழுவின் அறிக்கை சமர்ப்பிக்கப்பட்டது. அவர்கள் அறிக்கையை ஆராய்ந்து திருத்தங்களை மேற்கொள்வதற்கு சிபாரிசு செய்தனர். அவ் அதிகாரிகள் எம்.ரி.ஏ.ரஹ்மான், ஐ.எ.எம்.அப்சான் ஆகியோராவார்.
கல்வி வெளியீட்டுத் திணைக்களத்தின் இஸ்லாமிய கற்கைகளுக்குப் பொறுப்பான அதிகாரிகளில் ஒருவரான ஐ.ஏ.எம்.அப்சானை தொடர்பு கொண்டு இது தொடர்பில் வினவியபோது அவர் பின்வருமாறு தெரிவித்தார்.
‘இஸ்லாமிய சமய பாடநூல்களில் அடங்கியுள்ள சில சர்ச்சைக்குரிய கருத்துக்களே திருத்தங்களுக்கு உட்படுத்தப்பட்டுள்ளன. பாட நூல்களில் அடங்கியுள்ள சில வசனங்கள் நீக்கப்பட்டுள்ளன. சில வசனங்கள் மாற்றியமைக்கப்பட்டுள்ளன. இத்திருத்தங்கள் இஸ்லாம் பாடத்திட்டம் மற்றும் மார்க்கத்துக்குப் பாதிப்பில்லாத வகையிலே மேற்கொள்ளப்பட்டுள்ளன.
அரசாங்க அச்சகத்தில் ஒரு தொகைப்பாட நூல்கள் அச்சிடப்பட்டுள்ளன. அந்தப் பாடநூல்களில் திருத்தங்களின் ஸ்டிக்கர் ஒட்டப்படும். ஏற்கனவே மாணவர்களுக்கு விநியோகிக்கப்பட்டுள்ள பாட நூல்கள் மீளப்பெற்று களஞ்சியத்துக்கு அனுப்பப்பட்டு வருகிறது. அந்நூல்கள் மீண்டும் திருத்தங்களுடன் மாணவர்களுக்கு விநியோகிக்கப்பட மாட்டாது.
விஷேட உத்தரவுகளின் படியே இந்நடவடிக்கை மேற்கொள்ளப்பட்டுள்ளது. ஆனால் மாணவர்களின் கல்வி நடவடிக்கைகளுக்கு எந்தப் பாதிப்பும் ஏற்படாத வகையில் இத்திட்டத்தை கல்வி வெளியீட்டுத் திணைக்களம் மேற்கொண்டுள்ளது. 10 ஆம், 11ஆம் தரங்களுக்குரிய இஸ்லாம் சமய பாட நூல்களிலே பல திருத்தங்கள் மேற்கொள்ளப்பட்டுள்ளன. இதேவேளை 6ஆம், 7ஆம் தரங்களுக்குரிய பாடநூல்களில் ஒரு சில திருத்தங்களே மேற்கொள்ளப்பட்டுள்ளன. சர்ச்சைக்குரிய கருத்துக்கள் அடங்கிய வசனங்கள் அகற்றப்பட்டுள்ளன அல்லது மாற்றப்பட்டுள்ளன என்றார்.
சிலை வணக்கம் இஸ்லாத்தில் வெறுக்கத்தக்கது என இஸ்லாம் சமய பாட நூலில் தெரிவிக்கப்பட்டுள்ளது. இதனால் மாணவர்கள் தவறாக வழி நடத்தப்படலாம் என்ற அடிப்படையிலே இவ்வசனத்தை நீக்குவதற்கு சிபாரிசு செய்யப்பட்டது.
அத்தோடு ‘எனது மகள் பாத்திமா களவெடுத்தாலும் அவளது கையை நான் வெட்டுவேன்’ என நபிகள் நாயகம் தெரிவித்ததாக பாட நூல்களில் குறிப்பிடப்பட்டுள்ளது. இது போன்ற விடயங்களே திருத்தத்திற்கு உட்படுத்தப்பட்டுள்ளன என்றும் அவர் தெரிவித்தார்.
