பாகிஸ்தானின் பஞ்சாப் மாகாணத்தில் உள்ள முர்ரியில் கடும் பனிப்பொழிவு காரணமாக 22 பேர் உயிரிழந்த சம்பவம் பலரையும் அதிர்ச்சியிலும் கவலையிலும் ஆழ்த்தியுள்ளது.
முர்ரி மலைப் பகுதியில் வெள்ளிக்கிழமை மற்றும் சனிக்கிழமை அதிகாலையில் 4 அடிக்கும் (122 செ.மீ) உயரமான பனிப்பொழிவு ஏற்பட்டு ஆயிரக்கணக்கான கார்கள் அதனுள் சிக்கியதாக உள்துறை அமைச்சர் ஷேக் ரஷீத் அஹ்மத் தெரிவித்தார். வெப்பநிலை மைனஸ் 8 டிகிரி செல்சியஸ் (17.6 டிகிரி பரடைன்) ஆக குறைந்தது.
தலைநகர் இஸ்லாமாபாத்திற்கு வடக்கே சுமார் 50 கிலோ மீற்றர் தொலைவில் அமைந்துள்ள முர்ரி, ஆண்டுதோறும் ஒரு மில்லியனுக்கும் அதிகமான சுற்றுலாப் பயணிகளை ஈர்க்கும் பிரபலமான குளிர்கால சுற்றுலாப் பிரதேசமாகும்.
மலை வாசஸ்தலமான முர்ரிக்கு அருகில் கடும் பனியில் சிக்கித் தவித்த குறைந்தது 24,000 வாகனங்களில் இருந்து மக்களை மீட்டதாக அதிகாரிகள் தெரிவித்தனர். ஆனால் மேலும் 1,000க்கும் மேற்பட்ட வாகனங்கள் பனியினுள் சிக்கிக்கொண்டன. பாதிக்கப்பட்டவர்களில் பெரும்பாலானவர்கள் உடல் வெப்பநிலை அசாதாரணமாக குறைந்தன் (Hypothermia) காரணமாகவே இறந்ததாக அதிகாரிகள் தெரிவித்தனர்.
செவ்வாய்க்கிழமை இரவு தொடங்கிய பனிப்பொழிவு சீரான இடைவெளியில் தொடர்ந்து பெய்து வந்ததால் அதனைப் பார்வையிட ஆயிரக்கணக்கான சுற்றுலாப் பயணிகள் வருகை தந்தனர். எனினும் எதிர்பாராத அளவு ஏராளமான பார்வையாளர்கள் வருகை தந்ததால், வாகன நெரிசல் ஏற்பட்டு பல குடும்பங்கள் வீதிகளிலேயே சிக்கித் தவித்தன.
அரசாங்க புள்ளிவிபரங்களின்படி, பனிப்பொழிவு தொடங்கிய வெள்ளி மற்றும் சனிக்கிழமைக்கு இடையில் சுற்றுலாப் பயணிகளை ஏற்றிய சுமார் 157,000 க்கும் மேற்பட்ட வாகனங்கள் முர்ரிக்குள் நுழைந்தன.
பனிப்பொழிவு காரணமாக சாலைகளில் மரங்கள், மின்கம்பங்கள் விழுந்து கிடக்கின்றன. சிக்கியுள்ள வாகனங்களின் கண்ணாடிகளைத் தட்டி மக்களின் நிலையை அறிய மீட்புப் பணியாளர்கள் முயல்கின்றனர். பதில் கிடைக்கவில்லையென்றால், வாகனத்தை உடைத்துத் திறந்து உள்ளே இருப்பவர்களுக்கு உதவும் முயற்சி நடந்து வருகிறது.
மலை வாசஸ்தலமான முர்ரிக்கு அருகில் கடும் பனியில் சிக்கித் தவித்த குறைந்தது 24,000 வாகனங்களில் இருந்து மக்களை மீட்டதாக அதிகாரிகள் தெரிவித்தனர். ஆனால் மேலும் 1,000 க்கும் மேற்பட்ட வாகனங்கள் பனியினுள் சிக்கிக்கொண்டன.
