யாழ். முஹம்மதியா பள்ளிவாசல் நிர்வாக சபை இடைநிறுத்தம்
பயணத்தடையை மீறி ஒன்றுகூடியதாக குற்றச்சாட்டு; அனைவரும் தனிமைப்படுத்தப்பட்டனர்
(எம்.எல்.லாபிர்)
யாழ்ப்பாணம் முஹம்மதியா பள்ளிவாசலில் கடந்த 4ஆம் திகதி வெள்ளிக்கிழமை கொவிட் 19 பயணக் கட்டுப்பாடுகளை மீறி பள்ளிவாசல் தலைவர் உட்பட 14 பேர் பள்ளிவாசலினுள் கூடி இருந்தமை காரணமாக வக்பு சபை உடனடியாக அமுலுக்கு வரும் வகையில் நிர்வாக சபையை இடைநிறுத்தியுள்ளது. இதேவேளை விஷேட நிர்வாக குழுவொன்றினை நியமிக்கவும் தீர்மானித்துள்ளது.
யாழ் கலீபா அப்துல்காதர் வீதி ( நாவலர் வீதி) யில் அமைந்துள்ள முஹம்மதியா ஜும் ஆ பள்ளிவாசலில் கடந்த 4ஆம் திகதி வெள்ளிக்கிழமை கொவிட் 19 பயணக் கட்டுப்பாடுகளை மீறு தலைவர் உட்பட 14 பேர் பள்ளிவாசலில் கூடி இருந்தமை காரணமாக அவர்கள் சுகாதாரத்துறை மற்றும் பாதுகாப்புத் துறையினரால் தனிமைப்படுத்தலுக்கு உட்படுத்தப்பட்டுள்ளனர். அன்றைய தினம் குறித்த நபர்கள் அங்கு ஜும்ஆ தொழுகையில் ஈடுபட்டதாக குற்றம்சாட்டப்பட்டுள்ளது.
“இப்பள்ளிவாசலின் தலைவர் உட்பட நிர்வாகிகள் தொடர்ந்தும் அரசாங்கத்தின் சட்டங்களை மீறியுள்ளனர் என்பதனாலேயே இத்தீர்மானம் மேற்கொள்ளப்பட்டுள்ளது. இப்பள்ளிவாசலின் தலைவரை திணைக்கள உத்தியோகத்திர்கள் நேரில் சந்தித்து எச்சரிக்கை செய்திருந்தும் அவர்கள் இவ்வாறு பொறுப்பற்ற முறையில் நடந்திருப்பது மிகவும் கவலை தருகிறது” என முஸ்லிம் சமய பண்பாட்டலுவல்கள் திணைக்களத்தின் பணிப்பாளர் ஏ.பி.எம். அஷ்ரப் ‘விடிவெள்ளி’க்குத் தெரிவித்தார்.
இடைநிறுத்தப்பட்டுள்ள யாழ் முஹியத்தீன் ஜும்ஆ பள்ளிவாசலின் நிர்வாக சபைத் தலைவர் மற்றும் நிர்வாகிகள் மீது குற்றச்சாட்டுகள் தொடர்பில் விசாரணை மேற்கொள்ளவுள்ளதாகவும் அவர் குறிப்பிட்டார்.
நாட்டிலுள்ள அனைத்துப் பள்ளிவாசல்களின் நிர்வாகிகளும் கொவிட் 19 சுகாதார வழிமுறைகளையும் பயணக் கட்டப்பாட்டினையும் கருத்திற் கொண்டு எச் சந்தர்ப்பத்திலும் பள்ளிவாசல்களில் மக்கள் ஒன்று கூடுவதைத் தவிர்க்க வேண்டும்.
நிவாரணப் பணிகளுக்காக ஒன்றுகூடுவதற்காக வேண்டிய தேவை ஏற்பட்டால் பாதுகாப்புத் துறை மற்றும் சுகாதாரத் துறையினரின் அனுமதியுடன் நிர்வாகிகள் மாத்திரம் ஒன்று கூடலாம். அதான் சொல்வதற்காகவும், கொவிட் 19 அல்லது நிவாரணம் தொடர்பான விஷேட அறிவித்தல்களைச் செய்யவும் முஅத்தின் அல்லது இமாம் மாத்திரம் பள்ளிவாசலினுள் நுழைய அனுமதிக்கப்படலாம் எனவும் பணிப்பாளர் ஏ.பி.எம். அஷ்ரப் தெரிவித்துள்ளார்.- Vidivelli