உலமா சபை விளக்கம் கோரியது
இஸ்லாமிய சமயபாட நூல்கள் மீளப்பெற்றுக் கொள்ளப்பட்டமை தொடர்பில் அகில இலங்கை ஜம்இய்யத்துல் உலமா சபை கல்வி வெளியீட்டுத் திணைக்களத்திடம் விளக்கம் கோரியுள்ளது.
உலமா சபை இது தொடர்பில் கல்வி வெளியீட்டுத் திணைக்களத்தின் ஆணையாளர் நாயகம் பீ.என்.அயிலப்பெருமவுக்கு கடிதம் ஒன்றினை அனுப்பி வைத்துள்ளது.
ஏன் திடீரென இஸ்லாமிய சமய பாட நூல்களை மீளப்பெற்றுக் கொள்வதற்கும் திருத்தங்களைச் செய்வதற்கும் தீர்மானித்திருக்கிறீர்கள்? இதனால் மாணவர்களின் கல்வி நடவடிக்கைகள் பாதிப்புக்குள்ளாகியுள்ளது என அகில இலங்கை ஜம்இய்யத்துல் உலமா சபை கேள்வியெழுப்பியுள்ளது. அத்துடன் இது தொடர்பில் பேச்சுவார்த்தை நடாத்துவதற்கு நேரம் ஒதுக்கித் தருமாறும் கோரியுள்ளது.
அத்தோடு உலமா சபை கல்வி அமைச்சர் தினேஷ் குணவர்தனவையும் சந்தித்து இது தொடர்பில் பேச்சுவார்த்தை நடாத்தத் திட்டமிட்டுள்ளது.
உலமா சபையின் செயலாளர்
இஸ்லாமிய சமய பாடநூல் விவகாரம் தொடர்பில் அகில இலங்கை ஜம்இய்யத்துல் உலமா சபையின் செயலாளர் அஷ்ஷெய்க் அர்கம் நூராமித் தெரிவித்துள்ள கருத்துகள் கவனத்திற் கொள்ளப்பட வேண்டியவை.
‘இஸ்லாம் சமய பாடநூல்களில் சில தலைப்புகள் மற்றும் சில வசனங்கள் தொடர்பாக பாதுகாப்புத் துறையின் குற்றவியல் விசாரணை பிரிவு மற்றும் தேசிய கல்வி நிறுவனம் உலமா சபையிடம் தெளிவுகளை கோரியது.
அதற்கான தெளிவுகளை நாம் ஏற்கனவே வழங்கியுள்ளோம். மாணவர்களுக்கான பாடநூல்களை வெளியிடுவதற்காக ஒவ்வோர் சமயத்துக்கும் தனித்தனியாக பாடநூல் ஆக்கக் குழுக்கள் இருக்கின்றன. இக்குழுவினை தேசிய கல்வி நிறுவகமே (NIE) நியமனம் செய்கிறது.
இஸ்லாம் சமய பாடநூலாக்கக் குழுவைத் தவிர ஏனைய சமயங்களுக்கான பாடநூலாக்கக் குழுக்கள் ஆக்கங்களை பரிசீலனைக்காக அந்தந்த சமயங்களின் அறிஞர்கள், நிபுணர்கள் அடங்கிய மார்க்க சபைக்கே அனுப்பி வைக்கின்றன. மார்க்க சபையின் ஆலோசனைகளின்படி அந்தந்த சமய பாட நூல்கள் வெளியிடப்படுகின்றன.
ஆனால் இஸ்லாம் சமய பாடநூலாக்கக் குழு இந்த நடைமுறையினைப் பின்பற்றுவதில்லை. இதனால் சமய பாடநூல்கள் வெளிவருவதற்கு முன்பு அதன் உள்ளடக்கங்களை உலமா சபையினால் அறிந்து கொள்ள முடிவதில்லை.
எனவே எதிர்காலத்தில் இஸ்லாம் சமய பாடநூல் ஆக்கங்களை இஸ்லாமிய மார்க்க அறிஞர்கள், நிபுணர்கள் அடங்கிய சபைக்கு அனுப்பி வைத்து சிபாரிசுகளையும் பெற்றுக் கொண்டதன் பின்பே அச்சிட வேண்டும். இந்த ஏற்பாடுகளை தேசிய கல்வி நிறுவகம் ஏற்பாடு செய்ய வேண்டும் என உலமா சபை தெரிவித்துள்ளது.
இம்ரான் மஹ்ரூப் எம்.பி.