பாதிக்கப்பட்டவர்களில் பெரும்பாலானவர்கள் உடல் வெப்பநிலை அசாதாரணமாக குறைந்ததன் (Hypothermia) காரணமாகவே இறந்ததாக அதிகாரிகள் தெரிவித்தனர். உயிரிழந்தவர்களில் இஸ்லாமாபாத்தில் கடமையாற்றும் சிரேஷ்ட பொலிஸ் அதிகாரியும் அவரது குடும்பத்தைச் சேர்ந்த ஏழு பேரும் அடங்குகின்றனர். மேலும் இறந்தவர்களில் 15 வயதுக்குட்பட்ட நான்கு மகள்கள் மற்றும் இரண்டு மகன்களைக் கொண்ட ஒரு குடும்பமும் அடங்குகிறது.
இறந்தவர்களில் 10 ஆண்கள், இரண்டு பெண்கள் மற்றும் 10 குழந்தைகள் அடங்குவர். முர்ரியின் மீட்புப் பணியாளர்கள் மற்றும் உள்ளுர் மக்கள் வாகனங்களில் சிக்கிய பயணிகள் மற்றும் மயக்கமடைந்தவர்களுக்கு முதலுதவி அளித்து அவர்களை பாதுகாப்பான இடங்களுக்கு அழைத்துச் செல்கின்றனர்.
“இது திட்டமிடலின்மையால் ஏற்பட்ட தோல்விக்கு ஒரு எடுத்துக்காட்டு, ஏனெனில் அறிக்கைகளின்படி, சுமார் 100,000 வாகனங்கள் குறுகிய சாலைகளைக் கொண்ட மலைப்பகுதிக்குச் சென்றன” என்று அல் ஜஸீராவின் செய்தியாளர் கமால் ஹைதர் கூறுகிறார்.
“கடுமையான பனிப்பொழிவு பற்றிய எச்சரிக்கைகள் இருந்தும் அதனை மீறி மக்கள் சென்றுள்ளனர். அல்லது அதிகாரிகள் அவர்களைத் தடுத்து நிறுத்தியிருக்க வேண்டும். அதுதான் ஒரு முழு பேரழிவிற்கு வழிவகுத்தது” என்றும் அவர் குறிப்பிடுகிறார்.
பல ஆண்டுகளுக்குப் பிறகு முர்ரியில் கடும்பனிப்பொழிவு காரணமாக சுற்றுலாப் பயணிகள் பல மணிநேரம் போக்குவரத்து நெரிசலில் சிக்கித் தவித்தனர். காரில் நீண்டநேரம் அமர்ந்திருந்ததாலும், ஜன்னல்கள் மூடப்பட்டு, ஹீட்டர் இயக்கப்பட்டதாலும் வாகனத்திற்குள் ஒட்சிசன் பற்றாக்குறை ஏற்பட்டு, பல சுற்றுலா பயணிகள் மயக்கம் அடைந்ததாக கூறப்படுகிறது.
முர்ரியில் சுற்றுலாப் பயணிகள் உயிரிழந்தது குறித்து பாகிஸ்தான் பிரதமர் இம்ரான் கான் வருத்தம் தெரிவித்துள்ளார். இந்த திடீர் பனிப்பொழிவை எதிர்கொள்ள அரச அதிகாரிகள் தயாராக இருக்கவில்லை என்று அவர் மேலும் கூறியுள்ளார்.
காலநிலை விபரங்களை தெரிந்து கொள்ளாமல் இவ்வளவு அதிகமான சுற்றுலாப் பயணிகள் முர்ரிக்கு வருவார்கள் என்று அதிகாரிகள் எதிர்பார்க்கவில்லை என்றும் அவர் கூறினார்.
