ஏ.ஆர்.ஏ.பரீல்
கிண்ணியா வட்டமடுவில் கொவிட் 19 தொற்றினால் மரணிப்பவர்களை நல்லடக்கம் செய்வதற்காக ஒதுக்கப்பட்டுள்ள 9.9 ஏக்கர் அரச காணியில் கடந்த 6 ஆம் திகதி முதல் ஜனாஸாக்களை அடக்கம் செய்வதற்கான ஏற்பாடுகளைச் செய்யுமாறு இராணுவம் கிண்ணியா பிரதேச சபை தவிசாளர் கே.எம்.நிஹாரை வேண்டியிருந்தது. இதற்கு அமைவாகவே பிரதேச சபை தவிசாளர் மூலம் உதவிகள் கோரப்பட்டிருந்ததாக தெரிவிக்கப்படுகிறது.
இதேவேளை இராணுவம் கடந்த 6ஆம் திகதி ஜனாஸாக்களை அடக்குவதற்கு ஏற்பாடு செய்திருந்த போதும் சுகாதார அமைச்சின் அனுமதி வழங்கப்படாமை காரணமாக தாமதம் ஏற்படுவதாகவும், இதன் பின்னணியில் அரசியல் செல்வாக்கு தொடர்புபட்டுள்ளதாகவும் தெரிவிக்கப்படுகிறது.
கள விஜயம்
கிண்ணியா வட்டமடுவில் இனங்காணப்பட்டுள்ள கொவிட் 19 மையவாடி காணியின் அபிவிருத்தி தொடர்பில் கலந்துரையாடுவதற்கு அகில இலங்கை ஜனாஸா சங்கம் உட்பட சிவில் சமூக அமைப்புகளின் பிரதிநிதிகள் கிண்ணியாவுக்கு உத்தியோகபூர்வ விஜயமொன்றினை இம்மாதம் 1ஆம் திகதி மேற்கொண்டிருந்தனர். இவ்விஜயத்தில் அகில இலங்கை ஜனாஸா சங்கத்தின் உறுப்பினர் அப்துல் ரஷீட், அகில இலங்கை வை.எம்.எம்.ஏ பேரவையின் தேசிய தலைவர் சஹித் எம்.ரிஸ்மி, யட்டி நுவர பிரதேச சபை உறுப்பினர் வசீர் முக்தார், ஸம்ஸம் அமைப்பின் பணிப்பாளர் கியாஸ் ரவூப், கண்டி தேசிய வைத்தியசாலை அபிவிருத்தி குழு உறுப்பினர் முஹம்மத் ரிஸ்வி, பஸ்லான் பாரூக் பௌண்டேசன் தலைவர் பஸ்லான் பாரூக் மற்றும் அப்துல் ஹாலிக் ஆகியோர் பங்குகொண்டிருந்தனர்.
கிண்ணியா வட்டமடு பிரதேசத்தில் ஒதுக்கப்பட்டுள்ள குறிப்பிட்ட காணியை குழுவினர் பார்வையிட்டதுடன் இத்திட்டத்திற்கு பொறுப்பாகவுள்ள இராணுவ உயர் அதிகாரிகளுடன் இத்திட்டத்தின் அபிவிருத்தி தொடர்பில் கலந்துரையாடினர். அதனையடுத்து குழுவினர் கிண்ணியா பிரதேச சபைக்கும் விஜயம் செய்தனர். அங்கு பிரதேச சபையின் தவிசாளர் மற்றும் பிரதேச செயலாளருடன் கலந்துரையாடல்களில் ஈடுபட்டனர்.
இந்தக் கலந்துரையாடலில் திட்டத்துக்கு ஒத்துழைப்பு வழங்கும் அனைத்து பங்குதாரர்களுடன் அபிவிருத்தி பணிகள் தொடர்பாக விரிவாக ஆராய்ந்து திட்டத்தை துரிதப்படுத்துவதற்காக செயல் திட்டமொன்றினை ஆரம்பிப்பதாக இணக்கம் காணப்பட்டது.
கிண்ணியா பிரதேச சபைத் தவிசாளரின் வேண்டுகோளுக்கிணங்க வட்டமடு காணியை ஜனாஸா அடக்கம் செய்யும் வகையில் செப்பனிட்டு மையவாடியாக அபிவிருத்தி செய்வதற்கு களவிஜயம் மேற்கொண்ட சிவில் சமூக அமைப்புகள் பொறுப்பேற்றுக் கொண்டன. இதற்கென 43 இலட்சம் ரூபா செலவில் திட்டமொன்று வடிவமைக்கப்பட்டது.
