Dr.அ.அ. மு. அன்பாஸ் (MBBS, MD)
விஷேட பொது வைத்திய நிபுணர்
ஆதார வைத்தியசாலை,
கல்முனை- வடக்கு
இலங்கையில் கொரோனா வைரஸ் தடுப்பூசி செலுத்தும் பணி ஆரம்பிக்கப்பட்டு சில மாதங்கள் கடந்திருக்கும் நிலையில், இதுவரை சுகாதார சேவை பணியாளர்கள் மற்றும் கொரோனா தடுப்பு பணியாளர்களுக்கான தடுப்பூசிகள் செலுத்தப்பட்டு நிறைவடையும் நிலையில்,பொது மக்களுக்கான தடுப்பூசி விநியோகம் ஆரம்பிக்கப்பட்டுள்ளது.
இருந்தபோதிலும் பொதுமக்கள் மனதில் தடுப்பூசி செலுத்திக் கொள்வதா இல்லையா , தடுப்பூசி பாதுகாப்பானதா இல்லையா , தடுப்பூசியின் நோக்கம் என்ன? போன்ற பல்வேறு கேள்விகளும் குழப்பங்களும் எழுந்தவண்ணம் உள்ளன. அந்த வகையில் சில பொதுவான கேள்விகளுக்கான தெளிவூட்டல்களை இங்கே முன்வைக்கிறேன்.
ஏன் தடுப்பூசிகள் வழங்கப்படுகின்றன?
தடுப்பூசிகள் என்பவை, குறிப்பிட்ட சில கொடிய அல்லது உயிராபத்தை விளைவிக்கக்கூடிய கிருமித்தொற்றுகள் ஏற்படுவதில் இருந்து (வருமுன்காத்தல்) பாதுகாப்பை பெற்றுக்கொள்வதற்கான அணுகுமுறையாகும்.
எம்மை நோய்க்கிருமிகள் தொற்றும்போது எமதுடலில் இயற்கையாக குறித்த நோய்த் தொற்றிற்கெதிரான நோய் எதிர்ப்பு சக்தி ( நிர்ப்பீடணம்/immunity) உருவாகும். இதற்காக பிறபொருள் எதிரி எனும் பதார்த்தத்தை (Antibodies) எமது உடல் உருவாக்கும். பிறபொருள் எதிரிகள் நோய்க் கிருமிகளுடன் போராடி அவற்றை அழிப்பதன் மூலம் குறிப்பிட்ட கிருமித்தொற்றிலிருந்து எமது உடல் பாதுகாக்கப்படும். எனினும், கொரோனா வைரஸ் போன்ற சில வீரியமான நோய்க் கிருமிகள் தொற்றும்போது, இவ்வாறான இயற்கையான நோய் எதிர்ப்பு சக்தி எம்மை பாதுகாக்க முன்பு நோய்க் கிருமிகள் எமதுடலில் பல்கிப்பெருகி எம்மை கொல்லக்கூடிய வாய்ப்புகள் அதிகமாகக் காணப்படுகின்றன.
தடுப்பூசிகள் குறிப்பிட்ட நோய்த் தொற்றிற்கெதிரான பிரத்தியேகமான பிறபொருள் எதிரிகளை எமதுடலில் உருவாக்கத் தேவையான பதார்த்தங்களைக் கொண்டிருக்கும். இவ்வாறான பதார்த்தங்கள் வலுவிழக்கச்செய்யப்பட்ட நோய்க்கிருமிகளாகவோ அல்லது அவற்றின் ஒரு பகுதியாகவோ அல்லது புதியதோர் பொறிமுறையாகவோ இருக்கக்கூடும். எனவே தடுப்பூசியை பெற்றுக்கொண்ட ஒருவர் புதிதாக கிருமித்தொற்று ஏற்படும்போது அக்கிருமித்தொற்றின் ஆரம்ப நிலையிலேயே நோய்க் கிருமிகளை போராடி அவற்றை அழிப்பதற்கு தேவையான பிறபொருள் எதிரிகளை பெற்றிருப்பார். இதுவே தடுப்பூசியின் பெரும் பலமாகும். உதாரணமாக போலியோ போன்ற சில கொடிய நோய்கள் இவ்வுலகில் இருந்து ஏறத்தாழ இல்லாதொழிக்கப்பட்டுள்ளன.