“சுற்றுலாப் பயணிகளின் பரிதாப மரணம் அதிர்ச்சியும், வருத்தமும் அளிப்பதாகவும், எதிர்காலத்தில் இதுபோன்ற சோகம் நடக்காமல் இருக்க இந்த விவகாரம் குறித்து விசாரணைக்கு உத்தரவிடப்பட்டுள்ளது,” என்றும் இம்ரான் கான் தனது ட்விட்டர் பதிவில் தெரிவித்துள்ளார்.
“இப்போதும் நிறைய போக்குவரத்து நெரிசல் உள்ளது. குறைந்தது முந்நூறு வாகனங்கள் பதினேழு மைல் தொலைவில் உள்ள சுங்கச்சாவடியில் நிறுத்தப்பட்டுள்ளன. அதே நேரத்தில்சுமார் 500 வாகனங்கள் நெடுஞ்சாலைக்குச் செல்லும் வழியில் சிக்கிக் கொண்டுள்ளன,” என்று முர்ரியில் வசிக்கும் ஷஃபிக் பிபிசியிடம் கூறினார்.
பிபிசி செய்தியாளர் சஹர் பலோச்சிடம் பேசிய சானியா தாவூத், தனது கணவர் மற்றும் குழந்தைகளுடன் வெள்ளிக்கிழமை இரவு முர்ரிக்கு புறப்பட்டதாக கூறினார்.
“தற்போது நிலைமை மோசமாகி வருகிறது. ஜிக்கா சௌக்கிலிருந்து இருநூறுமீட்டர் தொலைவில் நாங்கள் இருக்கிறோம். கழிவறைக்கு செல்ல நீண்ட வரிசை உள்ளது, மேலும் சாலையில் கண்ணுக்கு எட்டிய தூரம் வரை வாகனங்கள் சிக்கிக்கொண்டுள்ளன. காலையில் நாங்கள் குழந்தைகளை அழைத்துக்கொண்டு சிற்றுண்டி வாங்க நடந்து சென்றோம். ஆனால் அங்கு இப்போது சமையல் கேஸும் குறைவாகவே உள்ளது. சாலைகள் வழுக்குவதால் நடப்பது சிரமம். இனி வண்டியைவிட்டு எங்களால் வெளியே செல்லமுடியாது,” என்று அவர் சொன்னார்.
வெள்ளிக்கிழமை இரவு தனது சொந்த ஊருக்குச் சென்று கொண்டிருந்த ரெஹான் அப்பாஸி, முந்தையநாள் மாலை 6 மணி முதல் பனியில் சிக்கித் தவிப்பதாக தெரிவித்தார். “இப்போதும் பனியில் சிக்கியுள்ளேன். வாகனங்களில் எரிபொருள் தீர்ந்து விட்டது. இங்கு குளிர் அதிகமாக உள்ளது. பனிக் கல்லறையில் புதையுண்டது போல காரில் நேரத்தை கடத்தினேன். நல்ல வேளை நான் உயிர்பிழைத்தேன்” என்றார் அவர்.
பனிப்பொழிவின் போது இதுபோன்ற சூழ்நிலையை தனது வாழ்நாளில் பார்த்ததில்லை என முர்ரியில் வசிக்கும் மெஹ்தாப் அப்பாஸி கூறினார்.
தற்போது முர்ரியில் மின்சாரம் இல்லை என்றும் சில இடங்களில் மின் கம்பிகள் அறுந்திருப்பதாகவும் அவர் குறிப்பிட்டார்.
சில வாகனங்களை தட்டிக் கேட்டாலும் அங்கிருந்து எந்த பதிலும்வரவில்லை என்று முர்ரி சாலையைச் சுற்றியுள்ள பகுதியில் நிவாரணப்பணியில் ஈடுபட்டுள்ள குல் ஹசன் என்பவர் குறிப்பிட்டார்.