கல்வி வெளியீட்டுத் திணைக்களத்தினால் அச்சிட்டு விநியோகிக்கப்பட்ட இஸ்லாம் சமய பாடநூல்கள் மீளப் பெறப்படுவதன் நோக்கம் என்ன என்பதை நீதிஅமைச்சர் அலிசப்ரி உள்ளிட்ட அரசாங்கத்திலுள்ள முஸ்லிம் பாராளுமன்ற உறுப்பினர்கள் மக்களுக்குத் தெளிவுபடுத்த வேண்டும் என திருகோணமலை மாவட்டப் பாராளுமன்ற உறுப்பினர் இம்ரான் மஹ்ரூப் தெரிவித்துள்ளார். இது தொடர்பில் அவர் அறிக்கையொன்றினை வெளியிட்டுள்ளார்.
அவ்வறிக்கையில் தெரிவிக்கப்பட்டுள்ளதாவது, ‘ஞானசார தேரர் தலைமையிலான ஒரே நாடு ஒரே சட்டம் தொடர்பான ஜனாதிபதி செயலணியின் பரிந்துரைக்கமைய இஸ்லாம் சமய பாட நூல்கள் மீளப் பெறப்படுவதாக ஊடகங்கள் செய்தி வெளியிட்டுள்ளன.
கல்வி வெளியீட்டுத் திணைக்களத்தினால் நியமிக்கப்படும் துறை சார்ந்த வாண்மை மிக்கவர்களினாலே பாடநூல்கள் எழுதப்படுகின்றன. இஸ்லாம் சமய பாட நூல்களும் இவ்வாறே எழுதப்படுகின்றன. இவ்வாறு எழுதப்பட்டு வெளியிடப்பட்டு விநியோகிக்கப்பட்டுள்ள இஸ்லாம் சமய பாடநூல்கள் சம்பந்தமாக தீர்மானம் மேற்கொள்ளும் உரிமை ஞானசார தேரருக்கு உண்டா? என்பதைக் கேட்க விரும்புகிறேன். இந்த விவகாரம் தொடர்பில் அரசில் முக்கிய பங்கு வகிக்கும் அமைச்சர் அலிசப்ரி கவனம் செலுத்த வேண்டும். மக்களுக்குத் தெளிவுபடுத்த வேண்டும் என்று அறிக்கையில் தெரிவிக்கப்பட்டுள்ளது.
முஜிபுர் ரஹ்மான் எம்.பி.
இஸ்லாமிய சமய பாடநூல்களில் திருத்தங்கள் செய்யப்படவேண்டுமென ஒரே நாடு ஒரே சட்டம் செயலணி கல்வி அமைச்சிடம் கோரியுள்ளது. இதன்படியே திருத்தங்கள் மேற்கொள்ளப்படுகின்றன.
இது சட்டவிரோத செயற்பாடாகும். எங்களின் மத உரிமைகளை மதியாது செயற்பட்டிருக்கிறார்கள். இது மனித உரிமை மீறலாகும். முஸ்லிம் பாராளுமன்ற உறுப்பினர்கள் இது தொடர்பில் கதைக்க வேண்டும்.
தேசிய கல்வி நிறுவகத்தின் உறுப்பினர்கள் இந்த ஏற்பாடுகளுக்காக வற்புறுத்தப்பட்டிருக்கிறார்கள். நாம் சர்வதேச ரீதியிலும் அரசாங்கத்துக்கு வற்புறுத்தல்களை ஏற்படுத்த வேண்டும் என பாராளுமன்ற உறுப்பினர் முஜிபுர் ரஹ்மான் ஊடகங்களுக்குத் தெரிவித்துள்ளார்.
நீதியமைச்சர் அலி சப்ரி
இவ்விவகாரம் தொடர்பில் ஊடகவியலாளர்கள் நீதியமைச்சர் அலிசப்ரியிடம் வினவினார்கள். அவர் இவ்வாறு பதில் வழங்கினார்.
‘ஒரே நாடு ஒரே சட்டம்’ செயலணியில் சில திட்டங்கள் இருப்பதென்றால் மீண்டும் அமைச்சுக்கு சென்று பார்க்க வேண்டும். முஸ்லிம்கள் தான் அந்தப் புத்தகங்களை எழுதுகிறார்கள். அவர்கள் அதனை திருப்பிப்பார்க்க வேண்டும் என்று சொல்லியிருக்கிறார்கள். அதன்படி தான் நடக்கும் என்றார்.