ஆகவே கொரோனா வைரஸ் தடுப்பூசி என்பது தற்போது காணப்படும் சர்வதேச கொரோனா பரவல் நிலையை கட்டுப்படுத்துவதற்கான ஒரு முக்கியமான ஆயுதம் என்றால் மிகையாகாது.
கொரோனா வைரஸ் தடுப்பூசியின் முக்கியத்துவம் என்ன ?
· கொரோனா நோய்த் தொற்றுக்குள்ளாவதற்கான தன்மையை குறைக்கின்றது.
· நோய்த் தொற்று ஏற்பட்டாலும் , அதன் வீரியத்தன்மையை பெருமளவில் குறைக்கின்றது.
· நோய்த் தொற்றினால் ஏற்படும் இறப்பு வீதத்தை பெருமளவில் குறைக்கின்றது.
· சிலவேளைகளில் நீங்கள் நோய்த் தொற்றுக்குள்ளாகி உங்களுக்கு கொரோனா நோயறிகுறி தென்படாத நிலையில் உங்களைச் சுற்றியுள்ள நோய் எதிர்ப்பு சக்தி குறைந்த வயோதிபர்கள் மற்றும் சிறார்களுக்கு கொரோனாவை பரப்பும் தன்மையை குறைக்கலாம் .
· மக்கள் தொகையில் அதிகமானோருக்கு தடுப்பூசி ஏற்றுவதன் மூலம் கூட்டெதிர்ப்பு சக்தியை (herd immunity) அடையலாம். இது சமூகத்தில் வைரசு பரம்பலை கட்டுப்படுத்தும்.
· மேலும் மக்கள் தொகையில் அதிகமானோருக்கு தடுப்பூசி ஏற்றுவதன்மூலம் வைரஸ் பிறழ்வுகள் (Virus mutations) ஏற்பட்டு வீரியமான வைரசுக்கள் புதிதாக உருவாகுவதை குறைக்கலாம்.
கொரோனா வைரஸ் தடுப்பூசியினால் பக்கவிளைவுகள் ஏற்படுமா?
இன்றைய உலகில் பயன்பாட்டிலுள்ள ஏறக்குறைய அனைத்து மருந்துகளும் நன்மையைத் தரும் அதேவேளையில் பக்கவிளைவுகளும் காணப்படுகின்றன. நன்மைகள் பெரியதாகவும் பக்கவிளைவுகள் சிறியதாகவோ அல்லது பாரிய பக்கவிளைவுகள் புறக்கணிக்கத்தக்க அளவில் நிகழும்போது, அவை சிறந்த மருந்துகளாக கருதப்படுகின்றன.
இந்தவகையில் கொரோனா தடுப்பூசியானது பாரியளவில் மக்களுக்கு பயனளிக்கக் கூடியதாகவும், பல சிறிய பக்கவிளைவுகளைகொண்டதாகவும் மிக மிக அரிதாக அல்லது புறக்கணிக்கத்தக்க அளவில் நிகழக்கூடிய பாரிய பக்கவிளைவுகளையும் கொண்டது.
பக்கவிளைவுகள் ஒருவருக்கொருவர் மற்றும் வெவ்வேறு வகையான தடுப்பூசிகளுக்கிடையில் வேறுபடக்கூடியவை.
பொதுவாக(Common side effects) நிகழக்கூடிய சிறிய பக்கவிளைவுகள், உதாரணமாக:
· தடுப்பூசி ஏற்றப்பட்ட இடத்தில் ஏற்படக்ககூடிய தற்காலிக வலி
· காய்ச்சல்
· உடல்வலி
· தலைவலி
· களைப்புத்தன்மை
இவை உடனடியானவை,தற்காலிகமானவை, சாதாரணமானவை.