“சில வாகனங்களை தட்டிக் கேட்கிறோம். ஆனால் அங்கிருந்து எந்த பதிலும் வரவில்லை. இதுபோன்ற இரண்டு வாகனங்களை அடையாளம் கண்டு அதிகாரிகளுக்கு தகவல் தெரிவித்துள்ளேன்” என்று குல் ஹசன் கூறினார்.
நிவாரணப்பணியில் ஈடுபட்டுள்ள மற்றொருவரான முகமது மொஹ்சின், “உண்மையில் கூறப்படுவதைவிட நிலைமை மோசமாக இருப்பதாக நான் நினைக்கிறேன்”என்றார்.
“சனிக்கிழமை காலை முதல் நிவாரணப் பணியாளர்கள் பயணிகளுக்கு உதவி வருகின்றனர். அவர்களுடன் உள்ளூர் மக்களும் பனியில் சிக்கியவர்களை வெளியேற்றி வருகின்றனர். நிவாரணப் பணியாளர்களின் எண்ணிக்கை மிகக் குறைவு என்று நான் நினைக்கிறேன். நிவாரணப்பணிகளை மிக வேகமாக விரைவுபடுத்தவேண்டும்,” என்று அவர் கூறுகிறார்.
முந்தைய தினம் பத்து குடும்பங்கள் தங்குவதற்கு ஏற்பாடு செய்ததாகவும், ஆனால் தடுத்து நிறுத்தியபோதிலும் அவர்கள் காலையில் ஹோட்டலை விட்டு வெளியேறியதாகவும் முர்ரியில் உள்ள ஹோட்டல் ஒன்றின் உரிமையாளரான காசிம் அப்பாஸி பிபிசியிடம் கூறினார்.
மாலை 5 மணி முதல் மீண்டும் பனிப்பொழிவு தொடங்கும் என்று அவர் தெரிவித்தார். “இங்கு ஏற்கனவே ஐந்தடி பனிப்பொழிவு ஏற்பட்டுள்ளது. 10 நிமிடங்களில் நடந்து செல்லும் தூரத்தைக்கடக்க தற்போது 2 மணி நேரம் ஆகிறது. காரை ஓட்டிச்செல்லும் பேச்சுக்கே இடமில்லை,”என்றார் அவர்.
“கடுமையான பனிப்பொழிவு இருக்கும் என்பதை நாங்கள் ஏற்கனவே அறிந்திருந்தோம். மேலும், முர்ரி வர வேண்டும் என்றால் ஞாயிறு அல்லது திங்கட்கிழமை வருமாறு எங்கள் சமூக ஊடகப் பக்கங்களில் சுற்றுலாப் பயணிகளிடம் வேண்டுகோள் விடுத்திருந்தோம். ஆனால் இப்போது கூட மக்கள் சுங்கச்சாவடிகளில் இருந்து நடந்து முர்ரிக்கு வர முயற்சிப்பதாக நாங்கள் கேள்விப்படுகிறோம்,” என்று அவர் குறிப்பிட்டார்.
நிவாரணப் பணிகளைப் பற்றிக் குறிப்பிட்ட காசிம், “எந்த இயந்திரங்கள் வேலை செய்தாலும், மண்வெட்டி மூலம் வேலை செய்பவர்களைக் கொண்டுவருவதுதான் ஒரே தீர்வு” என்றார்.
மூன்று வருடங்களுக்கு முன் இங்கு இதே போன்றதொரு நிலை ஏற்பட்டது. அப்போது நிறைய பனிப்பொழிவு ஏற்பட்டபோதிலும் முர்ரியில் ஒருவர் கூட இறக்கவில்லை என்று காசிம் கூறுகிறார். அப்போது வானிலையை எதிர்கொள்ள முன்னெச்சரிக்கை நடவடிக்கைகளை எடுத்ததாக அவர் கூறினார். முர்ரியில் பனிப்பொழிவில் இவ்வளவு பேர் இறந்தது இதுவே முதல் முறை என்றும் அவர் சொன்னார்.-Vidivelli