ஜனாதிபதியின் மன நிலையை சோதனைக்கு உட்படுத்தவும்

'மென்டாமுஸ்' - மேல்மன்ற பேராணை கோரி மேன்முறையீட்டு மன்றில் மனு

By vidivelli On Dec 11, 2018

எம்.எப்.எம்.பஸீர்

மனநல நோய்கள் தொடர்பிலான கட்டளைச் சட்டத்தின் 2 ஆம் அத்தியாயத்துக்கமைய ஜனாதிபதி மைத்திரிபால சிறிசேனவுக்கு எதிராக கொழும்பு மாவட்ட நீதிமன்றில் சட்ட நடவடிக்கைகளை ஆரம்பிக்குமாறு கோட்டை பொலிஸ் பொறுப்பதிகாரிக்கும், பொலிஸ் மா அதிபருக்கும் மென்டாமுஸ் மேல் மன்ற பேராணை ஒன்றினை பிறப்பிக்குமாறு கோரி பெண் ஒருவர் மேன் முறையீட்டு நீதிமன்றில் மனுவொன்றினை தாக்கல் செய்துள்ளார்.

மஞ்ஞநாயக்க ஜயவர்தன முதலிகே தக்சிலா லக்மாலி என்ற பெண்ணே சட்டத்தரணி சிசிர சிறிவர்தன ஊடாக இந்த மேல் மன்ற பேராணை மனுவை தாக்கல் செய்துள்ளார்.

மனுவில் பிரதிவாதிகளாக கோட்டை பொலிஸ் நிலைய பொறுப்பதிகாரி பிரதான பொலிஸ் பரிசோதகர் ஏ.டப்ளியூ.ஏ.கப்பார், பொலிஸ்மா அதிபர் பூஜித் சேனாதி பண்டார ஜயசுந்தர மற்றும் சட்டமா அதிபர் ஆகியோர் பெயரிடப்பட்டுள்ளனர்.

கடந்த ஒக்டோபர் 26 ஆம் திகதியின் பின்னரான ஜனாதிபதியின் ஒவ்வொரு நடவடிக்கை தொடர்பிலும் மனுவில் சுட்டிக்காட்டியுள்ள மனுதாரர், ஜனாதிபதியின் அந்த செயற்பாடுகள் மிகவும் குழப்பகரமாக உள்ளதாகவும் அவர் சீரிய மன நிலையில் இருந்திருந்தால் இவ்வாறு செயற்பட்டிருக்க மாட்டாரென சுட்டிக்காட்டியே கொழும்பு மாவட்ட நீதிமன்றில் சட்ட நடவடிக்கைகளை ஆரம்பிக்குமாறு பொலிஸ்மா அதிபருக்கும் கோட்டை பொலிஸ் பொறுப்பதிகாரிக்கும் உத்தரவிடுமாறு மனுவில் கோரியுள்ளார்.

‘ 2018 ஒக்டோபர் 26 ஆம் திகதி வரை ஜனாதிபதி மைத்திரிபால சிறிசேனாவின் செயற்பாடுகள் தேசிய அளவிலும் சர்வதேச அளவிலும் மிகவும் உயர்மட்டத்தில் பாராட்டப்பட்டன. எனினும் 26 ஆம் திகதி அவரின் திடீர் மாற்றும் குழப்பத்தை ஏற்படுத்தியுள்ளது. அரசியலமைப்பினை மீறி அவரால் வெளியிடப்பட்டிருக்கும் சில உத்தரவுகள் மற்றும் வர்த்தமானி அறிவித்தல்கள் அடிப்படையில் மக்கள் அதிர்ச்சியடைந்துள்ளனர்.

கடந்த ஒக்டோபர் 26 ஆம் திகதிக்குப் பின்னர் ஜனாதிபதியின் செயற்பாடுகள் மிகவும் குழப்பகரமான நிலையில் இருக்கும் நிலையில் அவர் சீரிய மனநிலையில் இல்லையெனத் தெரிகின்றது. சீரிய மனநிலையில் இருந்திருந்தால் இவ்வாறு செயற்பட்டிருக்க மாட்டார். எனவே முதலாவது பிரதிவாதியான கோட்டை பொலிஸ் நிலைய பொறுப்பதிகாரி கொழும்பு மாவட்ட நீதிமன்றத்தில் ஜனாதிபதியின் மனநிலையை அறிவதற்கான விண்ணப்பம் ஒன்றை தாக்கல் செய்ய வேண்டிய கடமையை கொண்டிருக்கின்றார். அவ்வாறு ஜனாதிபதி விசேட மனநல மருத்துவர்களின் முன்னிலையில் சோதிக்கப்படாத நிலையில் இலங்கைக்கு பாரிய அபகீர்த்தி தேசிய, சர்வதேச அளவில் ஏற்படும் .

அமைச்சரவையும் பிரதமரும் தமது கடமைகளில் ஈடுபடுவதற்கு மேன் முறையீட்டு நீதிமன்றம் இடைக்கால தடையினை விதித்திருக்கும் நிலையில் நீதிமன்றக் கட்டளையினை பகிரங்கமாக அவமதித்து ஜனாதிபதி மைத்திரிபால சிறிசேன சுகததாச அரங்கத்தில் இடம்பெற்ற ஸ்ரீலங்கா சுதந்திரக்கட்சியின பிரதிநிதிகள் மத்தியில் உரை நிகழ்த்தியிருக்கின்றார் என தனது மனுவில் சுட்டிக்காட்டியுள்ள மனுதாரர், அதனால் மனநல நோய்கள் தொடர்பிலான கட்டளைச் சட்டத்தின் 2 ஆம் அத்தியாயத்துக்கமைய ஜனாதிபதி மைத்திரிபால சிறிசேனவுக்கு எதிராக கொழும்பு மாவட்ட நீதிமன்றில் சட்ட நடவடிக்கைகளை ஆரம்பிக்குமாறு கோட்டை பொலிஸ் பொறுப்பதிகாரிக்கும், பொலிஸ்மா அதிபருக்கும் மென்டாமுஸ் மேல் மன்ற பேராணை ஒன்றினை பிறப்பிக்குமாறு கோரியுள்ளமை குறிப்பிடத்தக்கது.