மேலும் இவ்வாறான அறிகுறிகள்,எமதுடலில் தடுப்பூசி தனது நோய் எதிர்ப்பு சக்தியை வலுப்படுத்தும் செயற்பாட்டை ஆரம்பித்துள்ளது என்பதனை குறித்து நிற்கின்றது.
அரிதான (Rare side effects) நிகழக் கூடிய நடுத்தர -பெரிய பக்கவிளைவுகள்
· சிறிய ஒவ்வாமை (mild allergic reaction)
· கடுமையான ஒவ்வாமை (severe allergic reaction or Anaphylaxis)
இவை தடுப்பூசி ஏற்றப்பட்டு 30 நிமிடங்களுக்குள் நிகழக்கூடியவை. இதற்காக வேண்டி தடுப்பூசி ஏற்றப்பட்டுள்ளவர்கள் 30 நிமிடங்கள் தரித்துச்செல்லுமாறு வேண்டப்படுவர். இவை உடனடியான சிகிச்சையினால் குணப்படுத்தக்கூடியவை.
மிக மிக அரிதாக (Very Rare side effects) நிகழக்கூடிய கடுமையான பக்கவிளைவுகள்
· குறிப்பாக Astrazeneca Vaccine- குருதியுறைவு. இது ஒரு மில்லியன் தடுப்பூசி பெற்றவர்களில் நால்வருக்கு (4:1,000,000) எனும் விகிதத்தில் நிகழ்ந்துள்ளது.
யார் தடுப்பூசியைப் பெற தகுதியானவர்கள்?
18 வயதுக்கு மேற்பட்டவர்கள் (எனினும் முன்னுரிமைப்படுத்தப்பட்ட வயதெல்லை சுகாதார அமைச்சினால் தீர்மானிக்கப்படும்)
யாருக்கு தடுப்பூசி வழங்கப்படமாட்டாது ?
· 18 வயதுக்குட்பட்டவர்கள்
· கர்ப்பிணித் தாய்மார்
· கடந்த காலத்தில் கடுமையான ஒவ்வாமை (severe allergic reaction or Anaphylaxis) ஏற்பட்டவர்கள்
· தடுப்பூசியில் உள்ள பதார்த்தம் ஒன்றிற்கு எதிரான ஒவ்வாமையை கொண்டவர்கள்.
மேலும் குருதியுறையாமை அல்லது கடந்த காலங்களில் நாளத்தில் குருதியுறைவு ஏற்பட்டவர்கள் தடுப்பூசி செலுத்தப்படும் நாளில் இவற்றை அங்குள்ள வைத்தியரிடம் கூறிக்கொள்வது சிறந்தது.
குறிப்பாக Sinopharm தடுப்பூசியை பெற இருப்பவர்கள் , கட்டுப்படுத்தப்படாத வலிப்பு நோய் ( uncontrolled Epilepsy) மற்றும் Gullain-Barre syndrome போன்ற கடுமையான நரம்புநோய்களை கடந்த காலங்களில் எதிர்கொண்டிருப்பின் அவற்றையும் வைத்தியரிடம் கலந்துரையாடுவது சிறந்தது.
கடந்த காலங்களில் கொரோனா வைரஸ் தொற்றுக்குள்ளாகியிருப்பின் தடுப்பூசி பெற முடியுமா ?
ஆம். கொரோனா வைரஸ் தொற்றிலிருந்து குணமாகி இரண்டு வாரங்கள் கடந்த பின்னர் பெறமுடியும்.
எத்தனை தடவைகள் தடுப்பூசியை செலுத்தவேண்டும் (Vaccine shots)?
இரண்டு தடவைகள். இரண்டு தடுப்பூசிகளுக்கிடையிலான ஆகக்குறைந்த இடைவெளி நான்கு வாரங்களாகும்.
எத்தனை வகையான தடுப்பூசிகள் தற்போது எமது நாட்டில் செலுத்தப்படுகின்றன?