ஒரே நாடு ஒரே சட்டம் செயலணி கோரிக்கை விடுக்கவில்லை
இதேவேளை ஒரே நாடு ஒரே சட்டம் தொடர்பான ஞானசார தேரர் தலைமையிலான ஜனாதிபதி செயலணி இஸ்லாமிய சமய பாட நூல்கள் தொடர்பில் எவ்வித கோரிக்கையையோ, பரிந்துரைகளையோ முன்வைக்கவில்லையென ஒரே நாடு ஒரே சட்டம் தொடர்பான ஜனாதிபதி செயலணியின் உறுப்பினர்களில் ஒருவரான அஸீஸ் நிசாருத்தீன் தெரிவித்துள்ளார்.
இச்செயலணி தொடர்ந்தும் தனது பணியினை முன்னெடுத்து வருகிறது. இம்மாத இறுதியிலே அது தனது அறிக்கையை ஜனாதிபதியிடம் கையளிக்கும். இந்நிலையில் இவ்விவகாரத்தில் ஒரே நாடு ஒரே சட்டம் செயலணி பரிந்துரைகளை சமர்ப்பித்துள்ளது என்பது தவறானதாகும் எனவும் அவர் கூறியுள்ளார்.
ஆனால், ஒரே நாடு ஒரே சட்டம் தொடர்பான செயலணியின் செயலாளர் கடந்த 2021.11.03 ஆம் திகதி கல்வியமைச்சின் செயலாளர் கபில பெரேராவுக்கு கடிதமொன்றினை அனுப்பி வைத்துள்ளார். செயலணியின் செயலாளர் ஜீவந்தி சேனாநாயக்க அனுப்பி வைத்துள்ள கடிதம் ‘இஸ்லாம் அடிப்படைவாத போதனைகள் மற்றும் மத்ரஸா பாடசாலைகள் தொடர்பாக’ என தலைப்பிடப்பட்டுள்ளது.
கடிதத்தில் தெரிவிக்கப்பட்டுள்ளதாவது, 2251/30ஆம் இலக்க 2021.10.26ஆம் திகதியிட்ட அரசாங்க வர்த்தமானி மூலம் ஒரே நாடு ஒரே சட்டம் செயலணி ஜனாதிபதியினால் நியமிக்கப்பட்டுள்ளது. இதில் 13 உறுப்பினர்கள் அடங்குகின்றனர்.
செயலணிக்கு வழங்கப்பட்டுள்ள அதிகாரங்களின் கீழ் பின்வரும் விபரங்களைக் கோருகிறேன்.
அரசாங்க பாடசாலைகளின் பாடநூல்களில் அடங்கியுள்ள இஸ்லாமிய அடிப்படைவாத போதனைகளை அகற்றுதல், இந்த நூல்கள் எழுதுவதில் தொடர்புபட்டவர்களை அந்தக் குழுக்களிலிருந்தும் நீக்குதல் தொடர்பான தற்போதைய நிலைமை என்ன? மற்றும் மத்ரஸா பாடசாலைகளின் எண்ணிக்கையினைக் குறைத்தல் தொடர்பான தற்போதைய நிலைமையினை அறிவிக்கும்படி கோருகிறேன்.
இது தொடர்பான அறிக்கையை இந்தக் கடிதம் கிடைத்து ஒருவார காலத்துக்குள் பதில் கிடைப்பதற்கு ஏற்பாடு செய்யும்படி வேண்டுகிறேன் என்றே கோரப்பட்டுள்ளது.
2020இலும் குழு நியமிக்கப்பட்டது
அரச பாடசாலைகளில் போதிக்கப்படும் இஸ்லாமிய சமய பாடநூல்கள் மற்றும் பாடத்திட்டங்களில் திருத்தங்களைச் செய்வதற்கு அரசாங்கத்தினால் 2020.08.01ஆம் திகதி குழுவொன்று நியமிக்கப்பட்டது. குழு தனது அறிக்கையைச் சமர்ப்பிப்பதற்கு 2021.01.31ஆம் திகதி வரை கால அவகாசம் வழங்கப்பட்டது.