டாக்டர் அன்வர் ஹம்தானி
கொவிட் 19 தொடர்பான சுகாதார அமைச்சின் பிரதம இணைப்பதிகாரி டாக்டர் அன்வர் ஹம்தானியை ‘விடிவெள்ளி’ தொடர்பு கொண்டு கிண்ணியா வட்டமடு கொவிட் 19 மையவாடி தொடர்பில் வினவியது. அவர் கருத்துத் தெரிவிக்கையில், ‘இந்த மையவாடிக்கான அனுமதியைப் பெற்றுக் கொள்வதற்காக தொழில் நுட்ப குழுவின் சிபாரிசுகளுக்கு அமைய தேவையான நடவடிக்கைகள் எடுக்கப்பட்டுள்ளன. அதற்காக சுகாதார அமைச்சுக்கு ஆவணங்கள் சமர்ப்பிக்கப்பட்டுள்ளன. ஆனால் இது வரை சிபாரிசு செய்யப்படவில்லை.
தற்போது ஓட்டமாவடியில் ஜனாஸாக்களை நல்லடக்கம் செய்வதற்கு இடமிருக்கிறது. இந்நிலையிலே கிண்ணியா வட்டமடு மற்றும் புத்தளத்தில் காணிகள் மையவாடிக்காக இனங்காணப்பட்டுள்ளன’ என்றார்.
வை.எம்.எம்.ஏ. பேரவையின் தேசிய தலைவர்
வை.எம்.எம்.ஏ. பேரவையின் தேசிய தலைவர் சஹீத் எம்.ரிஸ்மி வட்டமடு பிரதேசத்துக்கு களவிஜயம் மேற்கொண்டு மையவாடிக்காக ஒதுக்கப்பட்டுள்ள காணியை பார்வையிட்டமை தொடர்பில் கருத்து தெரிவிக்கையில், ‘கிண்ணியா பிரதேச சபையின் தவிசாளரின் அழைப்புக்கிணங்கவே வை.எம்.எம்.ஏயும் ஏனைய சிவில் சமூக அமைப்புகளும் கள விஜயமொன்றினை மேற்கொண்டன. தவிசாளர் மையவாடிக்கான உட்கட்டமைப்பு வசதிகளைச் செய்து தருமாறு எங்களைக் கோரியிருந்தார். இராணுவத்தின் அனுமதி கிடைக்கப் பெற்றுள்ளதாக எமக்குத் தெரிவிக்கப்பட்டது.
பொதுவான வேலைகளுக்கு எம்மிடம் உதவி கோரினால் நாம் உதவிகள் செய்வது வழக்கம். இந்த மையவாடிக்கு அரசாங்கத்தின் உத்தியோகபூர்வ அனுமதி கிடைத்த பின்பே நாம் உதவிகள் வழங்குவோம். பிரதேச செயலாளர் இன்னும் அனுமதி வழங்கப்படவில்லை என்று கூறினார். அனுமதி வழங்கப்படாவிட்டால் எம்மால் உதவிகள் செய்ய முடியாது.
மேலும் அவர் கிண்ணியா பிரதேச சபை வருமானம் இல்லாத சபை. அத்தோடு இச்சபைக்கு அரசாங்கத்தின் நிதி ஒதுக்கீடுகளும் இல்லை. தற்போது அரசாங்கத்திடம் பணம் இல்லை என்று தெரிவித்தார். இந்நிலையில் மையவாடிக்கு அனுமதி வழங்கப்பட்டால் நாம் நிச்சயம் உதவிகள் வழங்குவோம்.
அத்தோடு ஓட்டமாவடி மஜ்மா நகர் மையவாடியைத் தவிர இறக்காமம், புத்தளம் உட்பட நாட்டின் பல பாகங்களிலும் மையவாடிகள் அமைக்கப்பட வேண்டும். ஒவ்வோர் மாகாணத்திலும் காணிகள் இனங்காணப்பட்டு கொவிட் 19 மையவாடிகள் அமைக்கப்பட வேண்டும். இவ்விவகாரத்தில் எமது சமூகம் அரசியல் சுயஇலாபம் தேடக்கூடாது.
கிண்ணியா வட்டமடு மையவாடி அரசாங்கத்தினால் அங்கீகரிக்கப்பட்டால் வை.எம்.எம்.ஏ. உட்பட சிவில் அமைப்புகள் நிச்சயம் உதவிகள் வழங்கும்’ என்றார்.
பிரதேச சபை உறுப்பினர் வசீர் முக்தார்.
கடந்த 1ஆம் திகதி கிண்ணியா வட்டமடுவுக்கு கள விஜயமொன்றினை மேற்கொண்ட யட்டிநுவர பிரதேச சபை உறுப்பினர் வசீர் முக்தாரை விடிவெள்ளி தொடர்பு கொண்டு கிண்ணியா வட்டமடு கொவிட் 19 மையவாடி தொடர்பான மேலதிக விபரங்களைப் பெற்றுக் கொண்டது. அவர் விளக்கமளிக்கையில்,
‘சவூதி தூதரகத்தில் பணியாற்றும் கிண்ணியாவைச் சேர்ந்த ஒருவர் கிண்ணியா வட்டமடு மையவாடி பணிகளுக்கு உதவிகள் தேவைப்படுகிறது என அகில இலங்கை ஜனாஸா சங்கத்தின் தலைவர் நியாஸ்தீன் சத்தாரை வேண்டியுள்ளார். அவர் சங்கத்தின் கண்டி பிரதிநிதி அப்துல் ரஷீடை தொடர்பு கொண்ட நிலையில் அவர் பண உதவிகள் ஏற்பாடு செய்வோம் என என்னிடம் தெரிவித்தார்.