· Covishield தடுப்பூசி- ( இது Oxford-AstraZeneca தடுப்பூசியின் இந்திய நாட்டின் தயாரிப்பாகும் )
· Sinopharm தடுப்பூசி- இது சீன நாட்டின் தயாரிப்பாகும்.
· Sputnik V தடுப்பூசி- இது ரஷ்யா நாட்டின் தயாரிப்பாகும்.
தடுப்பூசியின் செயல்திறன் (Efficacy) மற்றும் பக்க விளைவுகளின் தன்மை (side effects profile) என்பன இவற்றுக்கிடையில் வேறுபடும். இவை அனைத்தும் இலவசமாகவும் பாதுகாப்பான முறையிலும் தற்போது வழங்கப்பட்டு வருகின்றன. எனினும் எமக்கு விருப்பமான தடுப்பூசியை எம்மால் தெரிவுசெய்ய முடியாது.
தற்போதைய காலகட்டத்தில் சர்வதேச கொரோனா பரவல்நிலையை (Pandemic) எதிர்கொண்டுள்ள நாம் உலக சுகாதார நிறுவனத்தினால் அனுமதிக்கப்பட்டதும் இலகுவாக கிடைக்கக் கூடியதுமான தடுப்பூசியை பெற்று எமது பெறுமதியான உயிர்களை பாதுகாத்துக் கொள்வதே புத்திசாலித்தனமாகும்.
கொரோனா வைரஸ் தடுப்பூசியினால் கொரோனா தொற்று ஏற்படுமா?
உறுதியாக இல்லை எனக்கூறமுடியும். இது அனைத்து கொரோனா தடுப்பூசிகளுக்கும் பொருந்தும்.
தடுப்பூசியை ஏற்றிக்கொண்ட ஒருவருக்கு தொற்று ஏற்படுமிடத்து அக்குறிப்பிட்ட நபர் கொரோனா வைரஸினை பரப்ப சாத்தியமுண்டா?
தடுப்பூசியை ஏற்றிக்கொண்ட ஒருவருக்கு தொற்று ஏற்படுமிடத்து, அத்தொற்றானது நோயறிகுறி தென்படாத நிலையில் உடலில் காணப்பட இடமுண்டு. தடுப்பூசி கொரோனா தொற்று பரவலின் வீரியத்தன்மையை குறைக்கின்றபோதிலும், பரவலை முற்று முழுதாக தடுப்பதில்லை . இதன்காரணமாக, தடுப்பூசியை ஏற்றிக்கொண்டபோதிலும் மாஸ்க் அணிதல், கைகளை சுத்தமாக கழுவுதல் ,சமூக இடைவெளியை பேணல் என்பவற்றை தொடர்ந்தும் கடைப்பிடிக்க வேண்டிய கட்டாயத்தில் உள்ளோம்.
தற்போது பயன்பாட்டிலுள்ள கொரோனா தடுப்பூசிகள் மாறுபட்ட (Variant) அல்லது பிறழ்வுபட்ட (mutated) வைரசுகளுக்கெதிராக செயற்படுமா?
தற்போதுவரை கிடைக்கப்பெற்ற தரவுகளுக்கமைவாக, பொதுவாக தற்போது பயன்பாட்டிலுள்ள கொரோனா தடுப்பூசிகள் ஆகக் குறைந்தது, பகுதியளவேனும் மாறுபட்ட அல்லது பிறழ்வுபட்ட வைரசுகளுக்கெதிராக செயற்படும் ஆற்றலைக் கொண்டுள்ளன.
மேற்படி விடயங்கள் கொவிட் தடுப்பூசி தொடர்பான போதுமான தெளிவை வழங்கியிருக்கும் என நம்புகிறேன். அந்த வகையில் உங்களது பிரதேசங்களில் தடுப்பூசி வழங்கும் பணிகள் ஆரம்பிக்கப்படுமானால் தாமதியாது சென்று அதனைப் பெற்றுக் கொள்வதே நமக்கும் நமது குடும்பத்திற்கும் நாட்டுக்கும் பாதுகாப்பானதாகும்.- Vidivelli