கலாநிதி அஷ்ஷெய்க் அப்வர்தீன் அல் அஸ்ஹரி தலைமையிலான இக்குழுவில் கலாநிதி அஷ்ஷெய்க் எம்.எஸ்.எம்.சலீம், அஷ்ஷெய்க் எம். அர்கம் நூராமித், கலாநிதி அஷ்ஷெய்க் ஏ.அஸ்வர் அஸாஹீம் அல்அஸ்ஹரி, கலாநிதி அஷ்ஷெய்க் எம்.ஐ.எம்.சித்தீக் அல் அஸ்ஹரி, கலாநிதி அஷ்ஷெய்க் எல்.எம்.முபீத் அல்அஸ்ஹரி, கலாநிதி அஷ்ஷெய்க் அஹமட் ராசிக் சர்ஜுன், அஷ்ஷெய்க் கே.ஏ.ஸகி அஹமட், அஷ்ஷெய்க் முர்சித் முளப்பர், அஷ்ஷெய்க் எம்.ஏ.ஹுஸ்னி முப்தி, மௌலவி எம்.ஆர்.எம்.சில்மி, மௌலவி பஸ்ருல் ரஹ்மான், மௌலவி ஏ.எம்.ரிஸ்மி ஆகியோர் அங்கம் வகித்தனர்.
இக்குழு பல அமர்வுகளை நடாத்தி இஸ்லாமிய சமய பாடநூல்களை ஆய்வு செய்தது. தரம் 1 முதல் தரம் 11 வரையிலான இஸ்லாம் பாட நூல்கள் வாசித்து ஆய்வு செய்யப்பட்டன. இந்நூல்களில் தீவிரவாதத்தைத் தூண்டக்கூடிய கருத்துகள் உள்ளடங்கியுள்ளதா என ஆய்வு செய்யப்பட்டது.
அகில இலங்கை ஜம்இய்யத்துல் உலமா சபை, சூராகவுன்ஸில், ஷரீஆ கவுன்ஸில் போன்றவற்றிலிருந்தும் இது தொடர்பாக அறிக்கைகள் பெற்றுக் கொள்ளப்பட்டன. பாடநூல்கள் உன்னிப்பாக வாசிக்கப்பட்டன. ஆனால் குழுவின் செயற்பாடுகள் சில காரணங்களினால் இடையில் ஸ்தம்பித்து விட்டன’ என குழுவின் உறுப்பினர்களில் ஒருவரான மௌலவி பஸ்ருல் ரஹ்மான் தெரிவித்தார்.
மார்க்க அறிஞர்கள் இணைத்துக் கொள்ளப்பட வேண்டும்
இஸ்லாம் சமய பாட நூல்கள் ஆக்கக்குழுவில் புத்திஜீவிகளான மார்க்க அறிஞர்களும் இணைத்துக் கொள்ளப்பட வேண்டும். அத்தோடு எதிர்காலத்தில் இஸ்லாம் பாடநூல் ஆக்கங்கள் மார்க்க அறிஞர்கள், நிபுணர்கள் அடங்கிய சபைக்கு அனுப்பி வைக்கப்பட்டு சிபாரிசுகளைப் பெற்றுக்கொள்ள வேண்டும். இதனையே அகில இலங்கை ஜம்இய்யத்துல் உலமா சபையின் செயலாளர் அர்கம் நூராமித்தும் வலியுறுத்தியுள்ளார்.
மேலும் கல்வி வெளியீட்டுத் திணைக்களத்தின் நடவடிக்கைகள் மாணவர்களின் கல்வி செயற்பாடுகளைப் பாதிக்காத வகையில் இடம்பெற வேண்டும்.
கல்வி வெளியீட்டுத் திணைக்களம், கல்வி அமைச்சு, தேசியக் கல்வி நிறுவகம் என்பனவற்றின் உயர் அதிகாரிகள், இஸ்லாம் பாட நூல்களில் அடங்கியுள்ள வசனங்கள், கருத்துகள், அடிப்படைவாதத்தைப் போதிப்பன அல்ல, அவ்வசனங்கள் வரலாற்றுடன் தொடர்புபட்டவை என்பதில் தெளிவு பெற வேண்டும்.-Vidivelli