கடந்த 6ஆம் திகதி கிண்ணியா வட்டமடுவில் கொவிட் 19 ஜனாஸாக்கள் அடக்கம் செய்யப்படவுள்ளதாக இராணுவம் அறிவித்துள்ளதாகவும் தெரிவிக்கப்பட்டது. நான் கிண்ணியா பிரதேச சபைத் தலைவரை தொடர்புகொண்டு கிண்ணியா வட்டமடுவுக்கு 6ஆம் திகதி ஜனாஸாக்கள் அடக்கத்துக்காக கொண்டு வரப்படும் என இராணுவம் தெரிவித்திருந்தால் நாம் அங்கு வருவதற்கு அழைப்பிதழ் அனுப்புங்கள் என வேண்டினேன். எனக்கு அழைப்பிதழும் அனுப்பப்பட்டது. எமது குழுவினரையும் அழைத்துக்கொண்டு அங்கு வரும்படி தெரிவிக்கப்பட்டது.
நாம் கடந்த 1ஆம் திகதி வட்டமடுவுக்கு சென்ற போது இராணுவ அதிகாரிகளும் அங்கிருந்தார்கள். நாம் மையவாடிக் காணியைப் பார்வையிட்டோம். அங்கு பிரதேச செயலாளரும் வந்து சேர்ந்தார்.
நாம் இராணுவ அதிகாரிகளுடன் கதைத்தோம். 6ஆம் திகதி ஜனாஸாக்கள் அடக்கத்துக்காக இங்கு கொண்டு வரப்படும். இந்தக் காணியை மையவாடிக்காக பூரணப்படுத்தித் தாருங்கள் என அவர்கள் வேண்டினார்கள்.
9.9 ஏக்கர் மையவாடி காணியை 5 கட்டங்களாக அபிவிருத்தி செய்து தருவதாக நாம் இராணுவத்தினரிடம் உறுதியளித்தோம். அவர்கள் ஏற்றுக் கொண்டார்கள். இந்த மையவாடியின் அனைத்து நிர்வாகப் பொறுப்புகளையும் இராணுவமே ஏற்றுக் கொண்டுள்ளது.
இந்நிலையில் நான் சுகாதார அமைச்சின் கொவிட் 19 பிரதம இணைப்பாளர் டாக்டர் அன்வர் ஹம்தானி மற்றும் பிரதேச செயலாளருடன் கதைத்தேன். இதுவரை சுகாதார அமைச்சின் அனுமதி கிடைக்கவில்லை என அவர்கள் கூறினார்கள். இராணுவ பிரிகேடியரின் உத்தரவின்படியே மையவாடி பணிகள் இடம்பெறுகிறது எனத் தெரிவிக்கப்பட்டது. இதனையடுத்து நான் கேர்ணலுடனும் கதைத்தேன். சுகாதார அமைச்சின் அனுமதியின்றி எம்மால் பொது நிதி மூலம் இங்கு பணிகளைச் செய்ய உதவி வழங்க முடியாது என்று நான் கூறினேன்.
நான் திருகோணமலை அரசாங்க அதிபரைத் தொடர்பு கொண்டு மையவாடி அனுமதி தொடர்பில் வினவினேன். சம்பந்தப்பட்ட ஆவணங்களை சுகாதார அமைச்சுக்கு அனுப்பிவிட்டதாகவும் இதுவரை பதில் கிடைக்கவில்லை எனவும் அவர் தெரிவித்தார். கடந்த 3 ஆம் திகதியும் திருகோணமலை அரசாங்க அதிபரைத் தொடர்பு கொண்டேன். கடந்த 2ஆம் திகதி காலையிலே ஆவணங்கள் கிடைக்கப்பெற்றுள்ளதாகவும் அடுத்த வாரமளவில் அனுமதி வழங்கப்படும் என சுகாதார அமைச்சு தெரிவித்ததாகவும் அவர் கூறினார்.
இந்த மையவாடிக்கான அனுமதியைக் கோரி அதற்கான ஆவணங்கள் சுகாதார அமைச்சுக்கு அனுப்பப்பட்டும் இதுவரை அனுமதி வழங்கப்படவில்லை. பிரதேச செயலாளர் இரு தடவைகள் ஞாபகமூட்டியும் அனுமதி தாமதிக்கப்படுகிறது. இதன் பின்னணியில் அரசியல் செல்வாக்கு இருப்பதாக என்னிடம் தெரிவிக்கப்பட்டது என்றார்.-Vidivelli